Kpojemi 9 - BAIBLO ALOO NGMAMI KLƆUKLƆU Ɔ

¹ Jehanɛ ɔ, bɔfo enuɔne ɔ kpa e titimati ɔ, nɛ i na dodoe ko nɛ je hiɔwe ba nɔ zugba, nɛ a ha lɛ muɔ voo ɔ nya safe ɔ.

² Dodoe ɔ bli muɔ voo ɔ nya, nɛ la su ku kpii je mi kaa flɔɔnɔɔ nguaa mi la su ku; la su ku nɛ je muɔ ɔ mi ɔ ha nɛ pu, kɛ kɔɔhiɔ pee yumuu.

³ Baalɛhi je la su ku ɔ mi pue zugba, nɛ Mawu ha mɛ he wami kaa nyingmogblakotohi pɛ.

⁴ A de mɛ ke a ko ta nga, loo ba mumu, loo tso ko tso ko he; nimli adesahi nɛ Mawu nɔ́ nya sɔumi nɔ́ ɔ he okadi be a hɛ nya a, á ye mɛ pɛ awi.

⁵ A ngmɛ́ baalɛ ɔmɛ blɔ kaa a gbe nimli nɛ ɔmɛ, se mohu kaa a pii mɛ nyɔhiɔ enuɔ sɔuu. A maa nu piimi nɛ a pii mɛ ɔ he wawɛɛ kaa bɔ nɛ ke nyingmogblakoto tsɛ̃ nɔ nɛ e yee nɔ ɔ.

⁶ Jamɛ a nyɔhiɔ enuɔ ɔ mi ɔ, nimli ma hla gbenɔ se blɔ, se a be nae; a maa suɔ kaa a gbo, se gbenɔ maa tu a nya fo.

⁷ Baalɛ ɔmɛ ngɛ kaa okpɔngɔhi nɛ a mia mɛ kɛ ha ta; ní komɛ fi a yi kaa sika tsu jlasi, nɛ a hɛ mi ngɛ kaa nimli a hɛ mi.

⁸ A yi bwɔmi ngɛ kaa yihi a yi bwɔmi, nɛ a lunguhi ngɛ kaa jata nɔ́.

⁹ A wo ní komɛ ha mɛ ngɛ a gugue mi kaa dade damahi, nɛ ke a fia a pɛlihi a mi ɔ, e pɛɛ wawɛɛ kaa ta zugba lɛhi fuu nɛ okpɔngɔhi gbla kɛ yaa ta.

¹⁰ A ngɛ hlemi kɛ e nya duɔ kaa nyingmogblakoto hlemi. Nɛ hlemi nɛ ɔmɛ a mi lɛ he wami nɛ a kɛ ma pii nimli nyɔhiɔ enuɔ ɔ ngɛ.

¹¹ Matsɛ nɛ yeɔ a nɔ ji bɔfo ɔ nɛ ngɛ muɔ voo ɔ nya a. Hebri gbi mi ɔ, e biɛ ji Abadon, se Hela gbi mi lɛɛ a tsɛɛ lɛ Apolion.

¹² Kekleekle musu ɔ se po; se hyɛ, musu enyɔ pa ngɛ se kɛ ma!

¹³ Jehanɛ ɔ, bɔfo ekpane ɔ kpa e titimati ɔ, nɛ i nu gbi ko nɛ ngɛ pɛe kɛ je sika tsu bɔ sami la tɛ nɛ maa si ngɛ Mawu hɛ mi ɔ koli ɔmɛ a mi.

¹⁴ Gbi ɔ de bɔfo ekpane ɔ nɛ hɛɛ titimati ɔ ke, “Bɔfo eywiɛ ɔmɛ nɛ a fi mɛ ngɛ Yufrate pa nguaa a nya a, yaa pɛne mɛ!”

¹⁵ Bɔfo ekpane ɔ ya pɛne bɔfo eywiɛ ɔmɛ. Blɔɔ a ngɔ mɛ ngɔ to nɛ a pee mɛ klaalo, konɛ jeha nɛ ɔ tutuutu we nyɔhiɔ nɛ ɔ we ligbi nɛ ɔ tutuutu we ngmlɛfia nɛ ɔ mi ɔ a gbe adesahi tsuo a mi dlami etɛ mi kake.

¹⁶ A tsɔɔ mi okpɔngɔ ta buli ɔmɛ a yibɔ; a hiɛmi ji ayɔ lafa enyɔ.

¹⁷ Bɔ nɛ i na okpɔngɔ ɔmɛ ngɛ nina mi ji nɛ ɔ nɛ. Okpɔngɔ nɔ hili ɔmɛ wo dama; ekomɛ tsu tsutsuu kaa la; ekomɛ hɛɛ alamua tu su, nɛ ekomɛ hu ngɛ kaa kungwɔ zɔ. Okpɔngɔ ɔmɛ a yi ngɛ kaa jata yi, nɛ la, kɛ la su ku, kɛ la hɛuu ngɛ a nya mi jee.

¹⁸ Nɔ́ etɛ nɛ ɔmɛ nɛ ngɛ okpɔngɔ ɔmɛ a nya mi jee ɔ gbe adesahi tsuo a mi dlami etɛ mi kake.

¹⁹ Ejakaa he wami nɛ okpɔngɔ ɔmɛ kɛ tsuɔ ní ɔ, a nya mi, kɛ a hlemi nya e ngɛ. Okpɔngɔ ɔmɛ a hlemi ngɛ kaa sinɔ nɛ yi ngɛ he, nɛ lɔ ɔ a kɛ yeɔ awi.

²⁰ Nihi tsuo nɛ piɛ, nɛ mɛɛ haomi nɛ ɔmɛ gbi mɛ ɔ, a tsakee we a tsui, nɛ níhi nɛ a kɛ mɛ nitsɛmɛ a nine pee ɔ, a ngmɛɛ we he. A kpa we mumi yayamihi jami. Amagahi nɛ a kɛ sika tsu, loo sika hiɔ, loo ayawa, loo tɛ, loo tso pee ɔ, pi kaa a kpa mɛ jami; pohu amaga amɛ hyɛ we nɔ́, a nui nɔ́, nɛ a nyɛɛ we hulɔ.

²¹ Jehanɛ hu, a tsakee we a tsui, konɛ a jɔɔ muɔ si puemi, loo nyuami, loo nyumu kɛ yo yakayaka fiɛmi, loo jumi.