Kronika I, 5 - BAIBLO ALOO NGMAMI KLƆUKLƆU Ɔ

Ruben nina

^1-2 Ruben ji Yakob kekleekle bi. Se akɛnɛ e ble e tsɛ sa kaa e kɛ e tsɛ plã ya hwɔ si he je ɔ, a kpɔ e bitɛte blɔ nya a ngɛ e dɛ, nɛ a kɛ ha Yosef bimɛ ɔmɛ. Enɛ ɔ ha nɛ e biɛ be weku kɛ nina a womi ɔ mi kaa lɛ ji Yakob kekleekle bi. Se Yuda wɛtso ɔ mohu lɛ ba bɔ wawɛɛ pe wɛtso kpa amɛ tsuo, nɛ Yuda wɛtso ɔ hu mi nɛ ganɔ je kɛ ye tsɛ kɛ ha Israel ma a tsuo.

³ Ruben, Yakob bitɛte ɔ ngɛ binyumuhi nɛ a tsɛɛ mɛ Hanok, Palu, Hezron, kɛ Karmi.

^4-6 Yoel nina ji nɛ ɔmɛ nɛ. Yoel bi ji Shemaya. Shemaya bi ji Gog, Gog bi ji Shimei, Shimei bi ji Mika, Mika bi ji Reaya, Reaya bi ji Baal, nɛ Baal bi ji Beera. Asiria tatsɛ kpanaa a nɛ a tsɛɛ lɛ Tiglat Pileser ɔ ba nɛ e ba nu Beera kɛ ho. Beera nɛ ɔ, nɔkɔtɔma ji lɛ ngɛ Ruben wɛtso ɔ mi.

⁷ Beera nyɛmimɛ ɔmɛ nɛ a ngma a biɛ ngɛ Ruben wɛtso ɔ mi ɔ ji nɛ ɔmɛ nɛ. A nyatsɛmɛ ji Yeyel, Zakaria, kɛ

⁸ Bela (Yoel bi Shema bi Aza bi ɔ). A hi Aroer, nɛ a zugba a fɔ si kɛ je lejɛ ɔ kɛ ya si Nebo kɛ Baal Meon tɔɔ.

⁹ A ngɛ lohwe babauu ngɛ Gilead zugba a nɔ; lɔ ɔ he ɔ, a hi Gilead beleku je ɔ kɛ ya si nga a nɔ, kɛ Yufrate pa a nya.

¹⁰ Matsɛ Saul yi nɔ ɔ, Ruben bi ɔmɛ ya tua Hagri bi ɔmɛ, nɛ a kɛ mɛ hwu ta. A gbe Hagri bi ɔmɛ, nɛ a kpɔ a zugba a nɛ ngɛ Gilead beleku je ɔ, nɛ a hi lejɛ ɔ.

Gad nina

¹¹ Gad wɛtso ɔ hi Ruben wɛtso ɔ we omleyi je, kɛ je Bashan zugba a nɔ kɛ ya si Saleka ngɛ beleku je.

¹² Yoel ji weku nɛ a buu pe kulaa a nyatsɛ. Shafan ji weku nɛ nyɛɛ lɔ ɔ se ɔ a nyatsɛ. Bashan weku kpa komɛ hu a nyatsɛmɛ ji Yanai kɛ Shafat.

¹³ Wɛtso ɔ mi ni nɛmɛ nɛ piɛ ɔ, a je weku kpaago nɛ ɔmɛ a mi: Mikael weku, Meshulam weku, Sheba weku, Yorai weku, Yakan weku, Zia weku, kɛ Eber weku.

¹⁴ Ni nɛ ɔmɛ ji Huri bi Abihail nina, nɛ a nɛmɛ ji Abihail, Huri, Yaroa, Gilead, Mikael, Yeshishai, Yaroa, kɛ Buz.

¹⁵ Abdiel binyumu Ahi, Guni bibi ɔ ji weku nɛ ɔmɛ a nyatsɛ.

¹⁶ A hi Bashan zugba a nɔ, ngɛ Gilead, kɛ mahi nɛ bɔle Gilead, kɛ kɔpehi tsuo nɛ ngɛ Sharon.

¹⁷ A bua sane nɛ ɔmɛ tsuo a nya ngɛ Yuda matsɛ, Yotam, kɛ Israel matsɛ, Yeroboam a be ɔmɛ a mi.

Beleku je wɛtso ɔmɛ a tabo

¹⁸ Ta buli akpe nyingmi eywiɛ kɛ eywiɛ kɛ e nya lafa kpaago kɛ nyingmi ekpa ngɛ Ruben wɛtso ɔ, Gad wɛtso ɔ kɛ Manase wɛtso fa a a mi. A je blɔ tsɔse mɛ, nɛ a le tsɛ̃i, klaate, kɛ kɛ̃ɛ̃ a he ní tsumi saminya.

¹⁹ A kɛ Hagri bi, nɛ ji Yetur, Nafish, kɛ Nodab wɛtso ɔmɛ ya hwu ta.

²⁰ A ngɔ a hɛ ngɔ fɔ Mawu nɔ, nɛ a fa kue ha lɛ ke e piɛ a he. Mawu bu a kue fami ɔ tue, nɛ e ha nɛ a ye Hagri bi ɔmɛ, kɛ a he piɛli ɔmɛ a nɔ.

²¹ A nuu a he nyɛli ɔmɛ a we afukpɔngɔ akpe nyingmi enuɔ, jijɔ akpe lafa enyɔ kɛ nyingmi enuɔ, teji akpe enyɔ, kɛ ta buli akpe lafa kɛ ho.

²² A gbe he nyɛli ɔmɛ a ti nihi babauu, ejakaa ta a, Mawu nine ngɛ mi. Nɛ a hi jamɛ a zugba a nɔ hluu kɛ ya si be nɛ a je Asiria nɛ a ba nuu mɛ kɛ ho.

Manase wɛtso fa a

²³ Manase wɛtso fa a hi zugba a nɔ, kɛ je Bashan kɛ ya si Baal Hermon, Senir, kɛ Hermon yo ɔ he tɔɔ ngɛ omleyi je. A he hiɛ babauu.

²⁴ A weku ɔmɛ a nya dali ji Efer, Ishi, Eliel, Azriel, Yeremia, Hodavia, kɛ Yadiel. Ta buli katsɛmɛ, kɛ nikɔtɔmahi nɛ a le mɛ saminya ngɛ weku ɔmɛ a mi ji mɛ tsuo.

A nuu beleku je wɛtso ɔmɛ

²⁵ Se Manase wɛtso fa a ya yi a nɛmɛ a Mawu ɔ anɔkuale. A je a Mawu ɔ se, nɛ a ya ja je ma amɛ nɛ Mawu fie kɛ je a blɔ ɔ nɔ ɔ mohu a mawu ɔmɛ.

²⁶ Enɛ ɔ he je ɔ, Israel Mawu ɔ ha nɛ Asiria matsɛ, Pul (nɛ e biɛ kpa ji Tiglat Pileser a) ba tua a ma a. Tiglat Pileser nuu Ruben, Gad, kɛ Manase wɛtso fa a mi bi ɔmɛ kɛ ya to Hala, Habor, Hara, kɛ Gozan pa a nya. Nɛ lejɛ ɔ ji he nɛ a ngɛ kɛ ba si mwɔnɛ ɔ.