Kronika I, 4 - BAIBLO ALOO NGMAMI KLƆUKLƆU Ɔ

Yuda nina

¹ Yuda binyumuhi ji Perez, Hezron, Karmi, Hur, kɛ Shobal.

² Shobal bi ji Reaya, Reaya bi ji Yahat, Yahat bimɛ ji Ahumai, kɛ Lahad. Zorat bi a nɛmɛ ji mɛ.

^3-4 Kaleb yo Efrat bitɛte ji Hur. Hur nina ji ni nɛmɛ nɛ to Betlehem ma a sisi. Hur ngɛ binyumuhi nɛ a tsɛɛ mɛ Etam, Penuel, kɛ Ezer. Etam binyumuhi a biɛhi ji Yezreel, Ishma, kɛ Idbash. A ngɛ nyɛmiyo nɛ a tsɛɛ lɛ Hazelelponi. Penuel to Gedor ma a sisi, nɛ Ezer hu to Husha ma a sisi.

⁵ Ashur nɛ to Tekoa ma a sisi ɔ ngɛ yihi enyɔ; nɔ kake biɛ ji Hela, nɛ nɔ kake hu biɛ ji Naara.

⁶ Ashur kɛ Naara fɔ binyumuhi nɛ a tsɛɛ mɛ Ahuzam, Hefer, Temeni, kɛ Haahashtari.

⁷ Ashur kɛ Hela hu fɔ binyumuhi. A biɛhi ji Zeret, Izhar, kɛ Etnan.

⁸ Koz bimɛ ji Anub kɛ Zobeba; nɛ e nina ji weku ɔmɛ nɛ a kɛ Harum binyumu Aharhel biɛ wo mɛ ɔ nɛ.

⁹ Nyumu ko nɛ a tsɛɛ lɛ Yabez ɔ, lɛ ji nɔ nɛ a buu pe e nyɛmimɛ ɔmɛ tsuo. E nyɛ wo lɛ biɛ Yabez nɛ ɔ, ejakaa e fɔmi he ya wa wawɛɛ nitsɛ.

¹⁰ Se Yabez fa kue ha Israel Mawu ɔ ke, “Mawu, i kpa mo pɛɛ nɛ o gbaa mi, nɛ o ha mi zugba nɛ kle. O kɛ mi nɛ hi si, nɛ o je ní yayamihi nɛ maa pee haomi kɛ je ye blɔ mi.” Nɛ Mawu ha lɛ nɔ́ nɛ e bi lɛ ɔ.

Wɛtso kpa komɛ

¹¹ Shuha nyɛminyumu Kaleb bi ji Mehir, nɛ Mehir hu bi ji Eshton.

¹² Eshton ngɛ binyumuhi. A biɛhi ji Betrafa, Pasea, kɛ Tehina. Tehina ji nɔ nɛ to Nahash ma a sisi. Ni nɛ ɔmɛ a nina hi Reka.

¹³ Kenaz ngɛ binyumuhi nɛ a tsɛɛ mɛ Otniel, kɛ Seraya. Otniel bimɛ ji Hatat, kɛ Meonotai,

¹⁴ nɛ Meonotai bi ji Ofra. Seraya bi ji Yoab. Lɛ ji nɔ nɛ to ga ní tsuli a kɔ̃ ɔ sisi; ma mi bi ɔmɛ tsuo ga ní tsuli kpanakpanaa ji mɛ.

¹⁵ Yefune bi Kaleb ngɛ binyumuhi. A biɛhi ji Iru, Ela, kɛ Naam. Ela bi ji Kenaz.

¹⁶ Yehalelel ngɛ binyumuhi eywiɛ. A tsɛɛ mɛ Zif, Zifa, Tiria, kɛ Asarel.

^17-18 Ezra binyumu ɔmɛ a biɛhi ji Yeter, Mered, Efer, kɛ Yalon. Mered ngɔ Egipt matsɛ biyo nɛ a tsɛɛ lɛ Bitia, nɛ e kɛ lɛ fɔ Miriam. Mered kɛ Bitia fɔ binyumuhi hulɔ nɛ a tsɛɛ mɛ Shamai, kɛ Ishba. Ishba ji nɔ nɛ to Eshtemoa ma a sisi. Jehanɛ, Mered ngɔ yo ko hu nɛ je Yuda wɛtso ɔ mi, nɛ e kɛ lɛ fɔ binyumuhi nɛ a tsɛɛ mɛ Yered, Heber, kɛ Yekutiel. Yered ji nɔ nɛ to Gedor ma a sisi. Heber lɛɛ e to Soko ma a sisi, nɛ Yekutiel to Zanoa ma a sisi.

¹⁹ Hodia ngɔ Naham nyɛmiyo. A nina ji ni nɛmɛ nɛ to Garm kɛ Maakat weku ɔmɛ sisi. Garm weku ɔ hi Keila ma a mi, nɛ Maakat weku ɔ hi Eshtemoa ma a mi.

