Kronika II, 12 - BAIBLO ALOO NGMAMI KLƆUKLƆU Ɔ

Egipt bi ba tua Yuda

¹ Benɛ Rehoboam matsɛ yemi ɔ ba da si ɔ, e kɛ e ma a tsuo kua Yawɛ mlaa a nɔ yemi.

² Enɛ ɔ he je ɔ, Yawɛ gbla e tue. Matsɛ Rehoboam yi nɔ jeha nɛ ji enuɔ ɔ mi ɔ, Egipt matsɛ, Shishak ba tua Yerusalem.

³ E kɛ ta zugba lɛ akpe kɛ e nya lafa enyɔ, kɛ okpɔngɔ ta buli akpe nyingmi ekpa, kɛ ta buli babauu nɛ a li a nya ba. Ta buli nɛ ɔmɛ a ti ni komɛ ji Libia bi, Suk bi, kɛ Sudan bi.

⁴ Shishak ngɔ mahi nɛ a fia gbogbo ngɔ wo a he ngɛ Yuda a, nɛ e ba su Yerusalem tɔɔ.

⁵ Kɛkɛ nɛ gbalɔ Shemaya ba Rehoboam, kɛ Yuda ganɔ ɔmɛ a ngɔ ngɛ Yerusalem. Blɔɔ Yuda ganɔ nɛ ɔmɛ ya ye Shishak gbeye, nɛ a tu fo kɛ je a ma amɛ a mi ba bua a he nya ngɛ Yerusalem. Shemaya de mɛ ke, “Bɔ nɛ Yawɛ de ji nɛ ɔ nɛ: ‘Nyɛ kua mi, lɔ ɔ he ɔ, imi hu i ngmɛɛ nyɛ he kɛ wo Shishak dɛ mi.’ ”

⁶ Matsɛ ɔ, kɛ Israel ganɔ ɔmɛ kplɛɛ kaa a pee yayami, nɛ a kɛ he si bami de ke, “Nɔ́ nɛ Yawɛ pee ɔ da.”

⁷ Benɛ Yawɛ na kaa a pia a he ɔ, e de Shemaya ekohu ke, “Akɛnɛ a pia a he he je ɔ, i be a hɛ mi kpatae; ma he a yi wami ngɛ blɔ ko nɔ. Ye mi mi fu Yerusalem, se i be Shishak nɔ gue kɛ gbla ma a tue.

⁸ Se kɛ̃ ɔ, a ma ba sɔmɔ Shishak, konɛ a na slɔɔto nɛ ngɛ ye sɔmɔmi, kɛ je ma amɛ a nɔ yeli ɔmɛ a sɔmɔmi ɔ mi.”

⁹ Egipt matsɛ, Shishak ba tua Yerusalem niinɛ, nɛ e ngɔ ma a. E muɔ nɔ́ tsuaa nɔ́ kɛ je, june nɛ ngɛ Yawɛ we ɔ, june nɛ ngɛ matsɛ we ɔ, kɛ sika tsu tsɛ̃ihi nɛ Matsɛ Salomo pee ɔ.

¹⁰ Matsɛ Rehoboam ha nɛ a pee akɔblee tsɛ̃ihi kɛ to sika tsu tsɛ̃i ɔmɛ a nane mi, nɛ e to mɛ ngɔ wo tsɔli nɛ hyɛɛ matsɛ we ɔ agbo nya buli ɔmɛ a nɔ ɔ a dɛ mi.

¹¹ Be tsuaa be nɛ matsɛ ɔ maa ya Yawɛ we ɔ mi ɔ, buli ɔmɛ hu maa hɛɛ tsɛ̃i ɔmɛ kɛ ba sɛ mi. Lɔ ɔ se ɔ, a maa kpale mɛ ya to ngɛ buli ɔmɛ a tsu ɔ mi ekohu.

¹² Akɛnɛ Rehoboam ba e he si he je ɔ, Yawɛ mi mi fumi ɔ tsuo bɛ e nɔ, nɛ a kpataa we e hɛ mi pɛsɛpɛsɛ. Niinɛ, pee se ɔ, níhi a mi ba hi ha Yuda ekohu.

Rehoboam matsɛ yemi he sane kuku

¹³ Rehoboam matsɛ yemi ɔ ba he si ngɛ Yerusalem. E ye jeha nyingmi eywiɛ kɛ kake benɛ e bɔni matsɛ yemi, nɛ e hi Yerusalem kɛ ye matsɛ jeha nyɔngma kɛ kpaago. Yerusalem ji ma nɛ Yawɛ hla kɛ je Israel zugba a tsuo nɔ kaa he nɛ a ja lɛ ngɛ. Rehoboam nyɛ biɛ ji Naama; e je Amon zugba a nɔ.

¹⁴ Rehoboam pee yayami, ejakaa e pee we Yawɛ suɔmi nya ní.

¹⁵ Rehoboam he sane kɛ je sisije kɛ ya si nyagbe ɔ, a ngma lɛ tsuo ngɛ gbalɔ Shemaya blema sanehi womi ɔ, kɛ gbalɔ Ido blema sanehi womi ɔ a mi. Daa nɛ ɔ, Rehoboam kɛ Yeroboam ngɛ ta nɔ.

¹⁶ Rehoboam ba gbo, nɛ a pu lɛ ngɛ David ma a mi; nɛ e binyumu Abiya ba ye tsɛ ngɛ e se.