Kronika I, 22 - BAIBLO ALOO NGMAMI KLƆUKLƆU Ɔ

¹ Kɛkɛ nɛ David de ke, “Hiɛmɛ nɛ ɔ nɛ Yawɛ Mawu we ɔ, kɛ bɔ sami la tɛ ɔ nɛ Israel ma a maa sã sami bɔhi ngɛ nɔ ɔ maa hi ɔ nɛ.”

A dla ní kɛ ha Yawɛ we ɔ mami

² Matsɛ David fa, nɛ a kpee nibwɔhi tsuo nɛ ngɛ Israel zugba a nɔ ɔ kɛ ba, nɛ e ha mɛ ní tsumi. Ni komɛ kó tɛ nɛ a kɛ maa ma Yawɛ we ɔ.

³ David bua dade babauu nya nɛ a kɛ maa pee plɛɛko kɛ sá kɛ ha agbo ɔmɛ, kɛ akɔblee hu babauu nɛ a li nya.

⁴ E ha nɛ Tiro kɛ Sidon bi hu ba ha lɛ seda tsohi babauu nitsɛ.

⁵ David de e he ke, “We ɔ nɛ ye bi Salomo ma ba ma ha Yawɛ ɔ, e sa nɛ e kle agbo, nɛ́ e he biɛ ngɛ je ɔ mi tsuo. Se ye bi ɔ, jokuɛyo ji lɛ, nɛ e hɛ mi fa we lolo. Lɔ ɔ he ɔ, e hia kaa imi nitsɛ ma bɔni níhi a nya buami kɛ to nyɔngloo.” Enɛ ɔ he je ɔ, David bua tsu mami níhi babauu nya loko e gbo.

⁶ E tsɛ e bi Salomo, nɛ e fa lɛ ke e po we ha Yawɛ Israel Mawu ɔ.

⁷ David de lɛ ke, “Ye bi, jinɛ imi nitsɛ i hla kaa ma po we kɛ wo Yawɛ, ye Mawu ɔ hɛ mi nyami.

⁸ Se Yawɛ de mi ke i pue muɔ si tsɔ, nɛ jehanɛ se hu, i hwu ta babauu tsɔ. Enɛ ɔ he je ɔ, Yawɛ ke e be hae nɛ ma po we ha lɛ.

⁹ Se kɛ̃ ɔ, e ha mi si womi ko. E de mi ke, ‘A ma fɔ binyumu ko ha mo, nɛ e maa ye matsɛ ngɛ tue mi jɔmi mi; ejakaa ma ha e kɛ e he nyɛli tsuo nɛ bɔle lɛ ɔ maa hi si ngɛ tue mi jɔmi mi. A ma tsɛ e biɛ ke Salomo, ejakaa e yi nɔ ɔ, ma ha Israel he jɔmi, kɛ tue mi jɔmi.

¹⁰ Lɛ ji nɔ nɛ ma ba po we ha mi. E maa pee ye bi, nɛ imi hu ma pee e tsɛ. E nina maa ye matsɛ ngɛ Israel kɛ maa ya neneene.’ ”

¹¹ David ya nɔ, nɛ e de ke, “Lɔ ɔ he ɔ, ye bi, Yawɛ, o Mawu ɔ kɛ mo nɛ hi si. Yawɛ, o Mawu ɔ nɛ ye e si womi ɔ nɔ, konɛ o nyɛ nɛ o po we ha lɛ.

¹² Yawɛ, o Mawu ɔ nɛ ha mo nile kɛ juɛmi, bɔ nɛ pee nɛ o ye Israel nɔ ngɛ e mlaa a nya.

¹³ Mlaa amɛ tsuo nɛ Yawɛ wo Israel ma a kɛ gu Mose nɔ ɔ, ke o ye a nɔ ɔ, e maa hi ha mo. O he nɛ wa nɛ o pee kã; koo ye nɔ́ ko nɔ́ ko gbeye!

¹⁴ I gbo dengme bua ní nɛ ɔmɛ a nya kɛ to, konɛ a kɛ po Yawɛ we ɔ: sika tsu nɛ jiɔmi ji tɔn akpe etɛ kɛ lafa eywiɛ, sika hiɔ nɛ jiɔmi ji tɔn akpe nyingmi etɛ kɛ eywiɛ, akɔblee kɛ dade babauu nɛ a li nya, tso, kɛ tɛ. Bɔɔ mɔde nɛ mo hu o na eko kɛ piɛ he.

¹⁵ O ngɛ ní tsuli babauu, tɛ gbali, tso kɛ tɛ a he ni tsuli, ga ní tsuli slɔɔtoslɔɔtohi babauu nɛ tsuɔ

¹⁶ sika tsu, sika hiɔ, akɔblee, kɛ dade a he ní. Lɔ ɔ he ɔ, moo hyɛ nɛ o je ní tsumi ɔ sisi; nɛ Yawɛ nɛ piɛ o he.”

¹⁷ David fa Israel ma nimeli ɔmɛ tsuo ke a piɛ Salomo he.

¹⁸ E de mɛ ke, “Yawɛ, nyɛ Mawu ɔ kɛ nyɛ nɛ hi si, nɛ e ha nyɛ tue mi jɔmi ngɛ he tsuaa he nɛ nyɛ ngɛ ɔ. Nihi nɛ ngɛ zugba nɛ ɔ nɔ loko wa ba hiɛ ɔ, Yawɛ ngɔ mɛ tsuo ngɔ wo ye dɛ mi. I ye a nɔ kunimi, nɛ amlɔ nɛ ɔ, a ba pee nyɛɛ kɛ Yawɛ nyɛ sɔmɔli.

¹⁹ Lɔ ɔ he ɔ, nyɛ sɔmɔ Yawɛ, nyɛ Mawu ɔ kɛ nyɛ tsui tsuo, kɛ nyɛ juɛmi tsuo. Nyɛɛ je Yawɛ we ɔ mami sisi, konɛ nyɛɛ ngɔ Yawɛ somi daka a, kɛ ní klɔuklɔu kpa amɛ tsuo nɛ a kɛ sɔmɔɔ lɛ ɔ kɛ ba ma mi.”