Kronika II, 10 - BAIBLO ALOO NGMAMI KLƆUKLƆU Ɔ

Omleyi je wɛtso ɔmɛ tsɔ atuã

¹ Rehoboam pue nɔ kɛ ho Shekem ya, ejakaa Israel omleyi je ma kpekpemi ɔ tsuo ya bua a he nya ngɛ lejɛ ɔ konɛ a wo lɛ matsɛ.

² Benɛ Nebat binyumu Yeroboam nɛ tu fo kɛ je Matsɛ Salomo nya nɛ e ya laa a he ngɛ Egipt ɔ, nu nɔ́ nɛ ɔ he ɔ, e kpale kɛ ba we.

³ Ma a tsɔ ya kpee lɛ kɛ ba, nɛ e kɛ mɛ tsuo ba Rehoboam ngɔ ba de lɛ ke,

⁴ “O tsɛ Salomo wa wɔ yi mi wawɛɛ nitsɛ; tlomi nɛ e ngɔ kɛ tloo wɔ ɔ, tlomi ɔ jiɔ tsɔ. Ke o ma ha nɛ wa tlomi ɔ nɔ ma gbɔ bɔɔ, nɛ wa he mi maa jɔ wɔ ɔ, lɛɛ wa ma sɔmɔ mo.”

⁵ Rehoboam he nɔ ke, “Nyɛ ha mi ligbi etɛ nɛ ma kɛ susu sane nɛ ɔ he, konɛ nyɛɛ kpale kɛ ba.”

⁶ Kɛkɛ nɛ Matsɛ Rehoboam ya bi nikɔtɔma komɛ ga womi; ni nɛ ɔmɛ ji ni nɛmɛ nɛ kɛ e tsɛ Salomo hi si, nɛ a woɔ lɛ ga benɛ e ngɛ je mi ɔ. Rehoboam bi mɛ ke, “Mɛni heto po ma ya ha ma nɛ ɔ?”

⁷ A he nɔ ke, “Ke o ma ha ma nɛ ɔ a ní bimi ɔ heto kɛ gbi nɛ he jɔ, nɛ o maa kplɛɛ kaa o maa hɛɛ mɛ saminya a, a ma sɔmɔ mo daa.”

⁸ Se Rehoboam kua ga nɛ nikɔtɔma amɛ wo lɛ ɔ, nɛ e ho ya bi e juã nihewi nɛ e kɛ mɛ je nɔ ɔ mohu ga womi ke,

⁹ “Nimli nɛ ɔmɛ ba de mi ke ma ha nɛ a tlomi ɔ nɔ nɛ gbɔ bɔɔ ha mɛ. Mɛni ga nyɛ ngɛ mi woe? Kɛ ma ya de mɛ kɛɛ?”

¹⁰ Nihewi ɔmɛ de lɛ ke, “Bɔ nɛ o ma de mɛ ji nɛ ɔ nɛ: ‘Ye sekpɛ nguɛ kle pe tsaatsɛ mlɛ mi.

¹¹ Tsaatsɛ ngɔ tlomi nɛ jiɔ ngɔ tloo nyɛ; imi lɛɛ i kɛ tlomi ɔ eko ma pa piɛ he ha nyɛ. Tsaatsɛ ngɔ kpa gu kɛ fia nyɛ; imi lɛɛ i kɛ okpɔngɔ kpa maa fia nyɛ!’ ”

¹² Ligbi etɛ se ɔ, Yeroboam kɛ ma a tsuo kpale kɛ ba Matsɛ Rehoboam ngɔ kaa bɔ nɛ matsɛ ɔ de mɛ ke a pee ɔ.

¹³ Rehoboam kua nikɔtɔma amɛ a ga womi ɔ, nɛ e kɛ ma a tu munyu basabasa

¹⁴ kaa bɔ nɛ nihewi ɔmɛ wo lɛ ga ke e pee ɔ. E de mɛ ke, “Tsaatsɛ ngɔ tlomi nɛ jiɔ ngɔ tloo nyɛ, se imi lɛɛ i kɛ tlomi ɔ eko ma pa piɛ he ha nyɛ. Tsaatsɛ kɛ kpa gu fia nyɛ, se imi lɛɛ i kɛ okpɔngɔ kpa maa fia nyɛ!”

¹⁵ Matsɛ Rehoboam bui ma a tue fɛɛ! Se nɔ́ nɛ ɔ, Yawɛ he ngɛ mi. Yawɛ lɛ ha nɛ matsɛ ɔ pee ja a, bɔ nɛ pee nɛ si ko nɛ lɛ Yawɛ ɔ wo Nebat binyumu Yeroboam kɛ gu gbalɔ Ahiya nɛ je Shilo ɔ nɔ ɔ nɛ ba mi.

¹⁶ Benɛ Israel ma a tsuo na kaa matsɛ ɔ bui mɛ tue ɔ, a he ose, nɛ a de ke, “Mɛni blɔ nya wa ngɛ ngɛ David ngɔ? Wa be gbosi ní ngɛ Ishai binyumu ɔ ngɔ! Israel ma, nɔ tsuaa nɔ nɛ pue lɛ nitsɛ e we mi blɔ. Nyɛ ha nɛ Rehoboam nɛ ye tsɛ ngɛ David we ɔ mi!” Kɛkɛ nɛ Israel ma a tsɔ atuã,

¹⁷ nɛ Rehoboam ye tsɛ ngɛ Israel bi nɛ ngɛ Yuda ma amɛ a mi ɔ pɛ a nɔ.

¹⁸ Pee se ɔ, Matsɛ Rehoboam tsɔ Adoniram Israel bi ɔmɛ a ngɔ. Adoniram ji nɔ nɛ hyɛɛ nihi nɛ a nyɛɔ a nɔ kɛ tsuɔ ma ní tsumi kpakpataa a a nɔ. Se Israel ma a tsuo fia lɛ tɛ nɛ a gbe. Enɛ ɔ he je ɔ, Rehoboam he sɔ nɛ e ya sɛ e ta zugba lɛ ɔ mi, nɛ e tu fo kɛ ho Yerusalem ya.

¹⁹ Kɛ je jamɛ a be ɔ mi ɔ, Israel omleyi je ma a tsɔ atuã kɛ je David we ɔ he kɛ ba si mwɔnɛ ɔ.