Kronika I, 20 - BAIBLO ALOO NGMAMI KLƆUKLƆU Ɔ

David ye Raba bi a nɔ

¹ Gbo, be mi nɛ matsɛmɛ ɔmɛ pɔɔ ta gbami ɔ, Yoab ngɔ tabo ɔ tsuo kɛ ya tua Amon zugba a. Jamɛ a be ɔ mi ɔ, Matsɛ David lɛɛ e ngɛ Yerusalem. A ya sa ma a nɛ a tsɛɛ Raba a yi; a tua ma a, nɛ a kpata ma a hɛ mi.

² Amon bi ɔmɛ a we amaga a nɛ a tsɛɛ lɛ Milkon ɔ ngɛ sika tsu jlasi ko; jlasi ɔ jiimi maa pee sika tsu kilo nyingmi etɛ kɛ eywiɛ, nɛ tɛ nɛ he jua wa ngɛ mi. David je tɛ nɛ ɔ kɛ wo lɛ nitsɛ e jlasi ɔ mi. Jehanɛ, e ngɔ ta yibu ní babauu nitsɛ hulɔ kɛ je ma a mi.

³ Ma a mi bi ɔmɛ nitsɛmɛ lɛɛ David muɔ mɛ kɛ ba nɛ e ba ha mɛ ní tsumi kpakpataa komɛ nɛ a kɛ sau, dade kpakplaa kɛ gbiɛ slɔɔtohi tsuɔ. David pee Amon bi ɔmɛ a ma kpa amɛ tsuo kikɛ nɛ ɔ nɔuu. Lɔ ɔ se ɔ, e kɛ e we bi ɔmɛ kpale kɛ ba Yerusalem.

Tahi nɛ a kɛ Filisti oblai komɛ hwu

⁴ Enɛ ɔ se ɔ, Israel bi ɔmɛ, kɛ Filisti bi ɔmɛ hwu ta ekohu ngɛ Gezer. Benɛ a ngɛ ta nɛ ɔ hwue ɔ, Israel no ko nɛ a tsɛɛ lɛ Sibekai gbe Filisti oblai ko nɛ a tsɛɛ lɛ Sipai. Nɛ Filisti bi ɔmɛ ha yi.

⁵ Israel bi ɔmɛ kɛ Filisti bi ɔmɛ hwu ta ekohu. Ngɛ ta nɛ ɔ mi ɔ, Yair binyumu Elhanan gbe Goliat nɛ je Gat ɔ nyɛminyumu Lami. Lami we akplɔ ɔ nya tso ti kaa bo lolɔ gba tso.

⁶ Jehanɛ, a hwu ta ekohu ngɛ Gat, he nɛ nyumu oblai ko ngɛ ɔ. Nyumu nɛ ɔ, nine nguɛ ekpatsɛ kɛ nane nguɛ ekpatsɛ ji lɛ. Blema oblai ɔmɛ a nina ji lɛ.

⁷ Nyumu nɛ ɔ bɔ Israel ma a ahlua, nɛ Yonatan nɛ ji David nyɛminyumu Shama binyumu ɔ gbe lɛ.

⁸ Ni etɛ nɛ ɔmɛ nɛ David kɛ e we bi ɔmɛ gbe ɔ, Gat oblai ɔmɛ a nina ji mɛ.