Kronika I, 27 - BAIBLO ALOO NGMAMI KLƆUKLƆU Ɔ

Ta kɛ ma ní tsumihi a he blɔ nya tomihi

¹ A dla Israel tabo ɔ kɛ wo asafo kuu nyɔngma kɛ enyɔ mi. Asafo kuu tsuaa asafo kuu mi ɔ, nyumuhi akpe nyingmi enyɔ kɛ eywiɛ ngɛ mi, kɛ a nya asafoatsɛmɛ, kɛ ma ní tsuli nikɔtɔmahi, kɛ a we bi. Daa jeha a, asafo kuu kake kɛ a we asafoatsɛ ya tsuɔ ní nyɔhiɔ kake. Asafo kuu ɔmɛ, kɛ a we asafoatsɛmɛ ɔmɛ ji nɛ ɔmɛ nɛ:

^2-3 Kekleekle asafo kuu ɔ nyatsɛ ji Zabdiel bi Yashobeam. E je Yuda wɛtso fa a nɛ a tsɛɛ Perez ɔ mi. E kɛ e we bi akpe nyingmi enyɔ kɛ eywiɛ tsuɔ ní ngɛ kekleekle nyɔhiɔ ɔ mi daa jeha.

⁴ Asafo kuu enyɔne ɔ nyatsɛ ji Dodai; Ahohi nina ji lɛ, nɛ e setsɔ ji Miklot. Dodai ngɛ nyumuhi akpe nyingmi enyɔ kɛ eywiɛ ngɛ e sisi, nɛ a tsuɔ ní ngɛ nyɔhiɔ enyɔne ɔ mi daa jeha.

^5-6 Asafo kuu etɛne ɔ nya dalɔ ji Benaya. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ etɛne ɔ mi daa jeha. Osɔfo nɔkɔtɔma Yehoyada bi ji lɛ, nɛ David ta buli katsɛmɛ nyingmi etɛ ɔmɛ a nyatsɛ ji lɛ. E bi Amizabad ba ye e se kaa e we asafo kuu ɔ nyatsɛ.

⁷ Asafo kuu eywiɛne ɔ nyatsɛ ji Yoab nyɛmi Asahel. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ eywiɛne ɔ mi daa jeha. Pee se ɔ, e bi Zabadia ba ye e se.

⁸ Asafo kuu enuɔne ɔ nyatsɛ ji Izhar nina Shamhut. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ enuɔne ɔ mi daa jeha.

⁹ Asafo kuu ekpane ɔ nyatsɛ ji Ikesh nɛ je Tekoa a e bi Ira. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ ekpane ɔ mi daa jeha.

¹⁰ Asafo kuu kpaagone ɔ nyatsɛ ji Helez nɛ je Pelon ngɛ Efraim ɔ. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ kpaagone ɔ mi daa jeha.

¹¹ Asafo kuu kpaanyɔne ɔ nyatsɛ ji Sibekai; Husha no ji lɛ, nɛ e je Yuda wɛtso fa a nɛ a tsɛɛ Zera a mi. Sibekai we bi akpe nyingmi enyɔ kɛ eywiɛ tsuɔ ní ngɛ nyɔhiɔ kpaanyɔne ɔ mi daa jeha.

¹² Asafo kuu nɛɛne ɔ nyatsɛ ji Abiezer. E je Anatot ngɛ Benyamin zugba a nɔ. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ nɛɛne ɔ mi daa jeha.

¹³ Asafo kuu nyɔngmane ɔ nyatsɛ ji Maharai. E je Netofa ngɛ Zera. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ nyɔngmane ɔ mi daa jeha.

¹⁴ Asafo kuu nyɔngma kɛ kakene ɔ nyatsɛ ji Benaya. E je Piraton ngɛ Efraim zugba a nɔ. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ nyɔngma kɛ kakene ɔ mi daa jeha.

