Kolosebi 2 - BAIBLO ALOO NGMAMI KLƆUKLƆU Ɔ

¹ Dengme babauu nɛ i gbo ngɛ nyɛɛ kɛ nihi nɛ ngɛ Laodikea, kɛ jehanɛ ni nɛmɛ nɛ li mi hɛ mi kɛ hɛ mi po ɔ tsuo nyɛ he ɔ, i suɔ kaa nyɛɛ le.

² I ngɛ enɛ ɔ pee nɛ ma kɛ wo mɛ bua, konɛ suɔmi nɛ ha a pee kake. Kɛkɛ ɔ, a maa nu ní kpakpahi nɛ a mi kuɔ ɔ tsuo a sisi saminya nɛ nɔ jemi be mi, nɛ a maa le Mawu laami sane ɔ. Mawu laami sane ɔ ji Kristo ɔ nɛ.

³ Nile, kɛ juɛmi nɛ mi kuɔ ɔ, Kristo mi a naa ngɛ.

⁴ I ngɛ nyɛ enɛ ɔ dee, konɛ nɔ ko kɛ nyami ngɔngɔɛ munyu ko kó ba sisi nyɛ.

⁵ E ngɛ mi kaa he lo mi ɔ, i be nyɛ ngɔ lɛɛ, se mumi mi ɔ, i kɛ nyɛ ngɛ. Ke i hyɛ bɔ nɛ nyɛ toɔ níhi blɔ nya saminya, kɛ bɔ nɛ nyɛ fi si kpɛii ngɛ hemi kɛ yemi nɛ nyɛ ngɛ ngɛ Kristo mi ɔ mi ɔ, e peeɔ mi bua jɔmi.

Wami he ngɛ Kristo mi

⁶ Akɛnɛ nyɛ he Kristo Yesu kaa nyɛ Nyɔmtsɛ ɔ, nyɛɛ ya nɔ nyɛɛ kɛ lɛ nɛ pee kake.

⁷ Nyɛɛ ngɔ nyɛ he ngɔ mɛtɛ lɛ, nɛ nyɛɛ ngɔ nyɛ he kɛ ha lɛ kulaa. Nyɛ ha nɛ nyɛ hemi kɛ yemi ɔ mi nɛ wa kaa bɔ nɛ a tsɔɔ nyɛ ɔ, nɛ nyɛɛ na Mawu si daa.

⁸ Nyɛɛ hyɛ nɛ hi nɛ nɔ ko kó ngɔ je mi nile, loo yaka sisimi kɛ ye nyɛ nyɔguɛ. Blema tsɔɔmihi, kɛ mumihi nɛ yeɔ je ɔ nɔ ɔ, a ngɔ ní nɛ ɔmɛ je, se pi Kristo ngɔ.

⁹ Ejakaa bɔ nɛ Mawu su ngɛ tutuutu ɔ, lɔ ɔ wa naa ngɛ Kristo mi benɛ e ba ngɛ he lo mi ɔ nɛ.

¹⁰ Nyɛɛ kɛ Kristo pee kake, lɔ ɔ he ɔ, Kristo nɛ ji yi ha nɔ yeli tsuo ɔ su ngɛ nyɛ mi.

¹¹ Nɛ nyɛɛ kɛ Kristo pee kake ɔ, e tsɔɔ kaa a po nyɛ; pi he lo mi nɔ pomi. Mohu Kristo ha he lo nɛ ɔ we akɔnɔ nɛ nya wa a be nyɛ nɔ he wami hu.

¹² Nɛ a sɔle nyɛ ɔ, e tsɔɔ kaa a pu nyɛ ngɔ piɛ Kristo he; nɛ Mawu tle nyɛɛ kɛ Kristo tsuo si ekohu. Ejakaa nyɛ heɔ yeɔ kaa Mawu ngɛ he wami kpetekpleenyɛ, nɛ e tle Kristo si hulɔ.

