Kpojemi 21 - BAIBLO ALOO NGMAMI KLƆUKLƆU Ɔ

Hiɔwe he kɛ zugba he

¹ Jehanɛ ɔ, i na hiɔwe he, kɛ zugba he, ejakaa kekleekle hiɔwe, kɛ kekleekle zugba a be kɛ ho. Nɛ wo be hu.

² Kɛkɛ nɛ i na ma klɔuklɔu ɔ, Yerusalem ma he ɔ nɛ je Mawu ngɔ ngɛ hiɔwe kɛ ma zugba. A dla e he ha lɛ kaa ayɛflo nɛ a wo lɛ ní ta nɛ a kɛ lɛ yaa ha e huno.

³ I nu nɛ gbi ko pɛ wawɛɛ kɛ je matsɛ sɛ ɔ he kɛ de ke, “Jehanɛ ɔ lɛɛ Mawu hi he ji nimli a kpɛti! E kɛ mɛ maa hi si, nɛ a maa pee e ma. Mawu nitsɛ kɛ mɛ maa hi si, nɛ e maa pee a Mawu.

⁴ Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”

⁵ Kɛkɛ nɛ nɔ nɛ hii si ngɛ matsɛ sɛ ɔ nɔ ɔ de ke, “Hyɛ, i ngɛ níhi tsuo pee ehe!” E de imi hulɔ ke, “Ngmaa enɛ ɔ, ejakaa anɔkuale munyu nɛ sa kaa a he ye ji nɛ ɔ nɛ.”

⁶ E ya nɔ nɛ e de mi ke, “A gbe nya! Imi ji kekleekle no kɛ nyagbe no, sisije kɛ nyagbe! Nɔ tsuaa nɔ nɛ kuma ngɛ lɛ yee ɔ, ma ha lɛ nyu nɛ je vu nɛ baa nyu nɛ haa nɔ wami ɔ mi nɛ e nu nɛ e be he hiɔ woe.

⁷ Nihi tsuo nɛ maa ye kunimi ɔ ma na nike ní nɛ ɔ kɛ maa je ye dɛ mi; ma pee a Mawu, nɛ mɛ hu a maa pee ye ma.

⁸ Se fɔ̃li, nihi nɛ he we yi, nihi nɛ peeɔ níhi nɛ a hiee, nɔmlɔ gbeli, yaholi, nyuali, wɔ jali, kɛ lakpatsɛmɛ tsuo lɛɛ he nɛ fɔɔ si ha mɛ ji taku kɛ e mi la nɛ ngɛ tsoe gegeege ɔ. Lɔ ɔ ji gbenɔ enyɔne ɔ nɛ.”

Yerusalem ma he ɔ

⁹ Jehanɛ ɔ, bɔfo kpaago ɔmɛ nɛ hɛɛ kplu kpaago ɔmɛ nɛ nyagbe haomi kpaago ɔmɛ hyi mɛ tɔtɔɔtɔ ɔ, a ti nɔ kake ba ye ngɔ, nɛ e ba de mi ke, “Ba nɛ ma tsɔɔ mo ayɛflo ɔ nɛ ji To bi ɔ yo ɔ.”

¹⁰ Kɛkɛ nɛ mumi ɔ ba ye nɔ, nɛ bɔfo ɔ ngɔ mi kɛ ho yo gagaa ko yi mi ya. E tsɔɔ mi Yerusalem, ma klɔuklɔu ɔ nɛ je hiɔwe ngɛ Mawu ngɔ kɛ ma zugba a;

¹¹ nɛ e hɛɛ Mawu hɛ mi nyami ɔ, nɛ e ngɛ kpɛe. Ma a ngɛ kpɛe kaa tɛ nɛ he jua wa nitsɛnitsɛ, aloo yaspi tɛ; e mi hu tsɔ keikei kaa ahuhuɛ.

¹² Gbogbo nɛ ti, nɛ ya hiɔwe saminya bɔle ma a kɛ kpe. Agbo nyɔngma kɛ enyɔ ngɛ he, nɛ bɔfohi nyɔngma kɛ enyɔ daa si ngɛ agbo ɔmɛ a nya. A ngma Israel wɛtso nyɔngma kɛ enyɔ ɔmɛ a biɛ ngɛ agbo ɔmɛ a nya.

