Kronika I, 19 - BAIBLO ALOO NGMAMI KLƆUKLƆU Ɔ

David ye Amon bi ɔmɛ kɛ Siria bi ɔmɛ a nɔ

^1-2 Pee se ɔ, Amon bi ɔmɛ a matsɛ nɛ a tsɛɛ lɛ Nahash ɔ ba gbo; nɛ e binyumu Hanun ba ye e se. David de ke, “I kɛ Hanun maa hi si saminya kaa nɔ kɛ e huɛ, ejakaa e tsɛ Nahash kɛ mi hi si saminya.” Lɔ ɔ he ɔ, David tsɔ ya ha Hanun lakpoo, benɛ Nahash gbo ɔ. Se benɛ David tsɔli ɔmɛ ya su Amon nɛ a ya nga matsɛ ɔ,

³ Amon ganɔ ɔmɛ bi a matsɛ ɔ ke, “O susu kaa David tsɔ nihi ba ha mo lakpoo konɛ e kɛ wo o tsɛ hɛ mi nyami lo? Dɛbida! Ni ɔmɛ nɛ David tsɔ kɛ ba o ngɔ ɔ, pe a ba nɛ a ba slaa ma a, nɛ a kɛ kpa níhi si loko a ba tua wɔ.”

⁴ Enɛ ɔ he je ɔ, Hanun nuu David tsɔli ɔmɛ, nɛ e sɛ a kpɛni nɛ e hia a tade ɔmɛ a mi ngɛ kpɛti kɛ ba su a mlɛ mi, nɛ e ngmɛɛ a he nɛ a ho.

⁵ Benɛ David nu nɔ́ nɛ ba a, e tsɔ ya de mɛ ke a mlɛ ngɛ Yeriko kɛ yaa si a kpɛni ɔmɛ maa hɛ loko a ba, ejakaa e ngɛ mɛ zo pee kaa a maa kpale kɛ ba bɔ nɛ a ngɛ ɔ.

⁶ Benɛ Matsɛ Hanun kɛ Amon bi ɔmɛ na kaa a ya hla munyu ngɛ David he ɔ, a tsɔ nɛ a kɛ sika hiɔ kilo nyingmi akpe etɛ kɛ eywiɛya bɔ ta zugba lɛhi, kɛ ta buli apaa kɛ je Mesopotamia yiti je, kɛ Maaka kɛ Zoba ngɛ Siria.

⁷ Ta zugba lɛ akpe nyingmi etɛ kɛ enyɔ ɔmɛ nɛ a ya bɔ apaa a, kɛ Maaka matsɛ tabo ɔ ba bua a he nya ngɛ Medeba kasa nya. Amon bi ɔmɛ hu je a ma amɛ tsuo a mi kɛ ba, nɛ a mia kɛ ha ta hwumi.

⁸ Benɛ David nu he ɔ, e wo Yoab kɛ Israel tabo ɔ tsuo blɔ nɛ a kɛ mɛ ya kpe.

⁹ Amon bi ɔmɛ hia nɛ a ya gba ta ngɛ a ma nguaa a nɛ a tsɛɛ Raba a we agbo ɔ nya. Matsɛmɛ ɔmɛ nɛ je ngmlaa ha mɛ ɔ, mɛɛ lɛɛ a gba ta kɛ gu nga a nɔ je.

¹⁰ Yoab na bɔ nɛ he nyɛli ɔmɛ gba ta a ha, kaa a ma lɛ tuami kɛ je hɛ mi kɛ se blɔ tsuo. Lɔ ɔ he ɔ, e hla Israel ta buli komɛ nɛ a kɔni si wa, nɛ e ngɔ mɛ ngɔ kpee Siria bi ɔmɛ.

¹¹ Ni nɛmɛ nɛ piɛ ɔ, e ngɔ mɛ ngɔ wo e nyɛminyumu Abishai dɛ mi, konɛ mɛ hu a kɛ Amon bi ɔmɛ nɛ ya kpe.

¹² Yoab de lɛ ke, “Ke e ba mi kaa i ya nyɛ we Siria bi ɔmɛ ɔ, lɛɛ o ba nɛ o ba piɛ ye he. Se ke Amon bi ɔmɛ ngɛ mo gbee ɔ, lɛɛ imi hu ma ba piɛ o he.

¹³ Moo pee kã, nɛ o ha nɛ waa da si kaa nyumuhi kɛ ha wa nyɛmimɛ ɔmɛ, kɛ wa Mawu ɔ ma amɛ. Nɔ́ nɛ sa Yawɛ hɛ mi ɔ, e pee.”

¹⁴ Yoab kɛ e we bi ɔmɛ hia kɛ ba na Siria bi ɔmɛ konɛ a kɛ mɛ ba hwu, se Siria bi ɔmɛ tu fo.

¹⁵ Benɛ Amon bi ɔmɛ na kaa Siria bi ɔmɛ tu fo ɔ, mɛ hu a tu fo kɛ je ta nɛ a kɛ Abishai ngɛ hwue ɔ nya kɛ ho ma a mi ya. Lɔ ɔ he ɔ, Yoab kpa Amon bi ɔmɛ a se nyɛɛmi, nɛ e kpale kɛ ho Yerusalem ya.

¹⁶ Siria bi ɔmɛ na kaa Israel bi ɔmɛ ye a nɔ; lɔ ɔ he ɔ, a ya ngɔ Siria tabohi nɛ ngɛ Yufrate pa a beleku je ɔ kɛ ba. A kɛ tabo nɛ ɔmɛ ba ha Zoba matsɛ, Hadadezer we asafoatsɛ ɔ nɛ a tsɛɛ lɛ Shobak ɔ; nɛ e nyɛɛ a hɛ mi kɛ hwu ta.

¹⁷ Benɛ David nu he ɔ, e bua Israel tabo ɔmɛ tsuo a nya. E kɛ mɛ po Yordan pa a, nɛ e kɛ mɛ gba ta kɛ kpee Siria bi ɔmɛ. Benɛ a bɔni ta a hwumi ɔ,

¹⁸ Israel bi ɔmɛ wo Siria bi ɔmɛ fo, nɛ David kɛ e we bi ɔmɛ gbe Siria bi ɔmɛ a ta zugba lɛ ta buli lafa kpaago, kɛ ta buli nane nyɛɛli akpe nyingmi eywiɛ. Siria asafoatsɛ Shobak ɔ hu a gbe lɛ.

¹⁹ Benɛ matsɛmɛ ɔmɛ nɛ ngɛ Hadadezer sɔmɔe ɔ ná le kaa Israel bi ɔmɛ ye a nɔ ɔ, a kɛ David ya kpata, nɛ a sɔmɔ lɛ. Enɛ ɔ he je ɔ, Siria bi ɔmɛ ye gbeye, nɛ a ya ji ngmlaa ha we Amon bi ɔmɛ hu.