Kpojemi 18 - BAIBLO ALOO NGMAMI KLƆUKLƆU Ɔ

A kpata Babilon hɛ mi

¹ Enɛ ɔ se ɔ, i na bɔfo kpa nɛ je hiɔwe kɛ ma. E hɛɛ blɔ nya nguaa, nɛ la nɛ bɔle lɛ ɔ ha nɛ je ɔ mi tsuo tsɔ heii.

² E kpa ngmlaa wawɛɛ ke, “Babilon hɛ mi kpata! Babilon ma kpetekpleenyɛ ɔ hɛ mi kpata! Piɔ lɛɛ e plɛ mumi yayamihi tsuo a si himi he; e plɛ lohwe pɛlitsɛmɛ, kɛ lohwe awi yeli nɛ a hiee tsuo a si himi he.

³ Ejakaa Babilon yakayaka ní peemi ɔmɛ ha nɛ je ɔ tsuo puɛ; ee, e ngɛ kaa nɔ́ nɛ wai nɛ nya wa nɛ e ha mɛ nɛ a nu. Je nɛ ɔ mi matsɛmɛ ɔmɛ tsuo kɛ lɛ bɔ ajuama, nɛ jua yeli tsuo gu e ní babauu ɔ nɔ nɛ a pee niatsɛmɛ.”

⁴ Kɛkɛ nɛ i nu gbi kpa nɛ tu munyu kɛ je hiɔwe ke, “Ye ma! Nyɛɛ je kpo ngɛ e mi oo, nyɛɛ je ma a mi! Nyɛ ko ya piɛ ma mi bi ɔmɛ a he kɛ pee yayami, konɛ haomi nɛ ba a nɔ ɔ, ko ba nyɛ hu nyɛ nɔ!

⁵ Ejakaa a to e yayami ɔmɛ kɛ ya si hiɔwe tɔɔ. Nɛ Mawu miɔ nɛ e maa gbla ma a tue ngɛ e yayami ɔmɛ a he.

⁶ Bɔ nɛ e pee mo ɔ, pee lɛ ja nɔuu ngɔ to nane mi. Níhi nɛ e pee ɔ, pee lɛ ja totoe enyɔ ngɔ to nane mi. Dã nɛ e futu ha mo ɔ, mo futu dã nɛ nya wa kaa ja totoe enyɔ ngɔ wo e kplu ɔ mi ha lɛ.

⁷ Bɔ nɛ e pee ní nguahi, nɛ e fiɛ e yi nɔ ɔ, pii lɛ, nɛ e ye aywilɛho ja nɔuu. Ejakaa e pɔɔ e he demi ke, ‘Manyɛ ji mi, nɛ i hii si ngɛ ye sɛ ɔ nɔ! Pi yalɔyo ji mi; i be aywilɛho yee gblegbleegble!’

⁸ Enɛ ɔ he je ɔ, haomi nɛ ɔmɛ maa ba e nɔ ligbi kake too: gbenɔ hiɔ, aywilɛho, kɛ hwɔ. Nɛ a kɛ la maa sã lɛ, ejakaa Nyɔmtsɛ Mawu ɔ nɛ maa kojo lɛ ɔ, e kle.”

⁹ Je nɛ ɔ mi matsɛmɛ ɔmɛ nɛ a kɛ Babilon bɔ ajuama, nɛ a fiɛ a yi nɔ ɔ, ke be nɛ a sã ma a, nɛ a na la su ku nɛ ngɛ jee ɔ, a maa wo yana, nɛ a ma nya awe ha ma a.

¹⁰ A maa da si ngɛ se lokoo, ejakaa a maa ye gbeye kaa a maa gbla a kɛ Babilon tsuo a tue. A ma de ke, “Tsaoo! Akuanyɛ! Babilon, ma nguaa! Ma kpetekpleenyɛ! Ngmlɛfia kake too mi ɔ, hyɛ bɔ nɛ gbla o tue ha!”

¹¹ Jua yeli nɛ ngɛ je ɔ mi tsuo hu maa wo yana, nɛ a ma nya awe ha lɛ, ejakaa nɔ ko nɔ ko be a guɛ ní ɔmɛ hee hu.

