Kronika I, 23 - BAIBLO ALOO NGMAMI KLƆUKLƆU Ɔ

¹ Benɛ David ba bwɔ kotokoto ɔ, e wo e binyumu Salomo matsɛ ngɛ Israel ma a nɔ.

Levi bi ɔmɛ a ní tsumi

² Matsɛ David ya kpee Israel ma nikɔtɔma amɛ, osɔfo ɔmɛ, kɛ Levi bi ɔmɛ tsuo kɛ ba.

³ David ha nɛ a kane nyumuhi tsuo nɛ ngɛ Levi bi ɔmɛ a kpɛti ɔ, kɛ je ni nɛmɛ nɛ ye jeha nyingmi etɛ kɛ yaa a, nɛ a ná nihi akpe nyingmi etɛ kɛ kpaanyɔ.

⁴ David dla ní tsumi nɛ ɔmɛ ngɔ ha mɛ: nihi akpe nyingmi enyɔ kɛ eywiɛ maa hyɛ Yawɛ we ɔ mami ní tsumi ɔ nɔ, akpe ekpa ma tsu ma ní nɛ a maa kojo,

⁵ akpe eywiɛ maa bu agbo nya, nɛ akpe eywiɛ hu maa fia saku ɔmɛ nɛ matsɛ ɔ pee ɔ kɛ je Yawɛ yi.

⁶ David dla Levi bi ɔmɛ kɛ wo kuu etɛ mi kaa bɔ nɛ we puɔ nya amɛ ngɛ ɔ: Gershon bi, Kohat bi, kɛ Merari bi.

⁷ Gershon binyumuhi ji Ladan kɛ Shimei.

⁸ Ladan ngɛ binyumuhi etɛ. A biɛhi ji Yehiel, Zetam, kɛ Yoel.

⁹ A nɛ̃ ji Ladan, nɛ weku nya dali ji mɛ. Shimei ngɛ binyumuhi etɛ. Mɛ ji Shelomot, Haziel, kɛ Haran.

^10-11 Shimei ngɛ binyumuhi eywiɛ. Nɔkɔtɔma a ji Yahat. Enyɔne ɔ ji Zina, etɛne ɔ ji Yeush, nɛ eywiɛne ɔ ji Beria. Yeush kɛ Beria a bimɛ pi; enɛ ɔ he je ɔ, a kane mɛ kaa weku kake.

¹² Kohat ngɛ binyumuhi eywiɛ. A biɛhi ji Amram, Izhar, Hebron, kɛ Uziel.

¹³ Kohat bitɛte nɛ ji Amram ɔ lɛɛ e binyumuhi ji Aaron kɛ Mose. Aaron kɛ e nina lɛɛ a hla mɛ ngɔ to, nɛ a ngɔ Yawɛ we ɔ ní klɔuklɔu ɔmɛ ngɔ wo a dɛ. A ní tsumi ji a sã tsopa kɛ e he via kɛ ha Yawɛ, á sɔmɔ Yawɛ, nɛ á kɛ Yawɛ biɛ nɛ gbaa ma a.

¹⁴ Mawu nɔmlɔ Mose binyumu ɔmɛ lɛɛ a bu mɛ ngɔ piɛ Levi bi ɔmɛ a he.

¹⁵ Mose binyumuhi ji Gershom kɛ Eliezer.

¹⁶ Gershom binyumu ɔmɛ a nya dalɔ ji Shebuel.

¹⁷ Eliezer ngɛ binyumu kake pɛ; a tsɛɛ lɛ Rehabia. Se Rehabia lɛɛ e ngɛ nina babauu.

¹⁸ Kohat binyumu enyɔne ɔ nɛ a tsɛɛ lɛ Izhar a ngɛ binyumu kake. E biɛ ji Shelomit, nɛ lɛ ji we puɔ nya dalɔ.

¹⁹ Kohat binyumu etɛne ɔ nɛ a tsɛɛ lɛ Hebron ɔ, ngɛ binyumuhi eywiɛ. A biɛhi ji Yeria, Amaria, Yehaziel, kɛ Yekameam.

