Kronika I, 12 - BAIBLO ALOO NGMAMI KLƆUKLƆU Ɔ

Benyamin bi komɛ ba nyɛɛ David se

¹ Benɛ David na we he jɔmi ngɛ Kish binyumu Saul dɛ mi, nɛ e ho ya laa e he ngɛ Ziklag ɔ, ta buli katsɛmɛ kpanakpanaa babauu ba piɛ e he ngɛ lejɛ ɔ kɛ hwu ta.

² Ta buli nɛ ɔmɛ ɔ, Saul nitsɛ nyɛmimɛ Benyamin bi ji mɛ. A nine nya da saminya; a nyɛɔ nɛ a kɛ a hiɔ nine, loo a muɔ nine tsɛ̃ɔ kɛ̃ɛ̃, aloo a fɔɔ amlami tɛ.

^3-7 A nya dali ji Ahiezer kɛ Yoash; Shemaa nɛ je Gibea a bimɛ ji mɛ. Ta buli nɛ ɔmɛ ji Yeziel, kɛ Pelet, Azmavet binyumu ɔmɛ Beraka kɛ Yehu nɛ a je Anatot ɔ Ishmaya nɛ je Gibeon ɔ Nyumu nɛ ɔ, ta bulɔ nɛ peeɔ kã wawɛɛ ji lɛ, nɛ e peeɔ nimli “Nyingmi etɛ ɔmɛ” a hɛ mi nyɛɛlɔ. Yeremia, Yahaziel, Yohanan, kɛ Yozabad nɛ a je Gedera a. Eluzai, Yerimot, Bealia, Shemaria, kɛ Shefatia nɛ je Harif ɔ Elkana, Ishia, Azarel, Yoezer, kɛ Yashobeam nɛ a je Kora weku ɔ mi ɔ Yoela, kɛ Zebadia, Yehoram nɛ je Gedor ɔ bimɛ ɔmɛ.

Gad bi nɛ ba nyɛɛ David se

⁸ Gad ta buli komɛ nɛ he biɛ hu ba piɛ David he ngɛ e laami he ɔ ngɛ nga a nɔ. A ji nihi nɛ a le tsɛ̃i kɛ aklɔ he ní tsumi saminya. A hɛ mi ngɛ gbeyegbeye kaa jata hɛ mi, nɛ a he sɔɔ kaa odabɔ.

^9-13 A nya dalɔ ji Ezer, nɛ nihi nɛ ba ngɛ e se ji Obadia, Eliab, Mishmana, Yeremia, Atai, Eliel, Yohanan, Elzabad, Yeremia, kɛ Makbanai.

¹⁴ Gad bi nɛ ɔmɛ ɔ, asafoatsɛmɛ ji mɛ tsuo. Ni nɛmɛ nɛ ji asafoatsɛngua amɛ ɔ, a ti nɔ tsuaa nɔ ngɛ ta buli akpe ngɛ e sisi. Se asafoatsɛwawi ɔmɛ lɛɛ a ti nɔ tsuaa nɔ ngɛ ta buli lafa ngɛ e sisi.

¹⁵ Jeha ko nɛ be ɔ, kekleekle nyɔhiɔ ɔ mi benɛ Yordan pa a hyi tɔ, Gad asafoatsɛmɛ nɛ ɔmɛ po pa a nɛ a ya tua nihi ngɛ kɔ̃ ɔmɛ a mi, ngɛ Yordan pa a beleku je, kɛ bonyoku je tsuo, nɛ a gbɛ mɛ ngɔ fĩa.

David se nyɛɛli kpa komɛ nɛ je Benyamin kɛ Yuda

¹⁶ Ligbi ko ɔ, Benyamin bi kpa komɛ kɛ Yuda bi komɛ ba David ngɔ ngɛ e tɛ puɔ ɔ mi.

¹⁷ David kɛ mɛ ba kpe, nɛ e de mɛ ke, “Ke nyɛ ba ye ngɔ kaa huɛmɛ nɛ ma ye he piɛmi ɔ, i ngɛ nyɛ baba hee hae kɛ je ye tsui mi. Se ke nyɛ ba nɛ nyɛ ba hyɛ ye sihi he, nɛ lɔ ɔ se nyɛ ya tsɔɔ ye se blɔ ngɔ ha ye he nyɛli, be mi nɛ i pee we yayami ko ɔ, lɛɛ wa nɛmɛ ɔmɛ a Mawu ɔ nɛ hyɛ nɛ e wo nyɛ hiɔ.”

¹⁸ Tlukaa a, Mawu mumi ɔ ba a ti nɔ kake nɔ. A tsɛɛ lɛ Amasai, nɛ lɛ ji nɔ nɛ ba pee ta buli “Nyingmi etɛ ɔmɛ” a nyatsɛ. Amasai kpa ngmlaa, nɛ e de ke, “Ishai binyumu David lee! Wa ngɛ o se oo, wa ngɛ o se! David lee, mo he manye, mo he manye! David he piɛli, nyɛ he manye, nyɛ he manye! Ejakaa, o Mawu ɔ piɛɔ o he.” Kɛkɛ nɛ David he mɛ, nɛ e pee mɛ e we asafoatsɛmɛ.