¹² Nɔ ko nɔ ko be ní nɛ ɔmɛ hee hu: sika tsu, sika hiɔ, tɛhi nɛ a he jua wa, adiagba, kploba nɛ ngɛ fɛu, bo he jua wawɛ nɛ hɛɛ alamua tu su, seda, bo tsu, tso slɔɔtohi nɛ a he wa, suɔ wu níhi tsuo, tso slɔɔtohi nɛ a he jua wa saminya, akɔblee, dade, marble,

¹³ sinamon, tsopa kɛ e he via, mire, mimɛ, dã, nu, mamu, ngma, na, to, okpɔngɔ, zugba lɛ, nyɔguɛ, kɛ nimli nɛ a hɛ ngɛ tete.

¹⁴ Jua yeli ɔmɛ ma de ke, “Ní kpakpahi nɛ e jlo mo kaa o ná a, lɛ tsuo se po; ní babauu nɛ o ná, kɛ o yi nɔ nɛ o fiɛ saminya a, lɛ tsuo bɔ mo, nɛ o be nae hu gblegbleegble.”

¹⁵ Jua yeli nɛ ye jua ngɛ jamɛ a ma a mi, nɛ ba pee niatsɛmɛ ɔ, a maa da se lokoo, ejakaa a maa ye gbeye kaa a maa gbla a kɛ Babilon tsuo a tue. A maa wo yana, nɛ a ma nya awe boboobo;

¹⁶ nɛ a ma de ke, “Tsaoo! Akuanyɛ! Babilon, ma nguaa! Ma kpetekpleenyɛ! Sa a, kploba nɛ ngɛ fɛu, bo he jua wawɛ nɛ hɛɛ alamua tu su, kɛ bo tsu lɛ e buɔ, nɛ sika tsu, june, kɛ adiagba e kɛ dlaa e he!

¹⁷ Nɛ ngmlɛfia kake too mi ɔ, ní babauu nɛ e na a tsuo bɔ lɛ!” Lɛ kudɔɔtsɛmɛ ɔmɛ, nihi nɛ sɛ lɛ kɛ yaa he, lɛ mi bi, kɛ nihi nɛ yeɔ jua ngɛ wo nɔ tsuo ya da se lokoo.

¹⁸ Nɛ benɛ a sã ma a, nɛ a na la su ku nɛ je ɔ, a kpa ngmlaa, nɛ a de ke, “Ma ko ma ko be nɛ kle kaa ma kpetekpleenyɛ nɛ ɔ!”

¹⁹ A kɛ zu wo a yi mi, nɛ a wo yana, nɛ a nya awe. A kpa ngmlaa, nɛ a de ke, “Tsaoo! Akuanyɛ ha ma kpetekpleenyɛ ɔ! Lɛtsɛmɛ tsuo nɛ yeɔ jua ngɛ wo hɛ mi ɔ gu ní babauu nɛ e na a nɔ ba plɛ niatsɛmɛ. Nɛ ngmlɛfia kake too mi ɔ, ní babauu nɛ e na a tsuo bɔ lɛ!”

²⁰ Hiɔwe! Mo nya kaa a kpata Babilon hɛ mi! Nyɛ ni klɔuklɔuhi, bɔfohi, kɛ gbali, nyɛ nya! Ejakaa Mawu bu lɛ fɔ ha nyɛ ngɛ nɔ́ nɛ e pee nyɛ ɔ he!

²¹ Jehanɛ ɔ, bɔfo kpetekpleenyɛ ko wo tɛ nɛ ngɛ kaa wɛ nguaa ko, nɛ e hɛ ngɔ fɔ wo mi, nɛ e de ke, “Kikɛ nɛ ɔ a maa hɛ Babilon ma kpetekpleenyɛ ɔ ngɔ fɔ he, nɛ a be lɛ nae hu gblegbleegble.

²² Babilon, la be pɛe gblegbleegble ngɛ ma a mi hu! A be kpa saku, loo adesa gbi, loo bɛ, loo titimati he nue hu gblegbleegble ngɛ ma a mi! A be ga ní tsulɔ ko ga ní tsulɔ ko kulaa nae ngɛ ma a mi hu; wɛ tɛ hu a be e nya nue hu!

²³ Kane be tsoe ngɛ ma a mi hu; nɛ a be ayɛflo huno, kɛ ayɛflo nya nue hu. O jua yeli ɔmɛ ji nimli nguahi ngɛ je ɔ mi tsuo, nɛ o ngɔ kunya yemi kɛ sisi nihi tsuo ngɛ je ɔ mi!”

²⁴ Babilon yeɔ fɔ kaa e gbe gbali ɔmɛ, kɛ ni klɔuklɔu ɔmɛ. Ee, Babilon pue ni kpahi babauu hu a muɔ si ngɛ je ɔ mi.