Kronika I, 7 - BAIBLO ALOO NGMAMI KLƆUKLƆU Ɔ

Isakar nina

¹ Isakar ngɛ binyumuhi eywiɛ. A biɛhi ji Tola, Pua, Yashub, kɛ Shimron.

² Tola ngɛ binyumuhi nɛ a tsɛɛ mɛ Uzi, Refaya, Yeriel, Yamai, Ibsam, kɛ Shemuel. Ta buli katsɛmɛ, kɛ we puɔ nya dali ji mɛ ngɛ Tola weku ɔ mi. Matsɛ David yi nɔ ɔ, a hiɛmi ji akpe nyingmi enyɔ kɛ enyɔ kɛ e nya lafa ekpa.

³ Uzi binyumu ji Izrahia. Izrahia binyumuhi ji Mikael, Obadia, Yoel, kɛ Ishia. We puɔ nya dali ji mɛ ni enuɔ nɛ ɔmɛ tsuo.

⁴ A ngɔ yihi fuu nɛ a fɔ bimɛ hu babauu. Enɛ ɔ he je ɔ, a na ta buli akpe nyingmi etɛ kɛ ekpa kɛ je a kpɛti kɛ ha ta yami.

⁵ Nyumuhi nɛ a kane mɛ ngɛ Isakar weku ɔmɛ tsuo a mi ɔ, a hiɛmi ji akpe nyingmi kpaanyɔ kɛ kpaago; ta buli katsɛmɛ ji mɛ tsuo.

Benyamin kɛ Dan a nina

⁶ Benyamin ngɛ binyumuhi etɛ. A biɛhi ji Bela, Beker, kɛ Yediael.

⁷ Bela ngɛ binyumuhi nɛ a tsɛɛ mɛ Ezbon, Uzi, Uziel, Yerimot, kɛ Iri. We puɔ nya dali, kɛ ta buli katsɛmɛ ji mɛ tsuo ngɛ weku ɔ mi. A nina nɛ a kane ɔ, a hiɛmi ji akpe nyingmi enyɔ kɛ enyɔ kɛ e nya nyingmi etɛ kɛ eywiɛ.

⁸ Beker ngɛ binyumuhi nɛ a tsɛɛ mɛ Zemira, Yoash, Eliezer, Eleoenai, Omri, Yeremot, Abiya, Anatot, kɛ Alemet. Beker bimɛ ji mɛ tsuo.

⁹ Benɛ a kane a nina weku nya weku nya a, a hiɛmi ji katsɛmɛ akpe nyingmi enyɔ kɛ e nya lafa enyɔ.

¹⁰ Yediael bi ji Bilhan. Bilhan ngɛ binyumuhi kpaago. A biɛhi ji Yeush, Benyamin, Ehud, Kenaana, Zetan kɛ Tarshish, kɛ Ahishahar.

¹¹ We puɔ nya dali, kɛ ta buli katsɛmɛ ji mɛ tsuo ngɛ weku ɔ mi. Benɛ a kane a nina weku nya weku nya a, a hiɛmi ji ta buli katsɛmɛ akpe nyɔngma kɛ kpaago kɛ e nya lafa enyɔ.

¹² Ir bimɛ ji Shupim kɛ Hupim. Dan ngɛ binyumu nɛ a tsɛɛ lɛ Hushim.

Naftali nina

¹³ Naftali ngɛ binyumuhi nɛ a tsɛɛ mɛ Yaziel, Guni, Yezer, kɛ Shalum. Bilha nina ji mɛ.

Manase nina

¹⁴ Manase kɛ e plã a nɛ je Aram ɔ fɔ binyumuhi enyɔ; nɔ kake biɛ ji Asriel, nɛ nɔ kake hu biɛ ji Makir. Makir bi ji Gilead.

¹⁵ Makir ngɔ yo kɛ ha Hupim, nɛ e ngɔ kake hu kɛ ha Shupim. Makir nyɛmiyo ji Maaka. Makir binyumu enyɔne ɔ biɛ ji Zelofehad. Zelofehad lɛɛ biyihi sɔuu e fɔ.

¹⁶ Makir kɛ e yo, nɛ a tsɛɛ lɛ Maaka a fɔ binyumuhi enyɔ. A wo nɔ kake biɛ ke Peresh, nɛ a wo nɔ kake hu biɛ ke Sheresh. Peresh ngɛ binyumuhi nɛ a tsɛɛ mɛ Ulam kɛ Rakem,

¹⁷ nɛ Ulam binyumu ji Bedan. Makir bi Gilead, Manase bibi ɔ, e nina ji ni nɛ ɔmɛ tsuo.

