Kronika I, 2 - BAIBLO ALOO NGMAMI KLƆUKLƆU Ɔ

Yuda nina

^1-2 Yakob binyumu ɔmɛ a biɛhi ji Ruben, Simeon, Levi, Yuda, Isakar, Zebulun, Dan, Yosef, Benyamin, Naftali, Gad, kɛ Asher.

³ Yuda bimɛ ɔmɛ tsuo ɔ, mɛ ni enuɔ. E kɛ e yo Batshua, Kanaan no ɔ fɔ binyumuhi etɛ. Mɛ ji Er, Onan, kɛ Shela. Er bitɛte ɔ, nɔmlɔ yayami ji lɛ; enɛ ɔ he je ɔ, Yawɛ gbe lɛ.

⁴ Yuda kɛ e nganyɛ Tamar hu fɔ binyumuhi enyɔ, Perez, kɛ Zera.

⁵ Perez bimɛ ji Hezron, kɛ Hamul.

⁶ E nyɛminyumu Zera ngɛ bimɛ enuɔ. Mɛ ji Zimri, Etan, Heman, Kalkol, kɛ Darda.

⁷ Karmi bi Akan, Zera nina a kake ya ngɔ níhi nɛ a tsu he ngɔ ha Mawu ɔ eko; nɛ nɔ́ nɛ ɔ kɛ amanehlu ba Israel ma a nɔ.

⁸ Etan ngɛ binyumu nɛ a tsɛɛ lɛ Azaria.

Matsɛ David weku kpa

⁹ Hezron bimɛ ji Yerameel, Ram, kɛ Kaleb.

¹⁰ Bɔ nɛ weku kpa a ngɛ ha kɛ je Ram nɔ kɛ ya si Ishai nɔ ji nɛ ɔ nɛ: Ram, Aminadab, Nashon (Nashon nɛ ɔ, ganɔ ji lɛ ngɛ Yuda wɛtso ɔ mi)

¹¹ Salmon, Boaz,

¹² Obed, kɛ Ishai.

^13-15 Ishai ngɛ binyumuhi kpaago. A biɛhi ngɛ a wami nya ji Eliab, Abinadab, Shama, Netanel, Radai, Ozem, kɛ David.

¹⁶ A nyɛmimɛ yihi ji Zeruya, kɛ Abigail. Ishai biyo Zeruya ngɛ binyumuhi etɛ: Abishai, Yoab, kɛ Asahel.

¹⁷ Abigail gba Yeter nɛ ji Ishmael nina a, nɛ e kɛ lɛ fɔ binyumu nɛ a tsɛɛ lɛ Amasa.

Hezron nina

¹⁸ Hezron binyumu Kaleb ngɔ Azuba. E kɛ lɛ fɔ biyo, nɛ a wo lɛ biɛ ke Yeriot. Binyumuhi nɛ Azuba fɔ ji Yesher, Shobab, kɛ Ardon.

¹⁹ Benɛ Azuba gbo ɔ, Kaleb ngɔ Efrat, nɛ e kɛ lɛ fɔ binyumu nɛ a tsɛɛ lɛ Hur.

²⁰ Hur bi ji Uri, nɛ e bibi ji Bezalel.

²¹ Benɛ Hezron ye jeha nyingmi ekpa a, e ngɔ Makir biyo ɔ nɛ ji Gilead nyɛmiyo ɔ. E kɛ lɛ fɔ binyumu, nɛ a wo lɛ biɛ ke Segub.

²² Segub bi ji Yair. Yair ngɛ ma nyingmi enyɔ kɛ etɛ ngɛ Gilead zugba a nɔ.

²³ Se Geshur kɛ Aram ya ngɔ ma nyingmi ekpa ngɛ lejɛ ɔ; Yair kɛ Kenat kɔpe ɔmɛ, kɛ mahi nɛ bɔle mɛ ɔ hu piɛ he. Nihi tsuo nɛ ngɛ lejɛ ɔ, Makir nina ji mɛ. Makir ji nɔ nɛ po Gilead ma a.

²⁴ Benɛ Hezron gbo ɔ, e binyumu Kaleb ngɔ e tsɛ Hezron yalɔyo ɔ nɛ a tsɛɛ lɛ Efrat ɔ. E kɛ lɛ fɔ binyumu, nɛ a wo lɛ biɛ ke Ashur. Ashur ji nɔ nɛ po Tekoa ma a.

Yerameel nina

²⁵ Yerameel, Hezron bitɛte ɔ ngɛ binyumuhi nɛ a tsɛɛ mɛ Ram, e kekleekle bi ɔ, Buna, Oren, Ozem, kɛ Ahiya.

^26-27 Ram binyumuhi ji Maaz, Yamin, kɛ Eker. Yerameel ngɛ yo kpa nɛ a tsɛɛ lɛ Atara. E kɛ lɛ fɔ binyumu, nɛ a wo lɛ biɛ ke Onam.

²⁸ Onam binyumuhi ji Shamai, kɛ Yuda. Shamai hu ngɛ binyumuhi nɛ a tsɛɛ mɛ Nadab kɛ Abishur.

