Kpojemi 12 - BAIBLO ALOO NGMAMI KLƆUKLƆU Ɔ

Yo ɔ kɛ sinɔ nguaa a

¹ Enɛ ɔ se ɔ, nyakpɛ okadi nguaa ko je kpo ngɛ hiɔwe. I na yo ko; tade nɛ e wo ji pu. Nɛ nyɔhiɔ ngɛ e nane si, nɛ jlasi kɛ e mi dodoe nyɔngma kɛ enyɔ fi e yi.

² Yo ɔ fɔmi be su, nɛ e nu kɔɔmi nɛ nya wa. Enɛ ɔ ha nɛ e bɔni ngmlaa kpami.

³ Nyakpɛ okadi nguaa kpa ko hu je kpo ngɛ hiɔwe. I na wo mi sinɔ nguaa ko. E ngɛ yi kpaago, kɛ koli nyɔngma, nɛ jlasi fi yi tsuaa yi.

⁴ Sinɔ ɔ ngɔ e hlemi kɛ gbla dodoehi nɛ ngɛ hiɔwe ɔ a mi dlami etɛ mi kake, nɛ e hɛ mɛ ngɔ pue zugba. Kɛkɛ nɛ e ya da yo nɛ miɔ nɛ e ma fɔ ɔ hɛ mi, konɛ ke e fɔ pɛ nɛ lɛ sinɔ ɔ nɛ ye bi ɔ.

⁵ Yo ɔ ba fɔ binyumu, nɔ nɛ maa ye je ɔ tsuo nɔ kɛ he wami kpetekpleenyɛ. Se bɔfo ko ba ngɔ bi nɛ ɔ kɛ ho Mawu ngɔ ya ngɛ e matsɛ sɛ ɔ nɔ.

⁶ Yo ɔ tu fo kɛ ho nga nɔ ya ngɛ he ko nɛ Mawu dla ngɔ to lɛ, nɛ a ya hyɛ e nɔ ligbi akpe kɛ e nya lafa enyɔ kɛ nyingmi ekpa.

⁷ Jehanɛ ɔ, ta ba te si ngɛ hiɔwe. Bɔfo nguaa a nɛ a tsɛɛ lɛ Mikael ɔ, kɛ e bɔfo ɔmɛ ya tua sinɔ nguaa a, nɛ sinɔ nguaa a, kɛ lɛ hu e bɔfo ɔmɛ kɛ mɛ hwu.

⁸ Se a ye sinɔ nguaa a, kɛ e bɔfo ɔmɛ a nɔ, nɛ a ngmɛ́ mɛ blɔ nɛ a hi hiɔwe hu.

⁹ A sake sinɔ nguaa a ngɔ fɔ he. Ee, jamɛ a blema sinɔ nguaa a nɛ a tsɛɛ lɛ Abosiami, loo Satan nɛ sisi nihi tsuo ngɛ je ɔ mi ɔ, a sake lɛ kɛ e bɔfo ɔmɛ tsuo ngɔ fɔ je ɔ mi.

¹⁰ Kɛkɛ nɛ i nu gbi ko nɛ ngɛ pɛe kɛ ngmlaa ngɛ hiɔwe ke, “Jehanɛ ɔ lɛɛ yi wami hemi ba! Jehanɛ ɔ lɛɛ Mawu maa ngɔ e he wami kpetekpleenyɛ ɔ kɛ ye matsɛ! Jehanɛ ɔ lɛɛ e Kristo he wami ɔ je kpo. Ejakaa Abosiami nɛ daa si ngɛ wa Mawu ɔ hɛ mi nyɔ kɛ pia, nɛ e poɔ wa nyɛmimɛ ɔmɛ a nya haa lɛ ɔ be lejɛ ɔ hu. A sake Abosiami kɛ je hiɔwe ngɔ fɔ si.

¹¹ Wa nyɛmimɛ ɔmɛ ye e nɔ kunimi kɛ gu To bi ɔ muɔ ɔ, kɛ odase ɔ nɛ a ye ɔ nɔ. A de we ke a maa baa mɛ nitsɛmɛ a wami yi, se mohu a suɔ kaa a maa ngɔ a wami tete ngɔ ha, nɛ a gbe mɛ.

¹² Lɔ ɔ he ɔ, nyɛ nihi tsuo nɛ nyɛ ngɛ hiɔwe ɔ, nyɛ bua nɛ jɔ! Se je ɔ, kɛ wo, nyɛɛ lɛɛ musu tloo nyɛ! Abosiami kple si kɛ ba nyɛ ngɔ. E mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.”

¹³ Benɛ sinɔ nguaa a na kaa a sake lɛ ba fɔ zugba a nɔ ɔ, e nyɛɛ yo ɔ nɛ fɔ binyumu ɔ se kɛ fo.

¹⁴ Se a ha yo ɔ kɔle nguaa a pɛli enyɔ ɔmɛ, konɛ e kɛ tu fo kɛ ya e hi he ɔ ngɛ nga a nɔ. A maa hyɛ e nɔ ngɛ lejɛ ɔ jeha etɛ kɛ fa, nɛ sinɔ nguaa a nine be e nɔ sue.

¹⁵ Kɛkɛ nɛ sinɔ nguaa a sú nyu kaa pa kɛ je e nya mi kɛ pue yo ɔ se, konɛ nyu ɔ nɛ ngɔ lɛ kɛ ho.

¹⁶ Se zugba a ye bua yo ɔ; zugba a bli e nya mi, nɛ e mii nyu nɛ sinɔ nguaa a sú kɛ je e nya mi pue si ɔ.

¹⁷ Sinɔ nguaa a mi mi fu yo ɔ, nɛ e pue nɔ kɛ ho, konɛ e kɛ yo ɔ nina nɛ piɛ ɔ, nihi tsuo nɛ yeɔ Mawu mlaa amɛ a nɔ, kɛ ni nɛmɛ hu nɛ fiɛɔ sɛ gbi ɔ nɛ kɔɔ Yesu he ɔ ya hwu ta.

¹⁸ Nɛ sinɔ nguaa a ya da si ngɛ wo ɔ nya.