Se nyɛɛli nɛ je Manase

¹⁹ Benɛ David kɛ Filisti bi ɔmɛ hia nɛ a kɛ Matsɛ Saul yaa hwu ta a, ta buli komɛ ku kɛ je Manase wɛtso ɔ mi, nɛ a ba piɛ David he. Anɔkuale mi ɔ, David ya piɛ we Filisti bi ɔmɛ a he kɛ hwui ta a. Filisti matsɛmɛ ɔmɛ nitsɛmɛ ba na kaa ke a hyɛ we nɛ e hi ɔ, David maa je a se, nɛ e ma ya piɛ e nyɔmtsɛ Saul ɔ he, nɛ a maa fia mɛ Filisti bi ɔmɛ se nya kɔ̃. E nɛ ɔ he je ɔ, a ha nɛ e kpale e se.

²⁰ Benɛ David kpale kɛ yaa Ziklag ɔ, ta buli nɛ je Manase nɛ ku ya nyɛɛ e se ji Adna, Yozabad, Yediael, Mikael, Yozabad, Elihu, kɛ Ziletai. Ta buli akpehi a nyatsɛmɛ ji mɛ tsuo ngɛ Manase wɛtso ɔ mi.

²¹ A ba piɛ David he nɛ e pee mɛ asafoatsɛmɛ ngɛ e tabo ɔmɛ a nya, ejakaa ta buli katsɛmɛ nɛ he biɛ ji mɛ tsuo pɛpɛɛpɛ.

²² Daa ligbi ɔ, ni hehi ba piɛɔ David tabo ɔmɛ a he. Enɛ ɔ he je ɔ, e we bi ɔmɛ a he ba hiɛ babauu nitsɛnitsɛ kaa Mawu tabo.

David tabo ɔmɛ a hiɛmi

^23-37 Benɛ David ngɛ Hebron ɔ, ta buli nɛ a je blɔ tsɔse mɛ babauu ya piɛ e he ngɛ lejɛ ɔ, konɛ a kpɔ matsɛ yemi ɔ ngɛ Saul dɛ kɛ ha lɛ kaa bɔ nɛ Yawɛ de to ɔ. Bɔ nɛ a hiɛmi ngɛ ha ji nɛ ɔmɛ nɛ. Yuda: ta buli 6,800. A mia saminya, nɛ a hɛɛ tsɛ̃i kɛ akplɔ; Simeon: ta buli 7,100 nɛ a je blɔ tsɔse mɛ; Levi: ta buli 4,600; Yehoyada se nyɛɛli nɛ ji Aaron nina: ta buli 3,700; Niheyo katsɛ ko nɛ a tsɛɛ lɛ Zadok ɔ kɛ e nyɛmimɛ: asafoatsɛmɛ 22; Benyamin (Saul nitsɛ e wɛtso ɔ): ta buli 3,000 (Benyamin bi ɔmɛ a ti nihi babauu ngɛ Saul se kɛ mwɔɔ); Efraim: ta buli katsɛmɛ nɛ he biɛ ngɛ a weku ɔmɛ a mi 20,800; Manase wɛtso fa a: ta buli 18,000 nɛ a je blɔ hla mɛ ke a ya nɛ a ya wo David matsɛ ɔ; Isakar: asafoatsɛmɛ 200 kɛ a we bi ngɛ a sisi, (Kikɛmɛ a asafoatsɛmɛ nɛ ɔmɛ le nɔ́ nɛ sa kaa Israel nɛ a pee, kɛ be tutuutu nɛ sa nɛ a pee); Zebulun: ta buli 50,000 nɛ le ta hwumi saminya, kɛ ta hwumi níhi saisaa a he ní tsumi. A le ta gbami saminya, nɛ a yi mi pee we mɛ enyɔɔnyɔ; Naftali: asafoatsɛmɛ 1,000 kɛ a we bi 37,000 nɛ hɛɛ tsɛ̃i kɛ akplɔ; Dan: ta buli 28,600 nɛ a je blɔ tsɔse mɛ; Asher: ta buli 40,000 nɛ a le ta gbami saminya; Wɛtsohi nɛ je Yordan pa a se, nɛ ji Ruben, Gad, kɛ Manase wɛtso fa a: ta buli 120,000 nɛ le ta hwumi ní slɔɔtohi a he ní tsumi.

³⁸ Ta buli nɛ ɔmɛ tsuo pɛpɛɛpɛ mia, nɛ a pee a nya kake, nɛ a ho Hebron ya, konɛ a ya wo David Israel nɔ matsɛ ngɛ lejɛ ɔ. Israel ma nɛ piɛ ɔ tsuo fi a se.

³⁹ Ta buli nɛ ɔmɛ kɛ David ya hi si ligbi etɛ; a kɛ lɛ ye ní nɛ a nu ní, ejakaa a nyɛmimɛ ɔmɛ dla a se saminya.

⁴⁰ Nihi nɛ a kɛ lɛ a he kɛ́ we, kɛ ni nɛmɛ nɛ je Isakar, Zebulun, kɛ Naftali tɔɔ ngɔ niye ní slɔɔtoslɔɔto kɛ wo tejihi, afukpɔngɔhi, teji okpɔngɔhi, kɛ nahi a se kɛ ba. Níhi nɛ a ngɔ kɛ ba ji mamu, ngmɔkɔ, keeki, wai, kɛ nu. A ngɔ nahi kɛ tohi hu kɛ ba, nɛ a ba gbe nɛ a ye, ejakaa bua jɔmi ba Israel.