Kpojemi 17 - BAIBLO ALOO NGMAMI KLƆUKLƆU Ɔ

Ajuama kpanaku ɔ

¹ Enɛ ɔ se ɔ, bɔfo kpaago ɔmɛ nɛ hɛɛ kplu kpaago ɔmɛ a ti nɔ kake ba de mi ke, “Ba nɛ ma tsɔɔ mo bɔ nɛ Mawu maa gbla ajuama kpanaku ɔ tue ha. Jamɛ a ma kpetekpleenyɛ ɔ nɛ a ma ngɔ fɔ pahi babauu a tue ɔ i ngɛ tsɔɔe ɔ nɛ.

² Matsɛmɛ ɔmɛ nɛ ngɛ je ɔ mi ɔ kɛ lɛ bɔ ajuama; nɛ nimli nɛ ngɛ zugba a nɔ ɔ pee kaa nihi nɛ tɔ dã, benɛ e kɛ mɛ fiɛ yakayaka fiɛmi ɔ.”

³ Mumi ɔ ba ye nɔ, nɛ bɔfo ɔ ngɔ mi kɛ ho nga nɔ ya. Kɛkɛ nɛ i na yo ko nɛ hii si ngɛ lohwe awi yelɔ tsutsuu ko nɔ. A ngma biɛhi fuu kɛ tu musu bɔmi munyuhi kɛ si Mawu ngɛ lohwe ɔ he tsuo. Lohwe ɔ ngɛ yi kpaago, kɛ koli nyɔngma.

⁴ Yo ɔ wo tade he jua wawɛ nɛ hɛɛ alamua tu su, nɛ tsuɔ hulɔ; nɛ a kɛ sika tsu june, kɛ tɛ nɛ he jua wa, kɛ adiagba dla e he ha lɛ. E hɛɛ sika tsu kplu nɛ hyi tɔ kɛ zo ní ɔmɛ, kɛ e we ajuama bɔmi níhi nɛ a hiee ɔ.

⁵ A ngma biɛ ko nɛ ji laami sane ngɛ e hɛ nya ke, “Babilon kpetekpleenyɛ, ajuamahi a nyɛ, kɛ níhi nɛ a hiee tsuo a je he.”

⁶ I na kaa yo ɔ tɔ dã; ee, e nu ni klɔuklɔu ɔmɛ, kɛ nihi nɛ a gbe mɛ ngɛ Yesu he ɔ a muɔ, nɛ e pee kaa nɔ nɛ tɔ dã. Benɛ i na lɛ ɔ, ye nya kpɛ ye he wawɛɛ.

⁷ Bɔfo ɔ bi mi ke “Mɛni he je nɛ o nya kpɛ o he ɔ?” E ya nɔ nɛ e de mi ke, “Yo ɔ nɛ hii si ngɛ lohwe awi yelɔ ɔ nɛ ngɛ yi kpaago kɛ koli nyɔngma a nɔ ɔ, laami sane ɔ nɛ kɔɔ e he ɔ, ma je tsɔɔ mo.

⁸ Lohwe ɔ nɛ o na a, be ko ɔ, e hɛ ngɛ, se piɔ lɛɛ e be je mi hu. E be kɛe nɛ e maa je muɔ voo ɔ mi kɛ ba, nɛ a ma kpata e hɛ mi pɛsɛpɛsɛ. Nɛ nihi tsuo nɛ ngɛ je ɔ mi nɛ a ngmɛ a biɛ ngɛ wami womi ɔ mi loko a bɔ je ɔ, ke a na lohwe ɔ, a nya maa kpɛ a he saminya. E hi si be ko; amlɔ nɛ ɔ lɛɛ e be je mi, se e maa kpale ba ekohu.

⁹ “Nɔ́ nɛ ɔ hia juɛmi, kɛ nɔ́ sisi numi. Yi kpaago ɔmɛ daa si ha yoku kpaago ɔmɛ nɛ yo ɔ hii si ngɛ nɔ ɔ. A daa si ha matsɛmɛ kpaago hulɔ.

¹⁰ Ni enuɔ gbo momo; nɔ kake ngɛ tsɛ yee kɛ mwɔɔ, nɛ nɔ kake na we nɛ e ba lolo. Ke e ba a, e maa ye tsɛ be bɔɔ kɛkɛ.

¹¹ Lohwe awi yelɔ ɔ nɛ ngɛ sa a, nɛ piɔ lɛɛ e be je mi hu ɔ, e maa pee matsɛ kpaanyɔne; e ye tsɛ momo kaa matsɛmɛ kpaago ɔmɛ a ti nɔ kake, nɛ a ma kpata e hɛ mi pɛsɛpɛsɛ.

¹² “Koli nyɔngma amɛ nɛ o na a daa si ha matsɛmɛ nyɔngma nɛ mɛɛ lɛɛ a yi tsɛ lolo. Se kɛ̃ ɔ, a ma ha mɛ blɔ nya nɛ a kɛ lohwe awi yelɔ ɔ maa ye tsɛ ngmlɛfia kake.

¹³ Mɛ tsuo a maa hɛɛ juɛmi kake, nɛ a maa ngɔ a he wami, kɛ a blɔ nya a kɛ ha lohwe ɔ.

¹⁴ Lohwe ɔ, kɛ matsɛmɛ ɔmɛ ma ya tua To bi ɔ. Se To bi ɔ, kɛ e se nyɛɛli ɔmɛ maa ye a nɔ kunimi. Lɛ ji nyɔmtsɛmɛ a nyɔmtsɛ, kɛ matsɛmɛ a matsɛ, nɛ e se nyɛɛli ɔmɛ ji nihi nɛ Mawu tsɛ, nɛ e hla mɛ ngɔ to, nɛ a yeɔ lɛ anɔkuale.”

¹⁵ Bɔfo ɔ ya nɔ nɛ e de mi ke, “Nyu kpekpemi ɔ nɛ o na nɛ yo ajuama a hii si ngɛ nɔ ɔ daa si ha mahi, je mahi, nimli slɔɔtoslɔɔtohi, kɛ gbi munomunohi.

¹⁶ Koli nyɔngma amɛ nɛ o na a, kɛ lohwe awi yelɔ ɔ maa te si ngɔ wo yo ajuama a; a maa ngɔ e níhi tsuo nɛ e ngɛ ɔ, nɛ e maa hɛɛ e he gu. A maa ye e he lo ɔ, nɛ a kɛ la ma kpata e hɛ mi pɛsɛpɛsɛ.

¹⁷ Matsɛmɛ nyɔngma amɛ nɛ a maa pee enɛ ɔ, ejakaa Mawu ha nɛ a to a yi mi kaa a pee nɔ́ nɛ e to kaa a pee ɔ. Lɔ ɔ he ɔ, mɛ tsuo a maa kplɛɛ kaa a maa ngɔ a tsɛ yemi blɔ nya a kɛ ha lohwe awi yelɔ ɔ kɛ yaa si yi mi nɛ Mawu to ɔ maa ba mi.

¹⁸ “Yo ɔ nɛ o na a daa si ha ma kpetekpleenyɛ ɔ nɛ e matsɛ ɔ yeɔ ma amɛ tsuo a nɔ ngɛ je ɔ mi ɔ.”