Kronika II, 17 - BAIBLO ALOO NGMAMI KLƆUKLƆU Ɔ

Yehoshafat ba ye matsɛ ngɛ Yuda

¹ Yehoshafat ba ye matsɛ ngɛ e tsɛ Asa se, nɛ e dla konɛ e kɛ Israel nɛ kpe.

² E ngɔ ta buli ngɔ to Yuda mahi nɛ a fia gbogbo ngɔ wo a he ɔ, kɛ kɔpe ɔmɛ, kɛ Efraim mahi nɛ e tsɛ Asa kpɔ ɔ a mi.

³ Yawɛ gbaa Yehoshafat, ejakaa e ya wo e tsɛ nane, nɛ e ba e je mi kaa bɔ nɛ e tsɛ pee ngɛ e nihe be mi ɔ pɛpɛɛpɛ; e ja we Baal.

⁴ E sɔmɔ e tsɛ Mawu ɔ; e ye Mawu mlaa amɛ a nɔ, nɛ e pee we e ní kaa Israel matsɛmɛ ɔmɛ.

⁵ Enɛ ɔ he je ɔ, Yawɛ ha nɛ e matsɛ yemi ɔ da si, nɛ Yuda ma a tsuo wo tó ha lɛ. E na ní kpɔtɔɔ, nɛ e hɛ mi ba nyami.

⁶ E sɔmɔ Yawɛ kɛ e he wami tsuo. E gbɛ jami he ɔmɛ tsuo, nɛ amaga a nɛ a puɛ kɛ ha yo mawu ɔ nɛ ngɛ Yuda nɛ a tsɛɛ Ashera a hu e ku lɛ pue si.

⁷ Benɛ e ngɛ matsɛ yee ɔ, jeha etɛne ɔ, e tsɔ ganɔ nɛ ɔmɛ kɛ ho Yuda ma amɛ a mi ya, konɛ a ya tsɔɔ ní. Mɛ ji Benhail, Obadia, Zakaria, Netanel, kɛ Mikaya.

⁸ Levi bi nɛɛ, kɛ osɔfohi enyɔ piɛ a he kɛ ho. Levi bi nɛ ya a ji Shemaya, Netania, Zebadia, Asahel, Shemiramot, Yehonatan, Adoniya, Tobiya, kɛ Tobadoniya; nɛ osɔfo ɔmɛ ji Elishama, kɛ Yehoram.

⁹ A hɛɛ Yawɛ mlaa womi ɔ kɛ ya kpa Yuda ma amɛ tsuo a mi, nɛ a tsɔɔ ma a mlaa a.

Yehoshafat ba pee nɔmlɔ agbo

¹⁰ Yawɛ ha nɛ sawale nu matsɛmɛ ɔmɛ nɛ bɔle Yuda a, nɛ a ti nɔ ko nyɛ we nɛ e kɛ Matsɛ Yehoshafat nɛ hwu ta.

¹¹ Filisti bi ɔmɛ a ti ni komɛ ba ke Yehoshafat ní, nɛ a kɛ sika hiɔ babauu wo tó ha lɛ. Arabia bi ɔmɛ hu ba ha lɛ agbosu akpe kpaago kɛ e nya lafa kpaago, kɛ akpakpo akpe kpaago kɛ e nya lafa kpaago.

¹² Lɔ ɔ he ɔ, Yehoshafat na he wami pe sa a, nɛ e ma mɔhi, kɛ mahi ngɛ Yuda zugba a tsuo nɔ,

¹³ nɛ a to niye ní babauu nitsɛ ngɛ ma nɛ ɔmɛ a mi. E ngɔ ma ní tsuli nɛ a kɔni si wa ngɔ to Yerusalem

¹⁴ we puɔ nya we puɔ nya. Ta buli nɛ je Yuda a, a nyatsɛ ji Adna. E we bi ɔmɛ a hiɛmi ji akpe lafa etɛ.

¹⁵ Asafoatsɛ nɛ ba ngɛ e se ji Yehohanan, nɛ e we bi ɔmɛ a hiɛmi ji akpe lafa enyɔ kɛ nyingmi kpaanyɔ.

¹⁶ Asafoatsɛ nɛ ba ngɛ lɛ hu e se ji Zikri binyumu Amasia nɛ ngɔ e he ngɔ ha kaa e ma tsu ní ha Yawɛ. E we bi ɔmɛ a hiɛmi ji akpe lafa enyɔ.

¹⁷ Ta buli nɛ je Benyamin ɔ, a nyatsɛ ji Eliada; tatsɛ kpanaa ji lɛ. E we bi ɔmɛ a hiɛmi ji akpe lafa enyɔ, nɛ a hɛɛ tsɛ̃ihi kɛ kɛ̃ɛ̃hi.

¹⁸ Nɔ nɛ ba ngɛ Eliada se ji asafoatsɛ Yehozabad, kɛ e we bihi akpe lafa kɛ nyingmi kpaanyɔ nɛ a dla a he saminya kɛ ha ta hwumi.

¹⁹ Ta buli nɛ sɔmɔ matsɛ ɔ ngɛ Yerusalem ji nɛ ɔmɛ nɛ; slo ni nɛmɛ nɛ e ngɔ mɛ ngɔ to Yuda ma kpahi nɛ a fia gbogbo ngɔ wo a he ɔ a mi.