Kronika I, 9 - BAIBLO ALOO NGMAMI KLƆUKLƆU Ɔ

Nihi nɛ a nuu mɛ nɛ a kpale mɛ kɛ ba ekohu

¹ A kane Israel ma a tsuo weku nya weku nya, nɛ a ngma kɛ wo Israel Matsɛmɛ ɔmɛ a Womi ɔ mi. Yuda bi ɔmɛ lɛɛ, a ba nuu mɛ kɛ ho Babilon ya, ejakaa a yi Mawu anɔkuale.

² Kekleekle nihi nɛ kpale kɛ ba mɛ nitsɛmɛ a zugba nɔ, kɛ a ma amɛ a mi ji nɛ ɔmɛ: Israel bi komɛ nɛ pi osɔfohi ji mɛ, osɔfo ɔmɛ, Levi bi ɔmɛ, kɛ Yawɛ we ɔ ní tsuli.

³ Yuda bi ɔmɛ, Benyamin bi ɔmɛ, Efraim bi ɔmɛ, kɛ Manase bi ɔmɛ ya hi Yerusalem.

^4-6 Yuda wɛtso ɔ nɛ ba hi Yerusalem ɔ, e mi bi a hiɛmi ji lafa kɛ nyingmi nɛɛ. Yuda binyumu Perez nina a nya dalɔ ji Utai. Utai tsɛ ji Amihud, nɛ e nɛ̃ ji Omri. Utai nɛmɛ kpahi ji Imri kɛ Bani. Yuda binyumu Shela nina a nya dalɔ ji Asaya; lɛ ji a we puɔ nya dalɔ. Yuda binyumu Zera nina a nya dalɔ ji Yeuel.

^7-8 Benyamin wɛtso ɔ mi bi nɛ ba hi Yerusalem ji Salu, Hasenua bi Hodavia bi Meshulam bi ɔ. Ibneya, Yeroham bi ɔ. Ela, Mikri bi Uzi bi ɔ. Meshulam, Ibneya bi Reuel bi Shefatia bi ɔ.

⁹ Benyamin wɛtso ɔ nɛ ba hi Yerusalem ɔ, e mi bi a hiɛmi ji 956; nɛ mɛ tsuo we puɔ nya dali ji mɛ.

Osɔfohi nɛ ba hi Yerusalem

^10-12 Osɔfo nɛ ɔmɛ ba hi Yerusalem: Yedaya, Yehoyarib, Yakin, kɛ Azaria, Hilkia bi ɔ (Lɛ ji tsɔlɔ nɔkɔtɔma ngɛ Yawɛ we ɔ) E nɛmɛ ji Meshulam, Zadok, Merayot, kɛ Ahitub Adaya, Yeroham bi ɔ E nɛmɛ ji Pashur, kɛ Malkiya Maasai, Adiel bi ɔ E nɛmɛ ji Yazera, Meshulam, Meshilemit, kɛ Imer.

¹³ We puɔ nya dali ji osɔfo nɛ ɔmɛ; a hiɛmi ji 1,760, nɛ a le Yawɛ we ɔ he ní tsumi ɔmɛ tsuo tsumi saminya.

Levi bi nɛ ba hi Yerusalem

^14-16 Levi bi nɛ ba hi Yerusalem ji: Shemaya, Hashub bi ɔ. E nɛmɛ ji Azrikam kɛ Hashabia nɛ a je Merari weku ɔ mi ɔ Bakbakar, Heresh, ke Galal Matania, Mika bi ɔ. E nɛmɛ ji Zikri kɛ Asaf Obadia, Shemaya bi ɔ. E nɛmɛ ji Galal kɛ Yedutun Berekia, Elkana bi Asa bi ɔ nɛ hi Netofa bi ɔmɛ a zugba a nɔ ɔ.

Yawɛ we ɔ he buli nɛ hi Yerusalem

¹⁷ Yawɛ we ɔ he buli nɛ ba hi Yerusalem ji Shalum, Akub, Talmon, kɛ Ahiman. Shalum ji a nya dalɔ.

¹⁸ Kɛ ba si jamɛ a be ɔ mi ɔ, nimli nɛ ɔmɛ ji ni nɛmɛ nɛ buɔ Matsɛ agbo ɔ nya ngɛ beleku je. Kekle ɔ lɛɛ mɛ nɛ a buɔ agbo ɔ nya kɛ yaa Levi bi ɔmɛ a si tomi he ɔ.

¹⁹ Kore bi Shalum, Ebiasaf bibi ɔ, e kɛ e nyɛmimɛ Kora bi ɔmɛ a ní tsumi ji a bu Yawɛ kpe he bo tsu ɔ sinya a nya kaa bɔ nɛ a nɛmɛ ɔmɛ pee benɛ a hyɛ Yawɛ ma sito he ɔ nɔ ɔ.

²⁰ Eleazar bi Finehas hyɛ a nɔ be ko mi. Yawɛ kɛ lɛ hi si!

²¹ Meshelemia bi Zakaria hu bu Yawɛ kpe he bo tsu ɔ sinya a nya.

²² Nyumuhi tsuo nɛ a hla nɛ a bu sinya amɛ a nya a, a hiɛmi ji 212. A kane mɛ weku nya weku nya ngɛ a kɔpe ɔmɛ a mi. Matsɛ David kɛ gbalɔ Samuel ji ni nɛmɛ nɛ to ní tsumi nɛ ɔmɛ kɛ wo a nɛmɛ ɔmɛ a dɛ.