¹³ Agbo etɛ ngɛ beleku je, etɛ ngɛ omleyi je, etɛ ngɛ leneyi je, nɛ etɛ hu ngɛ bonyoku je.

¹⁴ Gbogbo nɛ bɔle ma a kɛ kpe ɔ, a fia ngɔ fɔ sisi tomi tɛ nyɔngma kɛ enyɔ nɔ, nɛ a ngma To bi ɔ bɔfo nyɔngma kɛ enyɔ ɔmɛ a biɛ ngɛ a nɔ.

¹⁵ Bɔfo ɔ nɛ kɛ mi tu munyu ɔ hɛɛ sika tsu tso nɛ a kɛ susuɔ nɔ́ ngɛ e dɛ mi nɛ e kɛ ma susu ma a, kɛ agbo ɔmɛ, kɛ gbogbo ɔ.

¹⁶ Ma a fɔɔ si kɔ nya eywiɛ; e kami kɛ e blimi sɔ. Bɔfo ɔ kɛ nɔ́ susumi tso ɔ susu ma a, nɛ e pee kilomita akpe enyɔ kɛ e nya lafa eywiɛ; e kami, e blimi, kɛ e hiɔwe yami tsuo sɔ.

¹⁷ Bɔfo ɔ susu gbogbo ɔ hulɔ, nɛ e hiɔwe yami pee gugue nyingmi etɛ kɛ ekpa. Nɔ́ nɛ bɔfo ɔ kɛ susu gbogbo ɔ, lɔ ɔ a kɛ susuɔ nɔ́ daa.

¹⁸ A kɛ yaspi tɛ fia gbogbo ɔ, nɛ ma a nitsɛ lɛɛ sika tsu ngmingmiingmi nɛ mi tsɔ keikei kaa ahuhuɛ a kɛ fia.

¹⁹ Sisi tomi nɛ a fia ma a gbogbo ɔ ngɔ fɔ nɔ ɔ, a kɛ tɛ nɛ he jua wa slɔɔtohi hɔɔ mi. Kekleekle tɛ nɛ he jua wa a ji yaspi; enyɔne ɔ, safiro; etɛne ɔ, agate; eywiɛne ɔ, emerald;

²⁰ enuɔne ɔ, sardoniki; ekpane ɔ, sadio; kpaagone ɔ, krisolito; kpaanyɔne ɔ, berilo; nɛɛne ɔ, topasi; nyɔngmane ɔ, krisopraso; nyɔngma kɛ kakene ɔ, hiakinto, nɛ nyɔngma kɛ enyɔne ɔ biɛ ji ametisto.

²¹ Agbo nyɔngma kɛ enyɔ ɔmɛ ɔ, adiagba nyɔngma kɛ enyɔ sɔuu, agbo tsuaa agbo ɔ, adiagba kake a kɛ pee. Gbɛjegbɛ nɛ ngɛ ma a mi ɔ, sika tsu ngmingmiingmi a kɛ pee; e mi tsɔ keikei kaa ahuhuɛ.

²² I nɛ sɔlemi we ko ngɛ ma a mi. Nyɔmtsɛ Mawu Ope ɔ, kɛ To bi ɔ ji e sɔlemi we.

²³ Pu, loo nyɔhiɔ nɛ ma kpɛ he hia we ngɛ ma a mi; ejakaa Mawu hɛ mi nyami ɔ ji la nɛ kpɛɔ ngɛ ma a mi, nɛ To bi ɔ ji e kane.

²⁴ Nimli tsuo nɛ ngɛ je ɔ mi ɔ maa nyɛɛ ngɛ la a mi, nɛ zugba a nɔ matsɛmɛ ɔmɛ maa ngɔ a hɛ mi nyami babauu ɔ kɛ ba ma a mi.

²⁵ Agbohi nɛ ngɛ ma a mi ɔ, a be ngae ligbi ko ligbi ko, ejakaa diblii be woe ngɛ lejɛ ɔ.

²⁶ Nɛ je ma amɛ maa ngɔ a hɛ mi nyami, kɛ agboje kɛ ba ma a mi.

²⁷ Nɔ́ ko nɛ he tsɔ we be ma a mi bae. Nɔ nɛ peeɔ níhi nɛ a hiee, loo e yeɔ lakpa hu be mi bae. Nihi nɛ a ngma a biɛ ngɛ To bi ɔ hɛ kali a womi ɔ mi ɔ, mɛ pɛ lɛ a maa ba ma a mi.