²⁰ Kohat binyumu eywiɛne ɔ nɛ a tsɛɛ lɛ Uziel ɔ ngɛ binyumuhi enyɔ: a tsɛɛ nɔ kake ke Mika, nɛ a tsɛɛ nɔ kake hu ke Ishia.

²¹ Merari binyumuhi ji Mahli kɛ Mushi. Mahli hu binyumuhi ji Eleazar kɛ Kish.

²² Se Eleazar lɛɛ e na we binyumu nɛ e kɛ gbo; biyihi sɔuu nɛ e fɔ. E biyi ɔmɛ gba a nyɛmimɛ ɔmɛ nɛ ji Kish binyumu ɔmɛ.

²³ Merari binyumu enyɔne ɔ nɛ a tsɛɛ lɛ Mushi ɔ ngɛ binyumuhi etɛ: Mahli, Eder, kɛ Yeremot.

²⁴ Levi nina nɛ a kane nɛ a ngma a biɛ weku nya weku nya, kɛ we puɔ nya we puɔ nya ji nɛ ɔmɛ nɛ. Nɔ tsuaa nɔ nɛ ye kɛ je jeha nyingmi enyɔ kɛ yaa a, ya tsuɔ ní ngɛ Yawɛ we ɔ.

²⁵ David de ke, “Yawɛ, Israel Mawu ɔ ha e ma a tue mi jɔmi, nɛ lɛ nitsɛ e maa hi Yerusalem daa.

²⁶ Enɛ ɔ he je ɔ, e pa hia we hu kaa Levi bi ɔmɛ nɛ a hɛɛ kpe he bo tsu ɔ, kɛ ní ɔmɛ tsuo nɛ a kɛ jaa Mawu ɔ.”

²⁷ Kaa bɔ nɛ David de ngɛ e nyagbe munyu ɔmɛ a mi ɔ, Levi no tsuaa Levi no nɛ ye kɛ je jeha nyingmi enyɔ kɛ yaa pɛ, a kane lɛ.

²⁸ Ke a ngma a biɛ se ɔ, a ní tsumi ji a wa osɔfo ɔmɛ nɛ ji Aaron nina a nɛ a kɛ sɔmɔ ngɛ Yawɛ we ɔ. A blɔ nya ji kaa a hyɛ kue ɔmɛ, kɛ tsu ɔmɛ a nɔ, nɛ a tsukɔ ní klɔuklɔu ɔmɛ tsuo a he.

²⁹ A ní tsumi hu ji kaa a hyɛ ní nɛ ɔmɛ a nɔ: abolo ɔ nɛ a kɛ maa Mawu hɛ mi ɔ, ma nɛ a kɛ sãã niye ní bɔ ɔ, abolo kplolo ɔ, keeki nɛ a sã a, kɛ mamu bukɔbukɔ ɔ nɛ a futu mi nu ɔ. Jehanɛ, Levi bi ɔmɛ a ní tsumi ji kaa sɛnihi, kɛ ní kpahi nɛ a kɛ ngmɛɛ, loo a kɛ susuu níhi nɛ a kɛ ba sãã bɔ ɔ, a hyɛ kaa jamɛ a ní ɔmɛ ngɛ pɛpɛɛpɛ lo.

³⁰ Mɛ ji ni nɛmɛ nɛ a ma la kɛ je Yawɛ yi, nɛ a maa wo e biɛ ɔ hɛ mi nyami daa mɔtu kɛ gbɔkuɛ,

³¹ kɛ be tsuaa be nɛ a maa sã sami bɔ ha Yawɛ ɔ, Hejɔɔmi ligbi jio, Nyɔhiɔhe nyami be jio, nyami be kpa amɛ jio. Ke be su kɛ ha ní tsumi nɛ ɔmɛ a tsumi ɔ, Levi bi abɔ nɛ hia kaa a ya tsu ní ɔ, yaa nɛ a ya tsuɔ ngɛ mlaa a nya.

³² A ní tsumi hu ji kaa a hyɛ kpe he bo tsu ɔ, kɛ Yawɛ we ɔ a nɔ, nɛ a piɛ a nyɛmimɛ osɔfo ɔmɛ, nɛ ji Aaron bimɛ ɔmɛ a he kɛ sɔmɔ ngɛ Yawɛ we ɔ.