²⁹ Abishur ngɔ yo ko nɛ a tsɛɛ lɛ Abihail, nɛ e kɛ lɛ fɔ binyumuhi nɛ a tsɛɛ mɛ Aban, kɛ Molid.

³⁰ Abishur nyɛminyumu Nadab ngɛ binyumuhi nɛ a tsɛɛ mɛ Seled, kɛ Apaim; se Seled na we bi nɛ e kɛ gbo.

³¹ Apaim bi ji Ishi, Ishi bi ji Sheshan, nɛ Sheshan bi ji Ahlai.

³² Yada, Shamai nyɛminyumu ɔ, e binyumuhi ji Yeter, kɛ Yonatan; se Yeter na we bi nɛ e kɛ gbo.

³³ Yonatan ngɛ binyumuhi enyɔ, Pelet kɛ Zaza. Yerameel nina ji ni nɛ ɔmɛ tsuo.

³⁴ Sheshan be binyumu; biyihi pɛ lɛ ngɛ e dɛ. E ngɛ tsɔlɔ ko nɛ je Egipt, nɛ a tsɛɛ lɛ Yarha;

³⁵ nɛ e kɛ e biyo kake ha lɛ. Yarha kɛ Sheshan biyo nɛ ɔ fɔ binyumu, nɛ a wo lɛ biɛ ke Atai.

³⁶ Bɔ nɛ weku kpa a ngɛ ha kɛ je Atai nɔ kɛ ya si Elishama nɔ ji nɛ ɔ nɛ: Atai, Natan, Zabad,

³⁷ Eflal, Obed,

³⁸ Yehu, Azaria,

³⁹ Helez, Eleasa,

⁴⁰ Sismai, Shalum,

⁴¹ Yekamia, kɛ Elishama.

Kaleb nina kpahi

⁴² Yerameel nyɛminyumu Kaleb bitɛte ji Mesha. Mesha bi ji Zif, Zif bi ji Maresha, nɛ Maresha bi ji Hebron.

⁴³ Hebron ngɛ binyumuhi nɛ a tsɛɛ mɛ Kora, Tapua, Rekem, kɛ Shema.

⁴⁴ Shema bi ji Raham, nɛ Raham bi ji Yorkeam. Shema nyɛminyumu Rekem bi ji Shamai.

⁴⁵ Shamai bi ji Maon, nɛ Maon bi ji Betzur.

⁴⁶ Kaleb ngɛ plã ko nɛ a tsɛɛ lɛ Efa. Binyumuhi nɛ Efa fɔ ha lɛ ji Haran, Moza, kɛ Gazez. Haran hu ngɛ binyumu nɛ a tsɛɛ lɛ Gazez.

⁴⁷ (Nyumu ko nɛ a tsɛɛ lɛ Yadai ɔ hu ngɛ binyumuhi. A biɛhi ji Regem, Yotam, Geshan, Pelet, Efa, kɛ Shaaf.)

⁴⁸ Kaleb ngɛ plã kpa ko hu nɛ a tsɛɛ lɛ Maaka. Binyumuhi nɛ e kɛ lɛ hu fɔ ɔ, a biɛhi ji Sheber kɛ Tirhana.

⁴⁹ Pee se ɔ, Maaka fɔ binyumu nɛ ɔmɛ kɛ piɛ a he: Shaaf kɛ Sheva. Shaaf ji nɔ nɛ to Madmana ma a sisi, nɛ Sheva hu to Makbena kɛ Gibea ma amɛ sisi. Kaleb ngɛ biyo hulɔ; a tsɛɛ lɛ Aksa.

⁵⁰ Ni nɛ ɔmɛ hu Kaleb nina ji mɛ. Kaleb kɛ e yo Efrat ɔ, a bitɛte ji Hur. Hur bi Shobal ji nɔ nɛ to Kiriat Yearim ma a sisi.

⁵¹ E bi Salma ji nɔ nɛ to Betlehem ma a sisi. E bi hu ji Haref, nɔ nɛ to Betgader ma a sisi ɔ.

⁵² Shobal nɛ to Kiriat Yearim ma a sisi ɔ, e nina ji Haroe bi, kɛ Menuhot ma a fa.

⁵³ E nina hu ji Kiriat Yearim weku nɛ ɔmɛ: Itri, Put, Shumat, kɛ Mishrait. (Zora kɛ Eshtaol weku ɔmɛ piɛ ni nɛ ɔmɛ a he.)

⁵⁴ Salma nɛ to Betlehem ma a sisi ɔ, e nina ji Netofat bi, Atrot Bet Yoab bi, kɛ Zori bi. Zori bi nɛ ɔmɛ ji Manahat weku ɔ fa.

⁵⁵ Womi ngmali a nina nɛ hi Yabez ji nɛ ɔmɛ nɛ: Tirat bi, Shimeat bi, kɛ Sukat bi. Mɛ ji Ken bi nɛ a kɛ Rekab bi ha a sibi gba.