Kpojemi 14 - BAIBLO ALOO NGMAMI KLƆUKLƆU Ɔ

To bi ɔ kɛ Mawu ni ɔmɛ

¹ Jehanɛ ɔ, i hyɛ, nɛ i na To bi ɔ nɛ daa si ngɛ Zion yo ɔ nɔ, kɛ nimli 144,000. A ngma To bi ɔ, kɛ e Tsɛ ɔ tsuo a biɛ ngɛ nimli nɛ ɔmɛ a ti nɔ tsuaa nɔ hɛ nya.

² Kɛkɛ nɛ i nu gbi ko nɛ ngɛ pɛe ngɛ hiɔwe kaa pa nɛ hia kɛ bee, loo hiɔwe nɛ ngɛ sie wawɛɛ. Gbi nɛ i nu ɔ ngɛ kaa bɔ nɛ ke kpa saku fiali ngɛ saku fiae nɛ e pɛɛ ɔ.

³ Nimli 144,000 ɔ daa si ngɛ matsɛ sɛ ɔ, kɛ hɛ kali eywiɛ ɔmɛ, kɛ nikɔtɔma amɛ a hɛ mi, nɛ a ngɛ la he ko lae. Nɔ ko nɔ ko nyɛ we nɛ e kase la nɛ ɔ ngɛ je ɔ mi tsuo, ja mɛ nimli 144,000 ɔ nɛ Mawu he a yi wami ɔ.

⁴ Ni nɛ ɔmɛ ji nyumuhi nɛ a kɛ yihi fiɛ we yakayaka fiɛmi, nɛ a ble we a he; a he tsɔ. He tsuaa he nɛ To bi ɔ yaa a, a kɛ lɛ yaa. Mɛ pɛ ji nihi nɛ Mawu he a yi wami ngɛ je ɔ mi tsuo. Mawu kɛ To bi ɔ a nihi ji nimli nɛ ɔmɛ; a ngɛ kaa kekleekle tso yiblii nɛ a hla ngɔ to ha Mawu.

⁵ A yi lakpa hyɛ; sé ko be a he.

Mawu bɔfo etɛ ɔmɛ

⁶ Jehanɛ ɔ, i na bɔfo kpa nɛ te ngɛ hiɔwe lokoo kɛ bee. E hɛɛ sɛ gbi ko nɛ ngɛ kɛ yaa neneene. Sɛ gbi ɔ kɔɔ sane kpakpa a he, nɛ e yaa nɛ e ya fiɛ sɛ gbi nɛ ɔ ha nihi tsuo nɛ ngɛ je ɔ mi, mahi kɛ wɛtsohi, kɛ gbihi kɛ nimli tsuo.

⁷ Bɔfo ɔ de kɛ gbi nɛ wa ke, “Nyɛɛ ye Mawu gbeye, nɛ nyɛɛ wo e hɛ mi nyami! Ejakaa be ɔ su nɛ e maa kojo nihi tsuo nɛ ngɛ je ɔ mi. Nyɛ ja nɔ nɛ pee hiɔwe kɛ zugba, kɛ wo kɛ nyu hɛngmɛhi nɛ baa a!”

⁸ Bɔfo enyɔne ba ngɛ kekleekle nɔ́ ɔ se, nɛ e ngɛ dee ke, “Babilon hɛ mi kpata! Babilon ma kpetekpleenyɛ ɔ hɛ mi kpata! Babilon yakayaka ní peemi ɔmɛ ha nɛ je ɔ tsuo puɛ; e ngɛ kaa dã nɛ nya wa nɛ e ha mɛ nɛ a nu.”

^9-10 Mawu bɔfo etɛne ba ngɛ Mawu bɔfo enyɔ ɔmɛ a se. Nɛ e de kɛ gbi wawɛɛ ke, “Nihi tsuo nɛ jaa lohwe awi yelɔ ɔ, kɛ e we amaga a, nɛ a kɛ amaga a kadi a hɛ nya, loo a nine he ɔ, ja a nu wai nɛ daa si ha Mawu mi mi fumi ɔ. Enɛ ɔ ji wai ngmingmiingmi nɛ Mawu nitsɛ plɛ kɛ wo kplu nɛ daa si ha e mi mi fumi ɔ mi. A ma pii nimli nɛ ɔmɛ hulɔ ngɛ la nɛ ngɛ tsoe gegeege ɔ mi ngɛ Mawu bɔfo klɔuklɔu ɔmɛ, kɛ To bi ɔ a hɛ mi.

