Kolosebi 3 - BAIBLO ALOO NGMAMI KLƆUKLƆU Ɔ

¹ A tle nyɛɛ kɛ Kristo tsuo si, lɔ ɔ he ɔ, nyɛ hla níhi nɛ ngɛ hiɔwe, he nɛ Kristo hii si ngɛ Mawu hiɔ nɔ ngɛ ɔ.

² Níhi nɛ ngɛ hiɔwe ɔ, lɔ ɔmɛ a he nyɛ susu; pi nihi nɛ ngɛ zugba a nɔ.

³ Ejakaa nyɛ ngɛ kaa nihi nɛ gbo, nɛ a ngɔ nyɛ wami ɔ kɛ Kristo tsuo ngɔ laa ngɛ Mawu mi.

⁴ Kristo ji nyɛ wami. Nɛ ke e ba ekohu ɔ, nyɛɛ kɛ lɛ tsuo maa hi lejɛ ɔ; nɛ a maa wo nyɛɛ kɛ lɛ tsuo nyɛ hɛ mi nyami.

Wa mi momo kɛ wami he ɔ

⁵ Lɔ ɔ he ɔ, je nɛ ɔ mi akɔnɔ níhi nɛ haoɔ nyɛ, yo kɛ nyumu yakayaka fiɛmi, mu ní tsumi, mi mi la, akɔnɔ yaya, kɛ hɛ tsumi nɛ ngɛ kaa amaga jami ɔ, nyɛɛ gbe.

⁶ Nihi nɛ gboɔ tue, nɛ a peeɔ kikɛmɛ a ní nɛ ɔmɛ ɔ, Mawu kɛ mi mi fumi ma kple a nɔ.

⁷ Sa a, be nɛ nyɛ nitsɛmɛ hu nyɛ ba nyɛ je mi ja a, kikɛmɛ a akɔnɔ nɛ ɔmɛ nɔuu a se nyɛ ya nyɛɛ.

⁸ Se jehanɛ ɔ lɛɛ nyɛ kpa ní nɛ ɔmɛ tsuo: mi mi la, mimi fumi, kɛ yi wu tso ní peemi. Nyɛ ko gbe nɔ he guɛ, nɛ munyu yaya ko kó je nyɛ nya.

⁹ Nyɛ ko ye nyɛ sibi lakpa; nyɛ sake nɔmlɔ su momo ɔ, kɛ e ní tsumi ɔmɛ ngɔ pue.

¹⁰ Nyɛɛ wo nɔmlɔ su he. Nɔmlɔ su he nɛ ɔ ji nɔ́ nɛ Mawu, e bɔlɔ ɔ ngɛ mɔde bɔe daa nɛ kaa e maa hi kaa bɔ nɛ lɛ Mawu ɔ ngɛ ɔ, kɛkɛ nyɛ maa le lɛ fitsofitso.

¹¹ Ngɛ enɛ ɔ mi ɔ, slɔɔto ko be Hela no kɛ Yuda no a kpɛti; slɔɔto be nɔ nɛ a po lɛ, kɛ mɔmlɔtɔtsɛ a kpɛti. Kɔpe no be ɔ, futufutu no be; nyɔguɛ be ɔ, odehe ko hu be. Nɔ nɛ he hia ji Kristo; nɛ nɔ́ tsuaa nɔ́ nɛ hɛ ngɛ ɔ, Kristo ngɛ e mi.

¹² Mawu nihi nɛ e hla, nɛ e suɔ ji nyɛ, nɛ nyɛ ngɛ klɔuklɔu. Lɔ ɔ he ɔ, nyɛ ha nɛ a na subai nɛ ɔmɛ ngɛ nyɛ he kaa tade nɛ nyɛ wo: mi mi jɔmi, mɔbɔ nami, he si bami, kpoo peemi, kɛ tsui si tomi.

¹³ Ke nɔ ko kɛ e nyɛmi ngɛ sane ko ɔ, nyɛɛ na ha nyɛ sibi, nɛ nyɛ kɛ pa nyɛ he kaa bɔ nɛ Nyɔmtsɛ ɔ hu ngɔ nyɛ he yayami ngɔ pa nyɛ ɔ.