²⁰ Shimon ngɛ binyumuhi. A biɛhi ji Amnon, Rina, Benhanan, kɛ Tilon. Ishi hu ngɛ binyumuhi nɛ a tsɛɛ mɛ Zohet, kɛ Benzohet.

Shela nina

^21-22 Shela ji Yuda binyumu ɔmɛ a ti nɔ kake. E nina ji nɛ ɔmɛ nɛ: Er, nɔ nɛ to Leka ma a sisi ɔ, Laada, nɔ nɛ to Meresha ma a sisi ɔ, kploba loli a weku ɔ nɛ hi Bet Ashbea a, Yokim, Kozeba weku ɔmɛ, Yoash kɛ Saraf, nɔ nɛ ngɔ Moab yihi nɛ e ye tsɛ ngɛ Moab, nɛ lɔ ɔ se loko e ba hi Betlehem ɔ. (Blema lokoo sanehi ji nɛ ɔmɛ nɛ.)

²³ Nimli nɛ ɔmɛ ɔ, buɛ puɛli ji mɛ, nɛ a tsuɔ ní ha matsɛ ɔ. A hi Netaim kɛ Gedera ma amɛ a mi.

Simeon nina

²⁴ Simeon ngɛ binyumuhi nɛ a tsɛɛ mɛ Nemuel, Yamin, Yarib, Zera, kɛ Shaul.

²⁵ Shaul bi ji Shalum, e bibi ji Mibsam, nɛ e bibimibi ji Mishma.

²⁶ Mishma nina ji nɛ ɔmɛ nɛ: e bi Hamuel, e bibi Zakur, kɛ e bibimibi Shimei.

²⁷ Shimei ngɛ binyumuhi nyɔngma kɛ ekpa, kɛ biyihi ekpa. Se e nyɛmimɛ ɔmɛ a bimɛ pi, nɛ Simeon wɛtso ɔ hu bɔɛ kaa Yuda wɛtso ɔ.

²⁸ Kɛ ba si Matsɛ David be ɔ mi ɔ, mahi nɛ Simeon nina amɛ hi a mi ji Beersheba, Molada, Hazarshaul,

²⁹ Bilha, Ezem, Tolad,

³⁰ Betuel, Horma, Ziklag,

³¹ Bet Markabot, Hazarsusim, Betbiri, kɛ Shaaraim.

^32-33 A hi ma kpa enuɔ komɛ, kɛ kɔpehi nɛ bɔle mɛ ɔ hu a mi. Ma amɛ ji Etam, Ain, Rimon, Token, kɛ Ashan. Ni komɛ hu hi Baalat tɔɔ. Sanehi nɛ a ngma kɛ to nɛ kɔɔ a weku ɔmɛ a he, kɛ he slɔɔtoslɔɔtohi nɛ a hi ɔ ji nɛ ɔmɛ nɛ.

^34-38 A weku nikɔtɔmahi ji: Meshobab, Yamlek, Amazia bi Yosha, Yoel, Yehu (Asiel bi Seraya bi Yoshibia bi ɔ), Elioenai, Yaakoba, Yeshohaya, Asaya, Adiel, Yesimiel, Benaya, kɛ Ziza (Shemaya bi Shimri bi Yedaya bi Alon bi Shifi bi ɔ). Akɛnɛ a weku ɔmɛ a he ba bɔni hiɛmi he je ɔ,

³⁹ a hia nyɛɛmi kɛ gu bonyoku je kɛ ya si Gerar, nɛ a ya hla niye ní kɛ ha a lohwe ɔmɛ ngɛ kɔ̃ ɔ nɛ ngɛ lejɛ ɔ beleku je.

⁴⁰ A ya ná zugba ko nɛ fɔɔ si gbajaa ngɛ lejɛ ɔ. Zugba a hi saminya kɛ ha lohwe lɛmi; e nɔ jɔ, nɛ tue mi jɔmi hu ngɛ lejɛ ɔ. Ham nina ji ni nɛmɛ nɛ hi lejɛ ɔ sa a.

⁴¹ Yuda matsɛ, Hezekia yi nɔ ɔ, nihi nɛ a wo a biɛ ta nɛ ɔ ya Gerar nɛ a ya gbɛ lejɛ ɔ ma mi bi ɔmɛ a bo tsuhi, nɛ a kpata Meun bi ɔmɛ a hɛ mi. A fie ni ɔmɛ kɛ je ma a mi, nɛ a hi lejɛ ɔ, ejakaa niye ní ngɛ lejɛ ɔ kɛ ha a lohwe ɔmɛ.

⁴² Simeon wɛtso mi bi lafa enuɔ hu pue nɔ kɛ ho Edom ma a beleku je ya. Ishi binyumu ɔmɛ ji nikɔtɔmahi nɛ nyɛɛ a hɛ mi. A biɛhi ji Pelatia, Nearia, Refaya, kɛ Uziel.

⁴³ Benɛ a su lejɛ ɔ, a gbe Amalek bi ɔmɛ nɛ piɛ ɔ tsuo, nɛ a hi lejɛ ɔ. Nɛ lejɛ ɔ ji he nɛ a ngɛ kɛ ba si mwɔnɛ ɔ.