Kpojemi 8 - BAIBLO ALOO NGMAMI KLƆUKLƆU Ɔ

Nya sɔumi nɔ́ kpaagone ɔ

¹ Benɛ bɔfo ɔ tsɔ nɔ́ nya sɔumi nɔ́ kpaagone ɔ, hiɔwe jɔ dii maa pee ngmlɛfia fa.

² Kɛkɛ nɛ i na bɔfo kpaago ɔmɛ nɛ daa si ngɛ Mawu hɛ mi ɔ, nɛ a ha mɛ titimati kpaago.

³ Bɔfo kpa ba ba da si ngɛ bɔ sami la tɛ ɔ he, nɛ e hɛɛ tsopa kɛ e he via sami nɔ́ nɛ a kɛ sika tsu pee. A ha lɛ tsopa kɛ e he via fuu nɛ e kɛ piɛ Mawu we bi ɔmɛ tsuo a sɔlemi ɔ he, konɛ e kɛ sã bɔ ngɛ bɔ sami la tɛ nɛ a kɛ sika tsu pee ɔ nɔ ngɛ matsɛ sɛ ɔ hɛ mi.

⁴ Tsopa kɛ e he via la su ku ɔ, kɛ ni klɔuklɔu ɔmɛ a kue fami ɔ je bɔfo ɔ nɛ daa si ngɛ Mawu hɛ mi ɔ dɛ mi kɛ ho hiɔwe ya.

⁵ Kɛkɛ nɛ bɔfo ɔ ngɔ tsopa kɛ e he via sami nɔ́ ɔ; e je la ngɛ bɔ sami la tɛ ɔ nɔ ngɔ wo mi tɔ, nɛ e hɛ ngɔ pue zugba a nɔ. Hiɔwe si, gbihi pɛ, oslabai gba, nɛ zugba mimiɛ.

Titimati kpaago ɔmɛ

⁶ Jehanɛ ɔ, bɔfo kpaago ɔmɛ nɛ hɛɛ titimati kpaago ɔmɛ ɔ pee klaalo, konɛ a kpa titimati ɔmɛ.

⁷ Kekleekle bɔfo ɔ kpa e titimati ɔ, nɛ gbiɛ ngo ngu, kɛ la nɛ muɔ futu mi ba pue zugba a nɔ, nɛ zugba a mi dlami etɛ mi kake, tsohi a mi dlami etɛ mi kake, kɛ ba mumu tsuo pɛpɛɛpɛ sã.

⁸ Kɛkɛ nɛ bɔfo enyɔne ɔ kpa e titimati ɔ, nɛ a sake nɔ́ ko nɛ ngɛ kaa yo nguaa ko nɛ ngɛ tsoe ngɔ fɔ wo ɔ mi. Wo ɔ mi dlami etɛ mi kake plɛ muɔ.

⁹ Wo ɔ mi nibɔ ní hɛ ngmengmlehi a mi dlami etɛ mi kake gbo, nɛ lɛhi tsuo nɛ ngɛ wo ɔ nɔ ɔ a mi dlami etɛ mi kake hɛ mi kpata.

¹⁰ Bɔfo etɛne ɔ kpa e titimati ɔ, nɛ dodoe nguaa ko nɛ ngɛ kpɛe kaa jatɛ je hiɔwe ba nɔ pahi, kɛ nyu hɛngmɛhi a mi dlami etɛ mi kake a mi.

¹¹ Dodoe ɔ biɛ ji Doomi. Nyu ɔ mi dlami etɛ mi kake plɛ pee nɔ́ nɛ dooɔ. Nɛ nihi babauu nɛ nu nyu ɔ gbo, ejakaa nyu ɔ dooɔ.

¹² Jehanɛ ɔ, bɔfo eywiɛne ɔ kpa e titimati ɔ, nɛ nɔ́ ko sa pu, nyɔhiɔ, kɛ dodoe ɔmɛ tsuo a he, nɛ a nyɛ we nɛ a tsu ní bɔ nɛ sa. Lɔ ɔ he ɔ, piani ɔ, pu nyɛ we nɛ e tso piani be ɔ mi dlami etɛ mi kake; nyɔ mi hu nyɔhiɔ, kɛ dodoe ɔmɛ nyɛ we nɛ a kpɛ nyɔ mi be ɔ mi dlami etɛ mi kake.

¹³ Kɛkɛ nɛ i hyɛ, nɛ i nu kɔle ko he nɛ te kɛ bee ngɛ hiɔwe lokoo. Kɔle ɔ ngɛ munyu tue kɛ gbi wawɛɛ ke, “Musu oo musu! Musu oo musu! Nihi tsuo nɛ maa hi je ɔ mi be mi nɛ bɔfo etɛ ɔmɛ ma kpa titimati ɔmɛ nɛ piɛ ɔ, musu tloo mɛ!”