Kronika I, 15 - BAIBLO ALOO NGMAMI KLƆUKLƆU Ɔ

A dla konɛ a ya ngɔ somi daka a

¹ David po wehi ngɛ David ma a mi kɛ ha e he. Jehanɛ, e dla he ko kɛ ha Mawu somi daka a, nɛ e ma bo tsu ngɛ lejɛ ɔ kɛ ha lɛ.

² Lɔ ɔ se ɔ, e de ke, “Levi bi ɔmɛ pɛ ji ni nɛmɛ nɛ maa hɛɛ somi daka a nɛ, ejakaa mɛ Yawɛ hla ke a hɛɛ somi daka a, nɛ a sɔmɔ lɛ, Yawɛ ɔ daa.”

³ Kɛkɛ nɛ David kpee Israel ma a tsuo kɛ ba Yerusalem, konɛ a ya ngɔ Yawɛ somi daka a kɛ ba ma he nɛ e dla kɛ to lɛ ɔ.

⁴ Lɔ ɔ se ɔ, e bua Aaron nina, kɛ Levi bi ɔmɛ a nya ngɛ he kake.

^5-10 Osɔfohi, kɛ Levi bi nɛ ba lejɛ ɔ ji nɛ ɔmɛ nɛ: Kohat weku ɔ: nihi 120, kɛ a nya dalɔ Uriel; Merari weku ɔ: nihi 220, kɛ a nyatsɛ Asaya; Gershon weku ɔ: nihi 130, kɛ a nyatsɛ Yoel; Elizafan weku ɔ: nihi 200, kɛ a nyatsɛ Shemaya; Hebron weku ɔ: nihi 80, kɛ a nyatsɛ Eliel; Uziel weku ɔ: nihi 112, kɛ a nyatsɛ Aminadab.

¹¹ David tsɛ osɔfo Zadok, kɛ osɔfo Abiatar. E tsɛ Levi bi hu ekpa. Mɛ ji Uriel, Asaya, Yoel, Shemaya, Eliel, kɛ Aminadab.

¹² David de Levi bi ɔmɛ ke, “Nyɛ ji Levi weku ɔmɛ a nyatsɛmɛ. Nyɛɛ tsu nyɛ he, nɛ nyɛɛ tsu nyɛ nyɛmimɛ Levi bi kpa amɛ hu a he, konɛ nyɛ ya ngɔ Yawɛ Israel Mawu ɔ somi daka a kɛ ba he nɛ i dla to lɛ ɔ.

¹³ Akɛnɛ kekle ɔ, pi nyɛ nɛ nyɛ hɛɛ daka a he je ɔ, Yawɛ, wa Mawu ɔ gbla wa tue; ejakaa wa hyɛ we daka a nɔ kaa bɔ nɛ e to kaa a pee ɔ.”

¹⁴ Kɛkɛ nɛ osɔfo ɔmɛ, kɛ Levi bi ɔmɛ ya tsu a he, konɛ a ya ngɔ Yawɛ, Israel Mawu ɔ somi daka a kɛ ba.

¹⁵ Levi bi ɔmɛ wo somi daka a tso nɛ a kɛ fɔ a konɔ kaa bɔ nɛ Yawɛ gu Mose nɔ fa mɛ ke a pee ɔ.

¹⁶ David fa Levi bi ɔmɛ a nya dali ɔmɛ ke a ha nɛ a nyɛmimɛ ɔmɛ nɛ a la kɛ bua jɔmi, nɛ a fia saku, kɛ ngmlɛ, gegeege.

^17-21 Nihi nɛ a hla kɛ je lali a weku ɔmɛ a mi nɛ a fia akɔblee ngmlɛhi ji Heman, Yoel bi ɔ e nyɛmi Asaf, Berekia bi ɔ, kɛ Etan, Kushaya bi ɔ nɛ je Merari weku ɔ mi ɔ. A he piɛli nɛ a hla nɛ a fia kpa saku nɛ gbi ya hiɔwe ɔ ji Levi bi nɛ ɔmɛ: Zakaria, Yaaziel, Shemiramot, Yehiel, Uni, Eliab, Maaseya, kɛ Benaya. Jehanɛ, a hla Levi bi nɛ ɔmɛ hulɔ nɛ mɛɛ a fia kpa saku nɛ gbi ba si ɔ: Matitia, Elifelehu, Mikneya, kɛ Azazia. A hla Yawɛ we buli enyɔ hu kɛ piɛ a he; a tsɛɛ nɔ kake ke Obed Edom, nɛ a tsɛɛ nɔ kake hu ke Yeyel.

²² La jelɔ ɔ ji Kenania nɛ nyɛɛ Levi bi ɔmɛ a hɛ mi kɛ la a. A je blɔ hla lɛ ejakaa e le lami he blɔ nya tomi saminya.

^23-24 Somi daka a he buli nɛ a hla ji Berekia, Elkana, Obed Edom, kɛ Yehia. A hia osɔfo nɛ ɔmɛ nɛ a kpa titimati kɛ nyɛɛ somi daka a hɛ mi: Shebania, Yoshafat, Netanel, Amasai, Zakaria, Benaya, kɛ Eliezer.

A ngɔ somi daka a kɛ ba Yerusalem

²⁵ Kɛkɛ nɛ David kɛ Israel ma nimeli ɔmɛ, kɛ asafoatsɛmɛ ɔmɛ nɛ ngɛ ta buli akpeakpe a nya a, pue nɔ kɛ ho Obed Edom we ɔ mi ya, nɛ a kɛ nyami ya ngɔ Yawɛ somi daka a.

²⁶ A gbe na ku kpaago, kɛ jijɔ kpaago kɛ sã bɔ, ejakaa Mawu piɛ Levi bi ɔmɛ nɛ hɛɛ somi daka a a he.

²⁷ David, Levi bi ɔmɛ nɛ hɛɛ daka a, lali ɔmɛ, kɛ la jelɔ ɔ nɛ a tsɛɛ lɛ Kenania a tsuo wo kploba tade klɔii saminyawiiwi. David wo efɔd nɛ a kɛ kploba kpɛ.

²⁸ Kɛkɛ nɛ Israel ma a tsuo ngɔ somi daka a kɛ ba Yerusalem. Benɛ a ma a tsuo a ngɛ titimati kɛ koli kpae, nɛ a ngɛ ngmlɛ kɛ kpa saku hu fiae kɛ ngmlaa.

²⁹ Benɛ daka a ba su David ma a mi ɔ, Mikal, Saul biyo ɔ je e hɛ mi kpo ngɛ saflɛ mi, nɛ e na Matsɛ David nɛ ngɛ tuue nɛ e ngɛ doe, nɛ David he pee lɛ tai.