Kolosebi 4 - BAIBLO ALOO NGMAMI KLƆUKLƆU Ɔ

¹ Nyɔmtsɛmɛ, nyɛɛ hɛɛ nyɛ nyɔguɛ ɔmɛ saminya ngɛ blɔ nɛ da nɔ. Nyɛ na nyɛɛ le kaa nyɛ hu nyɛ ngɛ Nyɔmtsɛ ngɛ hiɔwe.

Ga womi

² Nyɛɛ ya nɔ nyɛɛ sɔle daa, nɛ nyɛ hɛ nɛ hi nyɛ he nɔ, nɛ nyɛɛ na Mawu si.

³ Nyɛɛ sɔle ha wɔ hulɔ, konɛ Mawu nɛ bli blɔ ha wɔ nɛ waa fiɛ e sɛ gbi nɛ kɔɔ Kristo he ɔ. Ejakaa Kristo laami sane nɛ ɔ he nɛ a wo mi tsu ngɛ.

⁴ Lɔ ɔ he ɔ, nyɛɛ sɔle nɛ ma gba laami sane nɛ ɔ mi saminya bɔ nɛ sa kaa ma gba mi.

⁵ Be tsuaa be nɛ nyɛɛ kɛ nihi nɛ he we Kristo yi ma bua a, nyɛɛ ba nyɛ je mi saminya, konɛ a na kaa nyɛɛ lɛɛ nyɛ le Kristo.

⁶ Ke nyɛɛ kɛ nihi ngɛ ní sɛɛe ɔ, nyɛ ha nɛ munyu nɛ maa je nyɛ nya a nɛ ngɔ kaa nɔ́ ko nɛ a wo lɛ ngo, nɛ nyɛɛ le bɔ nɛ nyɛ ma ha nɔ tsuaa nɔ munyu heto bɔ nɛ sa.

Nyagbe sɛ yemi

⁷ Wa nyɛmi Tihiko nɛ wa suɔ lɛ saminya, nɛ e yeɔ anɔkuale ngɛ sɔmɔmi ní tsumi nɛ waa kɛ lɛ ngɛ tsue ha Nyɔmtsɛ ɔ mi ɔ ma ba bɔ nyɛ níhi tsuo nɛ kɔɔ ye he.

⁸ Enɛ ɔ he i ngɛ lɛ nyɛ ngɔ tsɔe, konɛ nyɛɛ nu wa he, bɔ nɛ wa ngɛ ha, konɛ nyɛ hu e ba wo nyɛ bua.

⁹ Onesimo piɛ e he kɛ ma. Lɛ hu wa nyɛmi nɛ wa suɔ saminya, nɛ yeɔ Kristo anɔkuale ji lɛ; nɛ e je nyɛ asafo ɔ mi. A ma ba bɔ nyɛ hiɛmɛ nɛ ɔ amaniɛ tsuo.

¹⁰ Aristarko nɛ a wo i kɛ lɛ tsuo tsu ɔ ke e biɔ nyɛ. Barnaba nyɛmi Marko hu ke e biɔ nyɛ. Nyɛ nine su womi nɔ momo kaa ke Marko ba nyɛ ngɔ ɔ, nyɛ he lɛ atuu.

¹¹ Yoshua nɛ a tsɛɛ lɛ Yusto hulɔ ɔ ke lɛ hu e biɔ nyɛ. Ni etɛ nɛ ɔmɛ pɛ ji Yuda bi nɛ ba he Kristo ye, nɛ a kɛ mi ngɛ ní tsue ngɛ hiɛ ɔ ngɛ Mawu matsɛ yemi ɔ he. Niinɛ, a ngɛ mi wae wawɛɛ nitsɛ.

¹² Epafra, nyɛ kpɛti no kpa nɛ lɛ hu e tsuɔ ní ha Kristo Yesu ɔ ke e biɔ nyɛ. Daa nɛ ɔ, e ngɛ sɔlee ha nyɛ kɛ e tsui tsuo. E ngɛ e he gbee kaa Mawu nɛ ha nɛ nyɛɛ hɛɛ hemi kɛ yemi ɔ mi wawɛɛ kaa Kristo se nyɛɛli kpakpahi, nihi nɛ heɔ Yesu yeɔ kɛ a tsui tsuo, nɛ a peeɔ Mawu suɔmi nya ní sisiisi.

¹³ I ngɛ e he odase yee kaa e gbo dengme saminya ngɛ nyɛɛ kɛ nihi nɛ ngɛ Laodikea, kɛ Hierapoli ɔ nyɛ he.

¹⁴ Luka, tsopatsɛ ɔ nɛ wa suɔ lɛ saminya a, kɛ Dema ke a biɔ nyɛ.

¹⁵ Nyɛ de nyɛmimɛ ɔmɛ nɛ ngɛ Laodikea ke wa biɔ mɛ. Wa biɔ Nimfa, kɛ asafo ɔ nɛ kpee ngɛ e we ɔ mi ɔ hulɔ.

¹⁶ Ke nyɛ kane womi nɛ ɔ gbe nya a, nyɛ ha nɛ a kane ngɔ ha Laodikea asafo ɔ hulɔ. Womi nɛ i sɛ hlami ngma mane Laodikea asafo ɔ, nyɛ hu nyɛɛ kane.

¹⁷ Jehanɛ ɔ, nyɛ de Arkipo ke, “Ní tsumi ɔ nɛ a tu ngɔ wo o dɛ ke o tsu ha Nyɔmtsɛ ɔ, hyɛ nɛ o tsu kɛ gbe nya.”

¹⁸ Imi Paulo nitsɛ ye nine nya womi nɛ i ngma kaa i biɔ nyɛ ji nɛ ɔ nɛ. Nyɛ hɛ ko je nɔ kaa i ngɛ kɔsɔkɔsɔ mi kɛ mwɔɔ. Mawu dloomi ɔ kɛ nyɛ tsuo nɛ hi si.