Kronika II, 15 - BAIBLO ALOO NGMAMI KLƆUKLƆU Ɔ

Asa tsake níhi

¹ Be ko ɔ, Mawu mumi ɔ ba Oded binyumu Azaria nɔ,

² nɛ e ho nɛ e kɛ Asa ya kpe, nɛ e de lɛ ke, “Matsɛ Asa, kɛ Yuda, kɛ Benyamin bi tsuo, nyɛɛ bu mi tue! Be abɔ nɛ nyɛ pɛtɛ Yawɛ he nɛ ɔ, lɛ hu e kɛ nyɛ ngɛ. Ke nyɛ hla e se blɔ ɔ, e ma ha nɛ nyɛɛ na lɛ. Se ke nyɛ kpale ngɛ e se ɔ, lɛ hu e ma kua nyɛ.

³ Be saii ji nɛ ɔ nɛ Israel ma a ngɛ kɛkɛ, nɛ a ja we anɔkuale Mawu ɔ; osɔfohi be nɛ maa tsɔɔ mɛ ní ɔ, mlaa ko hu be.

⁴ Se benɛ haomi ba a nɔ ɔ, a kpale kɛ ba Yawɛ Israel Mawu ɔ ngɔ. A hla lɛ, nɛ a na lɛ.

⁵ Jamɛ a be ɔ mi ɔ, nɔ ko nɔ ko nyɛ we nɛ e jeɔ kpo nɛ e yaa nɛ e baa ngɛ he jɔmi mi, ejakaa haomi kɛ basabasa ngɛ zugba amɛ tsuo a nɔ.

⁶ Je ma kɛ je ma ngɛ ta nɔ; ma kɛ ma hu ja nɔuu, ejakaa Mawu kɛ haomi slɔɔtohi ba a nɔ.

⁷ Se nyɛɛ lɛɛ, nyɛ wlua nyɛ! Nyɛ ko ha nɛ nyɛ nine mi nɛ je wu, ejakaa ní tsumi nɛ nyɛ ngɛ tsue ɔ, nyɛ ma na he hiɔwo.”

⁸ Benɛ Matsɛ Asa nu gba gbi nɛ ɔ kɛ je Oded binyumu Azaria nya a, e nɔ gbagba te. E je amagahi tsuo kɛ je Yuda kɛ Benyamin zugba a nɔ. E je amagahi tsuo kɛ je mahi nɛ e ya kpɔ ngɛ Efraim yo ɔmɛ a nɔ ɔ hu a mi, nɛ e dla Yawɛ bɔ sami la tɛ ɔ nɛ ngɛ Yawɛ we ɔ hɛ mi ɔ.

⁹ Nihi babauu ku kɛ je Efraim, Manase, kɛ Simeon ngɛ Israel kɛ ba Asa ngɔ, nɛ a kɛ lɛ ba hi si; ejakaa a nu kaa Yawɛ kɛ lɛ ngɛ. Asa kpee mɛ tsuo kulaa kɛ piɛ Yuda kɛ Benyamin he.

¹⁰ A ba bua a he nya ngɛ Yerusalem, ngɛ Asa matsɛ yemi jeha nɛ ji nyɔngma kɛ enuɔ ɔ we nyɔhiɔ etɛne ɔ mi.

¹¹ Jamɛ a ligbi ɔ, a ngɔ ta yibu ní ɔmɛ nɛ a kɛ ba a eko kɛ sã bɔ ha Yawɛ. Ní ɔmɛ ji na lafa kpaago, kɛ to akpe kpaago.

¹² A so, nɛ a kplɛɛ kaa a ma ja Yawɛ, a nɛmɛ a Mawu ɔ kɛ a tsui tsuo, kɛ a klaa tsuo.

¹³ Nɔ tsuaa nɔ nɛ be Yawɛ, Israel Mawu ɔ jae ɔ, a maa gbe lɛ, jokuɛ jio, nɔkɔtɔma jio, nyumu jio, yo jio.

¹⁴ A kɛ ngmlaa ka kita ngɛ Yawɛ biɛ mi ke a maa ye somi ɔ nɔ. Kɛkɛ nɛ a he ose, nɛ a kpa titimatihi, kɛ kolihi.

¹⁵ Yuda ma a tsuo nya, ejakaa a so somi nɛ ɔ kɛ a tsui tsuo. A bua jɔ Yawɛ jami ɔ he, nɛ Yawɛ hu he mɛ, nɛ e ha mɛ tue mi jɔmi ngɛ he tsuaa he.

¹⁶ Matsɛ Asa kpa e nyɛ Maaka tete po manyɛ yemi, ejakaa e pee amaga ko nɛ a hiee kɛ ha yo mawu ɔ nɛ a tsɛɛ Ashera a. Asa ku amaga a ngɔ pue si. E wɛɛ lɛ mɔnyɔmɔnyɔ, nɛ e ya sã lɛ ngɛ Kidron kɔ̃ ɔ mi.

¹⁷ E ngɛ mi kaa Asa gbɛ́ jami he ɔmɛ tsuo ngɛ Israel zugba a mi lɛɛ, se e ye Yawɛ anɔkuale e wami be ɔ tsuo.

¹⁸ Asa ngɔ ní nɛ ɔmɛ kɛ ba ma Yawɛ we ɔ mi: níhi tsuo nɛ e tsɛ Abiya pee mɛ klɔuklɔu kɛ ha Mawu, kɛ sika tsu kɛ sika hiɔ níhi nɛ lɛ Asa nitsɛ e pee mɛ klɔuklɔu kɛ ha Mawu ɔ.

¹⁹ Ta ko ta ko ti si hu ngɛ Asa be ɔ mi kɛ ya si e matsɛ yemi mi jeha nɛ ji nyingmi etɛ kɛ enuɔ ɔ.