Kronika I, 18 - BAIBLO ALOO NGMAMI KLƆUKLƆU Ɔ

David ye kunimi ngɛ tahi a mi

¹ Pee se ɔ, Matsɛ David ya tua Filisti bi ɔmɛ ekohu, nɛ e ye a nɔ. E ngɔ a ma nguaa a nɛ a tsɛɛ Gat ɔ, kɛ kɔpehi nɛ bɔle ma a.

² E ye Moab bi ɔmɛ hu a nɔ; Moab bi ɔmɛ ba pee e sɔmɔli, nɛ a tsuɔ to kɛ haa lɛ.

³ Jehanɛ, David ye Zoba matsɛ, Hadadezer nɔ kunimi ngɛ Hamat zugba a kasa nya; ejakaa Hadadezer ngɛ hlae nɛ e ya ngɔ zugba a nɛ ngɛ Yufrate pa a he ɔ.

⁴ David nuu Hadadezer ta zugba lɛ akpe, okpɔngɔ ta buli akpe kpaago, kɛ ta buli nɛ nyɛɛɔ nane akpe nyingmi enyɔ. David poo okpɔngɔ ɔmɛ tsuo a nane se pani, nɛ e si ta zugba lɛ lafa nya okpɔngɔhi pɛ.

⁵ Benɛ Siria bi ɔmɛ nɛ ngɛ Damasko ɔ ya, konɛ a ya je ngmlaa ha Zoba matsɛ, Hadadezer ɔ, David ya tua mɛ, nɛ e gbe a ti nihi akpe nyingmi enyɔ kɛ enyɔ.

⁶ David to ta buli a hi hehi ngɛ Damasko. Siria bi ɔmɛ ba plɛ pee e sɔmɔli, nɛ a tsuɔ tó kɛ haa lɛ. Yawɛ haa nɛ David yeɔ kunimi ngɛ he tsuaa he.

⁷ David kpɔ sika tsu tsɛ̃i ɔmɛ nɛ Hadadezer tsɔli ɔmɛ hɛɛ ɔ ngɛ a dɛ, nɛ e kɛ ho Yerusalem ya.

⁸ Jehanɛ hu, David ya muɔ akɔblee babauu nitsɛ ngɛ Tibhat kɛ Kun nɛ ji mahi nɛ Hadadezer yeɔ a nɔ ɔ. (Pee se ɔ, Matsɛ Salomo sile akɔblee nɛ ɔ kɛ pee akɔblee nyu nɔ́ ɔ, titima amɛ, kɛ akɔblee ní kpa amɛ).

⁹ Benɛ Hamat matsɛ, Toi nu kaa David ye Hadadezer tabo ɔ tsuo nɔ ɔ,

¹⁰ e tsɔ e binyumu Yoram ya nga David, nɛ e ha lɛ ayekoo kaa e kɛ Hadadezer hwu ta nɛ e ye e nɔ kunimi, ejakaa lɛ Toi ɔ nitsɛ e kɛ Hadadezer hwu ta hluu. Yoram hɛɛ nike ní slɔɔtoslɔɔtohi nɛ a kɛ sika tsu, sika hiɔ, kɛ akɔblee pee kɛ ya ha David.

¹¹ Matsɛ David gbaa ní nɛ ɔmɛ a nɔ kɛ ha Yawɛ kaa bɔ nɛ e pee sika hiɔ kɛ sika tsu nɛ e kpɔ ngɛ je mahi nɛ e ye a nɔ ɔ a dɛ ɔ. Je ma nɛ ɔmɛ ji Edom, Moab, Amon, Filistia, kɛ Amalek.

¹² Enɛ ɔ se ɔ, Abishai, nɛ a tsɛɛ e nyɛ biɛ ke Zeruya a, ya tua Moab bi ɔmɛ ngɛ Ngo kɔ̃ ɔ mi, nɛ e gbe a ti nihi akpe nyɔngma kɛ kpaanyɔ.

¹³ Abishai to ta buli a hi hehi ngɛ Edom, nɛ ni ɔmɛ nɛ ngɛ lejɛ ɔ ba plɛ pee Matsɛ David sɔmɔli. Yawɛ haa nɛ David yeɔ kunimi ngɛ he tsuaa he.

¹⁴ David ye Israel ma a tsuo nɔ matsɛ; e ye dami sane kɛ ha nɔ tsuaa nɔ ngɛ Mawu mlaa a nya.

¹⁵ Zeruya binyumu Yoab ji tatsɛ nɔkɔtɔma; Ahilud binyumu Yehoshafat ji sanehi ngmalɔ;

¹⁶ Ahitub binyumu Zadok kɛ Abiatar binyumu Ahimelek ji osɔfohi, nɛ Seraya ji David nitsɛ e pɛdiyo.

¹⁷ Yehoyada binyumu Benaya ji Keret kɛ Pelet bi ɔmɛ a nyatsɛ. Ni nɛ ɔmɛ ji David we bi a tabo. David binyumu ɔmɛ hɛɛ blɔ nya nguanguahi ngɛ matsɛ tsɔli ɔmɛ a kpɛti.