Kronika II, 14 - BAIBLO ALOO NGMAMI KLƆUKLƆU Ɔ

Matsɛ Asa ye Sudan bi ɔmɛ a nɔ

¹ Matsɛ Abiya ba gbo, nɛ a pu lɛ ngɛ David ma a mi, nɛ e bi Asa ba ye tsɛ ngɛ e se. Asa yi nɔ ɔ, tue mi jɔmi ba zugba a nɔ jeha nyɔngma.

² E ní peepee sa Yawɛ, e Mawu ɔ hɛ mi; e pee nɔ́ nɛ da, kɛ nɔ́ nɛ hi.

³ E jé ma se bɔ sami la tɛ ɔmɛ. E gbɛ jami he ɔmɛ; e ku amaga amɛ, kɛ amaga a nɛ a puɛ ha yo mawu ɔ nɛ a tsɛɛ Ashera a.

⁴ E fa Yuda bi ɔmɛ ke a pee Yawɛ, a nɛmɛ a Mawu ɔ suɔmi nya ní, nɛ a ye e tsɔɔmi ɔmɛ, kɛ e mlaa amɛ a nɔ.

⁵ Akɛnɛ e gbɛ jami he ɔmɛ, nɛ e je tsopa kɛ e he via bɔ sami la tɛ ɔmɛ kɛ je Yuda ma amɛ tsuo a mi he je ɔ, e yi nɔ jɔ.

⁶ E fia gbogbo kɛ wo Yuda ma amɛ a he jamɛ a be ɔ mi. E kɛ nɔ ko nɔ ko hwui ta jehahi babauu, ejakaa Yawɛ ha lɛ tue mi jɔmi.

⁷ Asa de e ma Yuda ke, “Nyɛ ha nɛ waa fia gbogbo kɛ wo ma nɛ ɔmɛ a he. Nyɛ ha nɛ waa ma mɔhi, kɛ a nya agbohi kɛ a se lami dade. Zugba a fɔɔ si ha wɔ, ejakaa wa pee Yawɛ, wa Mawu ɔ suɔmi nya ní. Yawɛ ha wɔ he jɔmi, kɛ tue mi jɔmi ngɛ he tsuaa he kɛ bɔle si.” Lɔ ɔ he ɔ, a po ma amɛ, nɛ níhi a mi hi ha mɛ saminya.

⁸ Matsɛ Asa ngɛ ta buli nɛ je Yuda. A hiɛmi ji akpe lafa etɛ; nɛ a hɛɛɔ tsɛ̃i kɛ akplɔ. E ngɛ ta buli nɛ je Benyamin hulɔ. A hiɛmi ji akpe lafa enyɔ kɛ nyingmi kpaanyɔ; nɛ mɛɛ a hɛɛɔ tsɛ̃i kɛ kɛ̃ɛ̃. Ta buli katsɛmɛ ji kulaa mɛ tsuo pɛpɛɛpɛ.

⁹ Ligbi ko ɔ, Sudan no ko nɛ a tsɛɛ lɛ Zera ba tua Yuda. E kɛ ta buli ayɔ, kɛ ta zugba lɛ lafa etɛ ba tua ma a, nɛ a ba su Maresha tɔɔ.

¹⁰ Asa hia nɛ e kɛ lɛ ya kpe, nɛ tabo enyɔ ɔmɛ tsuo ya bua ngɛ Zefata kɔ̃ ɔ mi, ngɛ Maresha kasa nya.

¹¹ Asa fa kue ha Yawɛ e Mawu ɔ ke, “Yawɛ lee, mo nɛ o piɛɔ nihi nɛ a he wa, kɛ ni nɛmɛ nɛ a he wɛ tsuo a he! Yawɛ, wa Mawu, moo piɛ wa he koo! Ejakaa wa ngɔ wa hɛ ngɔ fɔ o nɔ. Wa ba ngɛ o biɛ mi, konɛ waa kɛ asafo babauu nɛ ɔ ba kpe. Yawɛ, mo ji wa Mawu; ko ha nɛ nɔmlɔ adesa nɛ ye o nɔ kunimi.”

¹² Benɛ Asa kɛ Yuda tabo ɔ ya tua Sudan tabo ɔ, Yawɛ ye Sudan tabo ɔ nɔ kunimi. A tu fo,

¹³ nɛ Asa kɛ e ta buli ɔmɛ nyɛɛ a se kɛ ya su Gerar tɔɔ. A gbe Sudan bi ɔmɛ basabasa nɛ a ti nɔ kake ngmelu po piɛ. Yawɛ kɛ e tabo ɔ pee mɛ butuu, nɛ Yuda tabo ɔ ha ta yibu ní babauu.

¹⁴ Enɛ ɔ se ɔ, a kpata mahi tsuo pɛpɛɛpɛ nɛ bɔle Gerar kɛ kpe ɔ a hɛ mi, ejakaa ni ɔmɛ ye Yawɛ gbeye. A ha ta yibu ní babauu ngɛ ma nɛ ɔmɛ tsuo a mi.

¹⁵ A ya tua lohwehi a lɛmi he komɛ hulɔ, nɛ a ha tohi kɛ afukpɔngɔhi babauu. Lɔ ɔ se ɔ, a kpale kɛ ba Yerusalem.