¹¹ La a nɛ a ma pii mɛ ngɛ mi ɔ maa tso gegeege kɛ maa ya neneene. He jɔmi ko be ha nihi nɛ jaa lohwe awi yelɔ ɔ kɛ e we amaga a, loo ni nɛmɛ nɛ a kɛ e biɛ kadi mɛ ɔ; a maa na nɔ́ nyɔ kɛ pia tsuo.”

¹² Enɛ ɔ tsɔɔ kaa e hia kaa ni klɔuklɔu ɔmɛ nɛ yeɔ Mawu mlaa amɛ a nɔ, nɛ a heɔ Yesu yeɔ anɔkuale mi ɔ nɛ a to a tsui si daa.

¹³ Nɛ i nu gbi ko kɛ je hiɔwe nɛ ngɛ dee ke, “Ngmaa: A gbaa gbogboehi nɛ gboɔ ngɛ Nyɔmtsɛ ɔ mi kɛ je mwɔnɛ ɔ kɛ yaa nɛ ɔ.” “Ee!” Mumi ɔ ngɛ dee ke, “A maa jɔɔ a he kɛ je a dengme gbomi ɔ mi; se a ní tsumi ɔmɛ nyɛɛɔ a se.”

Nyagbe kojomi ɔ he nina

¹⁴ Enɛ ɔ se ɔ, i hyɛ nɛ i na bɔku hiɔ, nɛ nɔ ko hii si ngɛ nɔ kaa Nɔmlɔ Bi ɔ. Sika tsu jlasi fi e yi, nɛ e hɛɛ ngma kpami ha nɛ nya ba ngɛ e dɛ mi.

¹⁵ Kɛkɛ nɛ bɔfo kpa je sɔlemi we ɔ kɛ ba, nɛ e kpa ngmlaa wawɛɛ nɛ e de nɔ nɛ hii si ngɛ bɔku ɔ nɔ ɔ ke, “Ngɔɔ o ngma kpami ha a nɛ o kɛ kpa ní! Jehanɛ lɛɛ ní ba saminya ngɛ zugba a nɔ, nɛ be su nɛ a ma kpa ní!”

¹⁶ Kɛkɛ nɛ nɔ nɛ hii si ngɛ bɔku ɔ nɔ ɔ bɔni ní tsumi kɛ e ngma kpami ha a, nɛ e poo ngma a tsuo ngɛ je ɔ mi.

¹⁷ Jehanɛ ɔ, i na bɔfo kpa nɛ je sɔlemi we ɔ ngɛ hiɔwe kɛ ma. Lɛ hu e hɛɛ ngma kpami ha nɛ nya ba.

¹⁸ Bɔfo kpa hu nɛ ngɛ he wami ngɛ la nɔ je bɔ sami la tɛ ɔ he kɛ ba. E kpa ngmlaa wawɛɛ nɛ e de bɔfo ɔ nɛ hɛɛ ngma kpami ha nɛ nya ba a ke, “Ngɔɔ o ha nɛ nya ba a kɛ poo wai yiblii ɔmɛ, nɛ o bua nya. Wai yiblii ɔmɛ fu ngɛ ngmɔ ɔ nɔ.”

¹⁹ Kɛkɛ nɛ bɔfo ɔ bɔni ní tsumi ngɛ zugba a nɔ kɛ e ngma kpami ha a. E poo wai yiblii ɔ ngɛ ngmɔ ɔ nɔ, nɛ e sake ngɔ pue wai ngami nɔ́ kpetekpleenyɛ ɔ mi. Enɛ ɔ tsɔɔ bɔ nɛ Mawu maa gbla yayami peeli a tue.

²⁰ A nga wai yiblii ɔ ngɛ wai ngami nɔ́ ɔ mi ngɛ ma a nya. Nɛ muɔ je wai ngami nɔ́ ɔ mi be kaa pa; e kami maa pee si tomi lafa enyɔ, nɛ e mi kuɔmi hu maa pee nane enuɔ.