Kronika I, 25 - BAIBLO ALOO NGMAMI KLƆUKLƆU Ɔ

Yawɛ we ɔ lali

¹ Matsɛ David kɛ asafoatsɛmɛ ɔmɛ ngɔ ní tsumi pɔtɛɛ komɛ ngɔ ha Levi weku nɛ ɔmɛ: Asaf, Heman, kɛ Yedutun. A ní tsumi ji a gba, nɛ a fia saku kɛ ngmlɛ ngɔ to he. Nihi nɛ a hla a, kɛ ní tsumihi pɔtɛɛ nɛ a ngɔ wo a dɛ ɔ ji nɛ ɔmɛ nɛ:

² Asaf binyumu eywiɛ ɔmɛ: Mɛ ji Zakur, Yosef, Netania, kɛ Asharela. A nyatsɛ ji Asaf, nɛ be tsuaa be nɛ matsɛ ɔ ma fa lɛ ɔ, e gbaa.

³ Yedutun binyumu ekpa amɛ: Mɛ ji Gedalia, Zeri, Yeshaya, Shimei, Hashabia, kɛ Matitia. A tsɛ ji a nya dalɔ. Ke e fa mɛ ɔ, a gbaa nɛ a fiaa saku kɛ toɔ he. A laa kɛ jeɔ Yawɛ yi, nɛ a naa lɛ si.

⁴ Heman binyumu ɔmɛ: Mɛ ji Bukia, Matania, Uziel, Shebuel, Yerimot, Hanania, Hanani, Eliata, Gidalti, Romamti Ezer, Yoshbekasha, Maloti, Hotir, kɛ Mahaziot.

⁵ Mawu ha Heman, matsɛ gbalɔ ɔ binyumuhi nyɔngma kɛ eywiɛ, kɛ biyihi etɛ kaa bɔ nɛ e wo si ɔ, konɛ e kɛ wo Heman hɛ mi nyami.

⁶ Heman binyumu ɔmɛ tsuo fiaa ngmlɛ, kɛ saku kɛ sɔmɔɔ ngɛ Yawɛ we ɔ kaa bɔ nɛ a tsɛ ɔ faa mɛ ɔ. Asaf, Yedutun, kɛ Heman lɛɛ matsɛ ɔ nɛ faa mɛ loko a tsuɔ ní.

⁷ Nyumu nɛ ɔmɛ tsuo ji ni nɛmɛ nɛ le ní tsumi saminya; a nyɛmimɛ Levi bi ɔmɛ hu lali kpanakpanaa ji mɛ. Mɛ tsuo a hiɛmi ji 288.

⁸ A fɔ sɔ nɛ a kɛ dla ní tsumi ɔ. A hyɛ we nɔ ko hɛ mi, jokuɛ jio, nɔkɔtɔma jio, tsɔɔlɔ jio, kaselɔ jio.

^9-31 A dla nimli 288 nɛ ɔmɛ a mi ngɛ weku nya kɛ wo kuu nyingmi enyɔ kɛ eywiɛ mi. Nihi nyɔngma kɛ enyɔ ngɛ kuu tsuaa kuu mi, kɛ a nya dalɔ. Bɔ nɛ a to blɔ nya kɛ ha kuu ɔmɛ a ní tsumi kɛ je kekleekle kuu ɔ nɔ kɛ ya si nyagbe nɔ́ ɔ nɔ ji nɛ ɔ nɛ: 1. Yosef ngɛ Asaf weku ɔ mi 2. Gedalia 3. Zakur 4. Zeri 5. Netania 6. Bukia 7. Asharela 8. Yeshaya 9. Matania 10. Shimei 11. Uziel 12. Hashabia 13. Shebuel 14. Matitia 15. Yerimot 16. Hanania 17. Yoshbekasha 18. Hanani 19. Maloti 20. Eliata 21. Hotir 22. Gidalti 23. Mahaziot 24. Romamti Ezer.