¹⁵ Asafo kuu nyɔngma kɛ enyɔne ɔ nyatsɛ ji Heldai. E je Netofa, nɛ Otniel nina ji lɛ. E we bi akpe nyingmi enyɔ kɛ eywiɛ tsuɔ ní ngɛ nyɔhiɔ nyɔngma kɛ enyɔne ɔ mi daa jeha.

Israel wɛtsoyihi

^16-22 Israel wɛtsoyihi ji nɛ ɔmɛ nɛ: Wɛtso Wɛtsoyi Ruben Eliezer, Zikri bi ɔ Simeon Shefatia, Maaka bi ɔ Levi Hashabia, Kemuel bi ɔ Aaron Zadok Yuda Elihu, Matsɛ David nyɛmimɛ ɔmɛ a ti nɔ kake Isakar Omri, Mikael bi ɔ Zebulun Ishmaya, Obadia bi ɔ Naftali Yeremot, Azriel bi ɔ Efraim Hoshea, Azazia bi ɔ Manase fa a (Bonyoku je) Yoel, Pedaya bi ɔ Manase fa a (Beleku je) Ido, Zakaria bi ɔ Benyamin Yaasiel, Abner bi ɔ Dan Azarel, Yeroham bi ɔ.

Wɛtso Wɛtsoyi

²³ Matsɛ David kane we nihi nɛ a jeha sui nyingmi enyɔ, ejakaa Yawɛ wo si kaa e ma ha nɛ Israel bi ɔmɛ a he maa hiɛ kaa hiɔwe dodoehi.

²⁴ Yoab nɛ a tsɛɛ e nyɛ ke Zeruya a ba bɔni ma a kanemi, se e gbi nya. Enɛ ɔ he je ɔ, Mawu gbla Israel ma a tue, nɛ e ngmɛ́ nihi nɛ a kane mɛ ɔ a hiɛmi kɛ wui David yi nɔ sanehi womi ɔ mi.

Matsɛ weto níhi a nɔ hyɛli

^25-31 Matsɛ weto níhi a nɔ hyɛli ji nɛ ɔmɛ nɛ: Matsɛ nito hehi: Azmavet, Adiel bi ɔ Nito he kpahi ngɛ zugba a nɔ, ma amɛ, kɔpe ɔmɛ, kɛ mɔ ɔmɛ a mi: Yonatan, Uzia bi ɔ Ngmɔ nɔ ní tsuli kɛ huli: Ezri, Kelub bi ɔ Wai ngmɔ ɔmɛ: Shimei nɛ je Rama a Wai to he ɔmɛ: Zabdi nɛ je Shefam ɔ Oliv, kɛ tso kpahi nɛ ngɛ kpo ɔmɛ a nɔ ngɛ bonyoku je ɔ: Baal Hanan nɛ je Geder ɔ Nu to he ɔmɛ: Yoash Nahi nɛ a ngɛ lɛe ngɛ Sharon nga kplanaa a nɔ ɔ: Shirtai nɛ je Sharon ɔ Nahi nɛ a ngɛ lɛe ngɛ kɔ̃ ɔmɛ a mi ɔ: Shafat, Adlai bi ɔ Afukpɔngɔ ɔmɛ: Obil, Ishmael no ɔ Teji ɔmɛ: Yedeya nɛ je Meronot ɔ Jijɔ ɔmɛ, kɛ apletsi ɔmɛ: Yaziz, Hagri no ɔ.

David nitsɛ ga woli

³² Matsɛ David tsɛko Yonatan ji ga wolɔ. E ngɛ juɛmi saminya, nɛ e le womi mi hulɔ. E kɛ Hakmoni bi Yehiel ji ni nɛmɛ nɛ a hyɛɛ matsɛbimɛ ɔmɛ a ní kasemi nɔ.

³³ Ahitofel ji matsɛ ɔ ga wolɔ, nɛ Ark no ɔ nɛ a tsɛɛ lɛ Hushai ɔ ji matsɛ ɔ huɛ.

³⁴ Benɛ Ahitofel gbo ɔ, Benaya bi Yehoyada, kɛ Abiatar ba pee ga woli. Yoab ji matsɛ tabo ɔ nyatsɛ.