Kpojemi 1 - BAIBLO ALOO NGMAMI KLƆUKLƆU Ɔ

¹ Ní komɛ nɛ Yesu Kristo je tsɔɔ ɔ, a he sane lɛ ngɛ womi nɛ ɔ mi. Mawu je nina a ngɔ tsɔɔ Kristo, konɛ lɛ hu e tsɔɔ e tsɔli ɔmɛ nɔ́ nɛ maa ba mi ngɛ be kpiti mi. Kristo tsɔ e bɔfo ɔ kɛ ya e tsɔlɔ Yohane ngɔ, nɛ e ya ha nɛ e le ní nɛ ɔmɛ tsuo.

² Níhi nɛ Yohane na a, e ye lɛ tsuo he odase ngɛ womi nɛ ɔ mi. Enɛ ɔ ji sɛ gbi nɛ je Mawu ngɔ ɔ, kɛ anɔkuale ɔ nɛ Yesu Kristo je tsɔɔ lɛ ɔ.

³ A gbaa nɔ nɛ kaneɔ womi nɛ ɔ. Nihi nɛ nuɔ sɛ gbi nɛ a gba ngɔ to ngɛ womi nɛ ɔ mi, nɛ a yeɔ nɔ ɔ, á gbaa mɛ. Ejakaa be ɔ nɛ ní nɛ ɔmɛ tsuo maa ba mi ɔ su ta.

Yohane ngɔ sɛ gbi ngɔ mane asafo kpaago ɔmɛ

⁴ Imi Yohane nɛ i ngma womi nɛ ɔ ya ha asafo kpaago ɔmɛ ngɛ Asia. Dloomi kɛ he jɔmi nɛ je Mawu, nɔ nɛ ngɛ kɛ je blema, nɔ nɛ ngɛ amlɔ nɛ ɔ, nɛ e maa ba a dɛ mi ɔ ha nyɛ. Jehanɛ ɔ, mumi kpaago ɔmɛ nɛ ngɛ Mawu matsɛ sɛ ɔ hɛ mi ɔ,

⁵ kɛ Yesu Kristo nɛ yeɔ anɔkuale odase ɔ, nɛ lɛ ji kekleekle nɔ nɛ Mawu tle si kɛ je gbeje, nɛ lɛ nɛ e yeɔ zugba a nɔ matsɛmɛ ɔmɛ a nɔ ɔ nɛ dloo nyɛ, nɛ e ha nyɛ he jɔmi ja nɔuu. Nɔ nɛ suɔ wɔ, nɛ e kɛ lɛ nitsɛ e muɔ kpɔ wɔ kɛ je wa he yayami ɔmɛ a mi, nɛ

⁶ e to matsɛ yemi sisi ha wɔ, nɛ e pee wɔ osɔfohi, konɛ wa sɔmɔ e Tsɛ Mawu ɔ, nyɛ ha waa wo e hɛ mi nyami, nɛ e ye matsɛ kɛ ya neneene kɛ neneene. Amen.

⁷ Hyɛ! E ngɛ bɔku ɔmɛ a mi kɛ ma, nɛ nɔ tsuaa nɔ maa na lɛ; nihi nɛ gbɔɔ lɛ ní ɔ hu maa na lɛ. Nihi tsuo nɛ ngɛ je ɔ mi ɔ maa wo yana ha lɛ. Ee, é ba mi ja! Amen.

⁸ Nyɔmtsɛ Mawu Ope ɔ, nɔ nɛ ngɛ sa a, nɛ e ngɛ amlɔ nɛ ɔ, nɛ e maa ba a ke, “Imi ji kekleekle no kɛ nyagbe no.”

Yohane na Kristo nɛ ngɛ matsɛ yee

⁹ Imi nyɛ nyɛmi Yohane lɛ i ngma womi nɛ ɔ. Kaa Kristo se nyɛɛlɔ ɔ, a ngɛ mi yi mi wae kaa nyɛ nɔuu. I kɛ nyɛ tsuo nɛ wa ngɛ Kristo matsɛ yemi ɔ blɔ hyɛe, nɛ e sa kaa waa to wa tsui si ngɛ amanehlu nɛ wa ngɛ nae ɔ mi. A ngɔ mi ya fɔ Patmo zugba kpɔ nɛ wo bɔle lɛ ɔ nɔ, ejakaa i fiɛ Mawu munyu ɔ, nɛ i ye Yesu he odase.

¹⁰ Nyɔmtsɛ ɔ ligbi ɔ, mumi ɔ ba ye nɔ, nɛ i nu gbi ko nɛ ngɛ pɛe wawɛɛ kaa titimati ngɛ ye se.

¹¹ Gbi ɔ de ke, “Ngmaa nɔ́ nɛ o na a ngɔ wo womi mi, nɛ o kɛ mane asafohi nɛ ngɛ ma kpaago nɛ ɔmɛ a mi: Efeso, Smirna, Pergamo, Tiatira, Sarde, Filadelfia, kɛ Laodikea.”

¹² I plɛ ye he, konɛ ma hyɛ nɔ nɛ kɛ mi ngɛ munyu tue ɔ. Nɛ benɛ i plɛ ɔ, i na sika tsu kane tso kpaago,

¹³ nɛ nɔ ko kaa Nɔmlɔ Bi ɔ ngɛ a kpɛti. E wo tade klɔii, nɛ e ngɔ kpa nɛ a kɛ sika tsu pee kɛ fi e gugue.

¹⁴ E yi bwɔmi hiɛ futaa kaa to he bwɔmi hiɔ, loo snoo; nɛ e hɛngmɛ ngɛ kpɛe plamplam kaa la.

¹⁵ E nane ngɛ kpɛe kaa ayawa nɛ a tsu he ngɛ flɔɔnɔɔ mi, nɛ e gbi ngɛ pɛe wawɛɛ kaa pa nɛ hia kɛ bee.

¹⁶ E hɛɛ dodoe kpaago ngɛ e hiɔ nine mi, nɛ klaate nya enyɔtsɛ nɛ nya ba ngɛ e nya mi, nɛ e hɛ mi ngɛ kpɛe kaa piani pu.

¹⁷ Benɛ i na lɛ ɔ, i nɔ si ngɛ e nane nya kaa nɔ gbogboe. Se e ngɔ e hiɔ nine ngɔ fɔ ye nɔ, nɛ e de mi ke, “Koo ye gbeye! Imi ji kekleekle no kɛ nyagbe no.

¹⁸ Imi ji hɛ kalɔ ɔ! I gbo, se hyɛ, ye hɛ ngɛ kɛ yaa neneene. I ngɛ gbenɔ kɛ gbeje a nya safe.

¹⁹ Lɔ ɔ he ɔ, ngmaa nɔ́ nɛ o na nɛ ngɛ nɔ yae amlɔ nɛ ɔ, kɛ nɔ́ nɛ maa ba hwɔɔ se ɔ.

²⁰ Dodoe kpaago ɔmɛ nɛ o na ngɛ ye hiɔ nine mi, kɛ sika tsu kane tso kpaago ɔmɛ ɔ, laami sane nɛ kɔɔ a he ji nɛ ɔ nɛ: dodoe kpaago ɔmɛ daa si ha asafo kpaago ɔmɛ a bɔfohi, nɛ kane tso kpaago ɔmɛ daa si ha asafo kpaago ɔmɛ.”