²³ A kɛ a nina ji nihi nɛ a buu Yawɛ kpe he bo tsu ɔ agbo ɔmɛ a nya.

²⁴ Kpe he bo tsu agbo ɔmɛ peeɔ eywiɛ; agbo ɔ kake ngɛ beleku je, kake ngɛ bonyoku je, kake ngɛ omleyi je, kake hu ngɛ leneyi je; nɛ bulɔ nɔkɔtɔma kake ngɛ eko tsuaa eko nya.

²⁵ Agbo nya buli nɛ ɔmɛ a nyɛmimɛ nɛ ngɛ kɔpe ɔmɛ a mi ɔ ba kpeeɔ mɛ kɛ tsuɔ bumi ní tsumi nɛ ɔ otsiotsi. Ke kuu kake ba bu otsi, kɛkɛ kuu kake ba tsake mɛ.

²⁶ Agbo nya buli nikɔtɔma eywiɛ nɛ ɔmɛ ɔ, Levi bi ji mɛ, nɛ a dɛ mi nɛ a to ní tsumi ɔ kɛ wo. Mɛ nɔuu nɛ a hyɛɛ tsuhi kɛ níhi nɛ a to ngɛ a mi ɔ a nɔ ngɛ Yawɛ we ɔ.

²⁷ Blɔ nya nɛ a hɛɛ ɔ he je ɔ, Yawɛ we ɔ kasa nya a hii, ejakaa a ní tsumi ji a bu lejɛ ɔ, nɛ a bli agbo ɔmɛ daa mɔtu.

Levi bi kpa amɛ

²⁸ Levi bi ɔmɛ a ti ni komɛ hu a ní tsumi ji a hyɛ níhi nɛ a kɛ sɔmɔɔ ɔ a nɔ. Ke a maa ngɔ ní ɔmɛ kɛ je kpo ɔ, mɛ lɛ a maa kane; ke a kpale ní ɔmɛ kɛ ma si tomi hu, mɛ nɔuu jinihi nɛ maa kane ní ɔmɛ.

²⁹ Ni komɛ hu a ní tsumi ji a hyɛ tsu mi ní ɔmɛ, kɛ ní klɔuklɔu kpa amɛ, mamu ɔ, wai ɔ, oliv nu ɔ, tsopahi kɛ a he via a nɔ.

³⁰ Se tsopa kɛ e he via a futumi lɛɛ osɔfo ɔmɛ a ní tsumi ji lɔ ɔ.

³¹ Levi no ɔ nɛ a tsɛɛ lɛ Matitia, nɛ ji Shalum nɛ je Kora weku ɔ mi ɔ bitɛte ɔ, e ní tsumi ji e sã keeki nɛ a kɛ maa sã bɔ ɔ.

³² Kohat weku ɔ mi bi ɔmɛ ekomɛ lɛɛ a ní tsumi ji a sã abolo klɔuklɔu ɔ kɛ ya Yawɛ we ɔ daa Hejɔɔmi ligbi.

³³ Levi bi ɔmɛ a ti ni komɛ a ní tsumi ji a la ngɛ Yawɛ we ɔ. A nya dali ɔmɛ hii tsuhi nɛ ngɛ Yawɛ we ɔ ekomɛ a mi. Mɛɛ lɛɛ a ha we mɛ ní tsumi kpa ko, ejakaa a tsuɔ ní nyɔ kɛ pia.

³⁴ Nyumuhi nɛ a wo a ta nɛ ɔ ji Levi we puɔ nya dali, kɛ ma nikɔtɔmahi; nɛ a hi Yerusalem.

Matsɛ Saul nɛmɛ kɛ e nina

³⁵ Yeyel ji nɔ nɛ to Gibeon ma a sisi, nɛ e hi lejɛ ɔ. E yo biɛ ji Maaka,

³⁶ nɛ a tsɛɛ e bitɛte ɔ ke Abdon. E bimɛ kpa amɛ a biɛhi ji Zur, Kish, Baal, Ner, Nadab,

³⁷ Gedor, Ahio, Zakaria, kɛ Miklot

³⁸ nɛ ji Shima tsɛ. A nina hi Yerusalem ngɛ a nyɛmimɛ kpa amɛ a kasa nya.

³⁹ Ner bi ji Kish, nɛ Kish bi ji Matsɛ Saul. Saul ngɛ binyumuhi eywiɛ. A biɛhi ji Yonatan, Malkishua, Abinadab, kɛ Eshbaal.

⁴⁰ Yonatan bi ji Meribaal, nɛ Meribaal bi ji Mika.

⁴¹ Mika ngɛ binyumuhi eywiɛ. A biɛhi ji Piton, Melek, Tarea, kɛ Ahaz.

⁴² Ahaz bi ji Yara. Yara ngɛ binyumuhi etɛ: Alemet, Azmavet, kɛ Zimri. Zimri bi ji Moza.

⁴³ Moza bi ji Binea, Binea bi ji Refaya, Refaya bi ji Eleasa, nɛ Eleasa bi ji Azel.

⁴⁴ Azel ngɛ binyumuhi ekpa. A biɛhi ji Azrikam, Bokeru, Ishmael, Shearia, Obadia, kɛ Hanan.