Kronika I, 17 - BAIBLO ALOO NGMAMI KLƆUKLƆU Ɔ

Natan kɛ sɛ gbi ba ha David

¹ Jehanɛ lɛɛ David ba je matsɛ we ɔ mi. Ligbi ko ɔ, e tsɔ ya tsɛ gbalɔ Natan kɛ ba, nɛ e de lɛ ke, “Hyɛ kaa imi i ngɛ we nɛ a ma kɛ seda mi, be mi nɛ Yawɛ somi daka a lɛɛ e ngɛ bo tsu mi!”

² Natan de matsɛ ɔ ke, “Nɔ́ tsuaa nɔ́ nɛ o to kaa o maa pee ɔ, moo pee; ejakaa Mawu kɛ mo ngɛ.”

³ Se jamɛ a nyɔ ɔ mi ɔ, Mawu de Natan ke,

⁴ “Yaa nɛ o ya de ye tsɔlɔ David ke, Yawɛ ke, ‘Pi mo ji nɔ nɛ maa po we ha mi nɛ ma hi mi.’

⁵ Kɛ je ligbi ɔ nɛ i ya kpɔ Israel ma a kɛ je Egipt kɛ ba si mwɔnɛ ligbi nɛ ɔ, i hí we ko mi hyɛ; bo tsu ji we nɛ i hii mi ngɛ he tsuaa he nɛ i yaa.

⁶ Kɛ je be nɛ i kɛ Israel ma a bɔni si kpami nɛ ɔ, i bi we ma nya dali nɛ i hla nɛ a hyɛ ye ma a nɔ ɔ a ti nɔ ko hyɛ ke, ‘Mɛni he je o kɛ seda ma we tsu ha mi?’

⁷ “Lɔ ɔ he ɔ, mo de ye tsɔlɔ David ke, imi Yawɛ Tabohiatsɛ ɔ, i ngɛ lɛ dee ke, ‘Imi nɛ i ya ngɔ mo kɛ je to lɛmi he ngɛ nga a nɔ, nɛ i ba pee mo ye ma, Israel ganɔ.

⁸ Imi lɛ i kɛ mo nyɛɛ kɛ ya kɛ ba, nɛ imi nɔuu lɛ i kpata o he nyɛli ɔmɛ tsuo a hɛ mi ngɛ o blɔ ɔ nɔ. Ma ha nɛ o ma na biɛ kaa nimli nguanguahi nɛ ngɛ zugba a nɔ ɔ a ti nɔ ko.

^9-10 Ma hla hi he ko ha ye ma Israel, nɛ ma to mɛ si ngɛ lejɛ ɔ, he nɛ nɔ ko be a nya dooe ngɛ hu. Kɛ je be nɛ i hla ma nya dali nɛ a hyɛ ye ma Israel nɔ ɔ, nɔ́ sɔuu a ngɛ nae ngɛ nimli yayamihi a dɛ mi. Se enɛ ɔ tsuo se maa po. Ma kpata o he nyɛli ɔmɛ tsuo a hɛ mi. Jehanɛ i ngɛ si woe kaa imi Yawɛ, ma bɔ we ha mo.

¹¹ Ke o gbo, nɛ a ya dla mo ngɛ o nɛmɛ ɔmɛ a hwɔ he ɔ, ma wo mo nitsɛ o mi mi bimɛ ɔmɛ a ti nɔ kake matsɛ ngɛ o se, nɛ ma ha e matsɛ yemi ɔ maa ya nɔ.

¹² Lɛ ji nɔ nɛ ma ba po we ha mi, nɛ ma ha e matsɛ yemi ɔ maa hi si kɛ maa ya neneene.

¹³ Ma pee e tsɛ, nɛ e maa pee ye bi. Ye suɔmi nɛ ngɛ daa a, i be hae nɛ jamɛ a suɔmi ɔ se nɛ po ngɛ e nɔ kaa bɔ nɛ i pee nɔ nɛ nyɛɛ o hɛ mi ɔ.