¹⁴ Enɛ ɔmɛ tsuo a se ɔ, nyɛ ha suɔmi nɛ pee kaa tade nɛ nyɛ wo, ejakaa suɔmi ngɛ kaa kpa nɛ fiɔ níhi tsuo ngɔ peeɔ kake, nɛ lɛ tsuo peeɔ pɛ.

¹⁵ He jɔmi nɛ Kristo haa a, nyɛ ha nɛ a na kaa e ngɛ ní tsue ngɛ nyɛ tsui mi. Ejakaa nyɛ nɛ nyɛ ngɛ nɔmlɔ tso kake ɔ mi ɔ, ní tsumi nɛ Mawu kpee nyɛ ke nyɛ ba tsu ɔ ji nɛ ɔ nɛ. E sa nɛ nyɛɛ na Mawu si.

¹⁶ Nyɛ ha nɛ Kristo sɛ gbi ɔ nɛ hyi nyɛ fuu. Nyɛɛ tsɔɔ nyɛ he ní, nɛ nyɛɛ wo nyɛ sibi ga kɛ juɛmi nɛ mi kuɔ. Nyɛ la La womi ɔ mi lahi, yi jemi lahi, kɛ mumi mi lahi kɛ je nyɛ tsui mi nɛ nyɛ kɛ na Mawu si.

¹⁷ Lɔ ɔ he ɔ, nɔ́ tsuaa nɔ́ kɛ mumi lahi kɛ je nyɛ tsui mi, nɛ nyɛ ngɛ pee; munyu lɛ nyɛ ngɛ tue jio, ní nyɛ ngɛ tsue jio, nyɛɛ pee ngɛ Nyɔmtsɛ Yesu biɛ mi. Nɛ nyɛɛ gu e nɔ kɛ na Tsɛ Mawu ɔ si.

Wami he ɔ mi si himi

¹⁸ Yigbayi, nyɛɛ ba nyɛ he si ha nyɛ hunomɛ, ejakaa nɔ́ nɛ sa nyɛ peemi kaa Nyɔmtsɛ ɔ se nyɛɛli ji nɛ ɔ nɛ.

¹⁹ Nyɛ hunomɛ, nyɛɛ suɔ nyɛ yi ɔmɛ, nɛ nyɛ ko wa mɛ yi mi.

²⁰ Bimɛ, nyɛɛ bu nyɛ fɔli ngɛ nɔ́ tsuaa nɔ́ mi, ejakaa enɛ ɔ saa Mawu hɛ mi saminya.

²¹ Tsɛmɛ, nyɛ ko wo nyɛ bimɛ a mi mi la; ke nyɛ pee ja a, a nine mi maa wo nyu.

²² Nyɔguɛhi, nyɛɛ bu nyɛ je nɛ ɔ mi nyɔmtsɛmɛ ɔmɛ ngɛ nɔ́ tsuaa nɔ́ mi, pi kɛ hɛ mi sɔmɔmi nɛ ma ha nyɛ nyɔmtsɛmɛ ɔmɛ maa suɔ nyɛ sane. Mohu ɔ, nyɛɛ bu mɛ kɛ je nyɛ tsui mi kaa nihi nɛ yeɔ Mawu gbeye.

²³ Nɔ́ tsuaa nɔ́ nɛ nyɛ ngɛ pee ɔ, nyɛɛ je nyɛ tsui mi kɛ pee kaa nɔ́ nɛ Nyɔmtsɛ ɔ nyɛ ngɛ pee ha, se pi adesa.

²⁴ Nyɛ na nyɛɛ le kaa nike ní nɛ Mawu ngɔ to ha ni klɔuklɔu ɔmɛ ɔ, nyɛ nine maa su nyɛ hu nyɛ nɔ́ nɔ kaa nyɛ hiɔwo, ejakaa Nyɔmtsɛ Kristo nyɛ ngɛ sɔmɔe.

²⁵ Nɔ tsuaa nɔ nɛ peeɔ nɔ́ nɛ dɛ ɔ ma na e yayami ɔ he hiɔwo, ejakaa Mawu hyɛ we nɔ hɛ mi.