¹⁸ Gilead nyɛmiyo Hamoleket fɔ binyumuhi etɛ. A biɛhi ji Ishod, Abiezer, kɛ Mahla.

¹⁹ (Shemida binyumuhi ji Ahian, Shekem, Likhi, kɛ Aniam.)

Efraim nina

²⁰ Efraim bi Shutela fɔ Bered, nɛ Bered fɔ Tahat, Tahat fɔ Eleada, Eleada fɔ Tahat, Tahat fɔ

²¹ Zabad, nɛ Zabad fɔ Shutela. Efraim ngɛ binyumu kpahi kɛ piɛ Shutela he; nɔ kake biɛ ji Ezer, nɛ nɔ kake hu biɛ ji Elead. Be ko mi ɔ, Ezer kɛ Elead ka kaa a maa ju Gat bi a na, nɛ Gat bi ɔmɛ gbe mɛ.

²² A tsɛ Efraim nyɛ ya ha mɛ ligbi babauu, nɛ e nyɛmimɛ ɔmɛ ba nɛ a ba jɔɔ e bua.

²³ Pee se ɔ, e kɛ e yo ɔ na bɔmi ekohu; yo ɔ ngɔ hɔ, nɛ e fɔ binyumu. A wo lɛ biɛ ke Beria, ngɛ haomi nɛ ba a nɔ ɔ he.

²⁴ Efraim ngɛ biyo nɛ a tsɛɛ lɛ Sheera. Lɛ ji nɔ nɛ to ma nɛ ɔmɛ a sisi: yiti je Bet Horon, dɔ si je Bet Horon, kɛ Uzen Sheera.

²⁵ Efraim ngɛ binyumu hulɔ; a tsɛɛ lɛ Refa. Refa fɔ Reshef, Reshef fɔ Tela, Tela fɔ Tahan, Tahan fɔ

²⁶ Ladan, Ladan fɔ Emihud, Amihud fɔ Elishama, Elishama fɔ

²⁷ Nun, Nun fɔ Yoshua.

²⁸ Zugba nɛ a nine su nɔ nɛ a hi nɔ ji Betel, kɛ kɔpehi nɛ bɔle ma a, kɛ ya si Naaran ngɛ beleku je, kɛ Gezer, kɛ kɔpehi nɛ bɔle ma a ngɛ bonyoku je. Shekem kɛ Aya, kɛ kɔpehi nɛ bɔle ma nɛ ɔmɛ hu ngɛ zugba a mi.

²⁹ Mahi, kɛ a he kɔpehi nɛ Manase nina a na ji Bet Shan, Taanak, Megido, kɛ Dor. Yakob binyumu Yosef nina ji nihi nɛ hi ma nɛ ɔmɛ tsuo a mi.

Asher nina

³⁰ Asher nina ji nɛ ɔ nɛ. Asher ngɛ binyumuhi eywiɛ: Imna, Ishva, Ishvi, kɛ Beria. E ngɛ biyo kake hulɔ nɛ a tsɛɛ lɛ Sera.

³¹ Beria ngɛ binyumuhi nɛ a tsɛɛ mɛ Heber, kɛ Malkiel. Malkiel ji nɔ nɛ to Birzait ma a sisi.

³² Heber ngɛ binyumuhi nɛ a tsɛɛ mɛ Yaflet, Shomer, kɛ Hotam; a ngɛ nyɛmiyo nɛ a tsɛɛ lɛ Shua.

³³ Yaflet hu ngɛ binyumuhi nɛ a tsɛɛ mɛ Pasak, Bimhal, kɛ Ashvat.

³⁴ Yaflet nyɛminyumu Shomer binyumuhi ji Roga, Yehuba, kɛ Aram.

³⁵ Shomer nyɛminyumu Hotam hu ngɛ binyumuhi nɛ a tsɛɛ mɛ Zofa, Imna, Shelesh, kɛ Amal.

³⁶ Zofa nina ji nɛ ɔmɛ nɛ: Sua, Harnefer, Shual, Beri, Imra,

³⁷ Bezer, Hod, Shama, Shilsha, Itran, kɛ Beera.

³⁸ Yeter nina ji nɛ ɔmɛ nɛ: Yefune, Pispa, kɛ Ara.

³⁹ Ula nina ji Ara, Haniel, kɛ Rizia.

⁴⁰ Asher nina ji nɛ ɔmɛ tsuo. We puɔ nya dali, ta buli katsɛmɛ, kɛ ganɔhi nɛ ngɛ biɛ ji mɛ tsuo. Nyumuhi akpe nyingmi enyɔ kɛ ekpa nɛ le ta hwumi piɛ Asher nina a he.