¹⁴ Ma ngɔ lɛ ngɔ to ye ma a nya, nɛ e maa ye matsɛ ngɛ Israel nɔ kɛ maa ya neneene. E matsɛ yemi ɔ se be poe gblegbleegble.’ ”

¹⁵ Natan ya bɔ David níhi nɛ a de lɛ, kɛ nɔ́ nɛ a je ngɔ tsɔɔ lɛ ɔ.

David sina sɔlemi

¹⁶ Enɛ ɔ se ɔ, Matsɛ David ya sɛ bo tsu ɔ mi, nɛ e ya hi si ngɛ Yawɛ hɛ mi, nɛ e sɔle ke, “Yawɛ Mawu, mɛnɔ ji mi, nɛ ye we ɔ hu mɛnɔmɛ ji mɛ, loko o hɛɛ mi kɛ ba su he nɛ i ngɛ nɛ ɔ?

¹⁷ Se Mawu lee, enɛ ɔ lɛɛ e ji nɔ́ ko bɔbɔyoo kɛkɛ ngɛ o hɛ mi. O wo si kaa o tsɔlɔ ɔ nina maa hiɛ babauu hwɔɔ se, nɛ mo Yawɛ Mawu, o je sisi bɔni mi hɛɛmi momo kaa nɔmlɔ ngua.

¹⁸ Lɛɛ mɛni pa ngɛ imi David, ye nya nɛ ma de mo? O le imi, o tsɔlɔ ɔ saminya, se kɛ̃ ɔ, o wo ye hɛ mi nyami.

¹⁹ Yawɛ, imi o tsɔlɔ ɔ, ye he lɛ o je o tsui mi nɛ o tsu ní tsumi kpetekpleenyɛ nɛ ɔ, kaa o ha nɛ i le ní nguangua nɛ ɔmɛ tsuo pɛpɛɛpɛ.

²⁰ Yawɛ, nɔ ko be nɛ kɛ mo sɔ; wa le kɛ je blema, kaa mo pɛ ji Mawu.

²¹ Ma ko be zugba nɛ ɔ nɔ nɛ pe o ma Israel nɛ mo Mawu o ya kpɔ kɛ je nyɔguɛ si himi mi kɛ ba pee mo nitsɛ o ma a. Ní nguanguahi, kɛ nyakpɛ níhi nɛ o tsu ha o ma a, ha o biɛ pɛ kɛ kpe je ɔ mi tsuo. Benɛ o ma a nɛ o kpɔ kɛ je Egipt ɔ hia kɛ ma a, o fie je ma kpa amɛ kɛ je a blɔ mi.

²² O ngɔ o ma, Israel ngɔ pee mo nitsɛ o ma kɛ yaa neneene. Nɛ mo, Yawɛ o ba pee a Mawu.

²³ “Lɔ ɔ he ɔ, Yawɛ, si nɛ o wo nɛ kɔɔ o tsɔlɔ ɔ, kɛ e nina a he ɔ, moo ye nɔ daa, nɛ o pee kaa bɔ nɛ o de ɔ.

²⁴ O biɛ maa jije kɛ maa ya neneene, nɛ nihi ma de ke, ‘Yawɛ Tabohiatsɛ ɔ ji Israel Mawu’. Nɛ o ma ha imi, o tsɔlɔ David, ye matsɛ yemi ɔ maa hi si kɛ maa ya neneene.

²⁵ Ye Mawu, o je ní nɛ ɔmɛ tsuo ngɔ tsɔɔ imi, o tsɔlɔ ɔ, nɛ o de mi ke o maa bɔ we ha mi; lɔ ɔ he nɛ ye nɔ gbagba te, nɛ i ngɛ kue nɛ ɔ fae ha mo ɔ nɛ.

²⁶ Yawɛ lee, Mawu ji mo; mo ji nɔ nɛ o wo mi nɔ́ kpakpa nɛ ɔ he si.

²⁷ Lɔ ɔ he ɔ, i kpa mo pɛɛ nɛ o ya nɔ nɛ o gbaa imi, o tsɔlɔ ɔ, ye nina daa. Yawɛ lee, o gbaa mɛ momo, nɛ o gbaami ɔ maa hi a nɔ kɛ maa ya neneene.”