Kronika II, 11 - BAIBLO ALOO NGMAMI KLƆUKLƆU Ɔ

Gbalɔ Shemaya

¹ Benɛ Rehoboam ya su Yerusalem ɔ, e hla ta buli nɛ a kɔni si wa akpe lafa kɛ nyingmi kpaanyɔ kɛ je Yuda kɛ Benyamin wɛtso ɔmɛ a mi. E to kaa e kɛ Israel omleyi je wɛtso ɔmɛ ma ya hwu, konɛ e kpɔ matsɛ yemi ɔ kɛ ba je e sisi ekohu.

² Se Yawɛ ngɔ sɛ gbi nɛ ɔ kɛ ha gbalɔ Shemaya ke,

³ “De Yuda matsɛ, Rehoboam, Salomo binyumu ɔ, kɛ Yuda wɛtso ɔ, Benyamin wɛtso ɔ, kɛ ma a nɛ piɛ ɔ ke,

⁴ ‘Bɔ nɛ Yawɛ de ji nɛ ɔ nɛ: nyɛɛ kɛ nyɛ nyɛmimɛ Israel bi ɔmɛ ko hwu ta. Nɔ tsuaa nɔ nɛ kpale kɛ ho e we mi ya; ejakaa nɔ́ nɛ ba nɛ ɔ, ye he ngɛ mi.’ ” A bu Yawɛ tue, nɛ a kpale kɛ ho a wehi a mi ya kaa bɔ nɛ Yawɛ fa mɛ ɔ.

Rehoboam fia gbogbo ngɔ wo ma amɛ a he

⁵ Rehoboam hi Yerusalem, nɛ e fia gbogbo ngɔ wo Yuda kɛ Benyamin ma nɛ ɔmɛ a he:

⁶ Betlehem, Etam, Tekoa,

⁷ Betzur, Soko, Adulam,

⁸ Gat, Maresha, Zif,

⁹ Adoraim, Lakish, Azeka,

¹⁰ Zora, Aiyalon, kɛ Hebron.

¹¹ Rehoboam fia gbogbo ngɔ wo ma nɛ ɔmɛ a he, nɛ e hla asafoatsɛmɛ kɛ to ma amɛ a nya. E to niye ní, oliv nu, kɛ wai ngɛ ma tsuaa ma mi.

¹² E to tsɛ̃ihi, kɛ akplɔhi hu ngɛ ma tsuaa ma mi. Bɔ nɛ e pee nɛ e kɛ ye Yuda kɛ Benyamin nɔ ji nɛ ɔ nɛ.

Osɔfohi kɛ Levi bi ba Yuda

¹³ Osɔfohi kɛ Levi bi tsuo nɛ ngɛ Israel zugba a nɔ ɔ je a hi he ɔmɛ kɛ ba Rehoboam ngɔ ngɛ Yuda.

¹⁴ Levi bi ɔmɛ je a kɔpe ɔmɛ, kɛ a zugba kpa amɛ a he, nɛ a ba Yuda kɛ Yerusalem, ejakaa Israel matsɛ, Yeroboam kɛ e se yeli ɔmɛ ngmɛ́ mɛ blɔ nɛ a tsu ní kaa Yawɛ we osɔfohi.

¹⁵ Yeroboam wo osɔfohi nɛ lɛ nitsɛ e suɔ, nɛ e ha nɛ a sɔmɔ ngɛ jami he ɔmɛ; a ja wɔhi, kɛ amagahi nɛ ngɛ kaa na bi nɛ lɛ Yeroboam ɔ puɛ.

¹⁶ Kɛ je Israel wɛtso ɔmɛ tsuo a mi ɔ, nihi nɛ suɔ kaa a ma ja Yawɛ, Israel Mawu ɔ kɛ a tsui tsuo ɔ, nyɛɛ Levi bi ɔmɛ a se kɛ ba Yerusalem. A ba Yerusalem konɛ a ba sã bɔ ha Yawɛ, a nɛmɛ a Mawu ɔ.

¹⁷ Nɔ́ nɛ ɔ wo Yuda matsɛ yemi ɔ mi he wami, nɛ ma a piɛ Salomo bi Rehoboam he jeha etɛ sɔuu; a kɛ lɛ hi si kaa bɔ nɛ a kɛ Matsɛ David, kɛ Matsɛ Salomo hi si ɔ.

Rehoboam weku

¹⁸ Rehoboam ngɔ Mahalat. Yo nɛ ɔ tsɛ ji David binyumu Yerimot, nɛ e nyɛ ji Eliab biyo Abihail, Ishai bibi ɔ.

¹⁹ Rehoboam kɛ e yo ɔ fɔ binyumuhi etɛ: Yeush, Shemaria, kɛ Zaham.

²⁰ Pee se ɔ, Rehoboam ngɔ Maaka, Absalom biyo ɔ, nɛ e kɛ lɛ fɔ binyumuhi eywiɛ: Abiya, Atai, Ziza, kɛ Shelomit.

²¹ Yihi tsuo nɛ Rehoboam ngɔ ji nyɔngma kɛ kpaanyɔ, kɛ plãhi hu nyingmi ekpa. E ngɛ binyumuhi nyingmi enyɔ kɛ kpaanyɔ, kɛ biyihi nyingmi ekpa. Nɔ nɛ e suɔ pe kulaa ngɛ e yi ɔmɛ kɛ e plã amɛ a kpɛti ji Absalom biyo Maaka.

²² Rehoboam ngɔ Maaka binyumu Abiya kɛ to ganɔ ngɛ e bimɛ ɔmɛ tsuo a nya, ejakaa e hla lɛ ngɔ to kaa nɔ nɛ ma ba ye matsɛ ngɛ e se.

²³ Rehoboam to blɔ nya kpakpa; e ha e binyumu ɔmɛ blɔ nya ngɛ mahi nɛ a fia gbogbo ngɔ wo a he ɔ tsuo a mi ngɛ Yuda kɛ Benyamin. E ha mɛ niye ní babauu, nɛ e hla yihi fuu ha mɛ nɛ a ngɔ.