¹³ Sa a, nyɛ ngɛ kaa ni komɛ nɛ gbo, ejakaa nyɛ peeɔ yayami, nɛ he lo nya a, a pui nyɛ. Se amlɔ nɛ ɔ, Mawu ha nɛ nyɛɛ kɛ Kristo tsuo ba wami mi ekohu; ee, Mawu ngɔ wɔ tsuo wa he yayami ɔmɛ ngɔ pa wɔ.

¹⁴ Wa he níhi nɛ a ngma kɛ si wɔ, kɛ nihi nɛ sa wɔ ngɛ mlaa a nya a, e gbe lɛ tsuo. E je nɔ́ nɛ ɔ se; ee, e ka ngɔ mɛtɛ sɛumi tso ɔ he.

¹⁵ Kristo kpɔ he wami ngɛ mumi mi nɔ yeli, kɛ he wami ɔmɛ a dɛ. E bɔ mɛ ahlua paa, nɛ e kɛ tsɔɔ je ɔ kaa niinɛ e ye kunimi.

¹⁶ Lɔ ɔ he ɔ, nyɛ ko ha nɔ ko nɛ wo nyɛ mlaa ngɛ nɔ́ nɛ nyɛ maa ye, kɛ nɔ́ nɛ nyɛ maa nu he, aloo ngɛ nyami be, Nyɔhiɔhe nyami be, kɛ Hejɔɔmi ligbi he.

¹⁷ Ní nɛ ɔmɛ tsuo ngɛ kaa níhi nɛ maa ba hwɔɔ se ɔ a nini kɛkɛ; nitsɛnitsɛ ɔ ji Kristo.

¹⁸ Nyɛ ko ha nɛ nihi nɛ buu a he kaa mɛɛ lɛɛ a hi pe nihi tsuo ɔ nɛ a bu nyɛ kaa nyɛɛ lɛɛ nyɛ be nɔ́ ko mi. A deɔ ke mɛɛ a naa nina pɔtɛɛ komɛ, nɛ a nyɛɔ nyɛ nɔ ke nyɛɛ kɛ he si bami nɛ ja bɔfohi. Kikɛmɛ a nimli nɛ ɔmɛ woɔ a he nɔ yaka gu.

¹⁹ Nɛ mɛɛ lɛɛ a mɛtɛ we Kristo nɛ ji yi ɔ he. Nɔmlɔ tso ɔ tsuo ɔ, yi ɔ mi e naa níhi tsuo nɛ hia lɛ ɔ kɛ jeɔ. Niye ní nɛ ɔ guɔ kpɔ ɔmɛ, kɛ pani ɔmɛ a mi, nɛ e haa nɔmlɔ tso ɔ waa bɔ nɛ Mawu to ɔ.

Ngɛ Kristo mi ɔ, wa gbo lɛɛ, se kɛ̃ wa hɛ ngɛ

²⁰ Nɛ Kristo gbo ɔ, nyɛ hu nyɛ gbo, nɛ a kpɔ nyɛ kɛ je mumihi nɛ yeɔ je ɔ nɔ ɔ a dɛ mi. Mɛni he je mɔ nɛ nyɛ peeɔ nyɛ ní kaa nɔ́ nɛ nyɛɛ kɛ je ɔ ngɛ bɔe kɛ mwɔɔ ɔ? Mɛni he je nyɛ haa a pa woɔ nyɛ mlaa ke,

²¹ “Koo pɛtɛ he, koo sa o nya, nɛ koo ta he tete po” ɔ?

²² Mlaa nɛ ɔmɛ tsuo kɔɔ níhi nɛ ke a tsu a he ní pɛ a hɛ mi kpata a a he. Adesa mlaahi, kɛ tsɔɔmihi kɛkɛ ji enɛ ɔmɛ.

²³ Niinɛ, ni komɛ susuɔ kaa kikɛmɛ a mlaa nɛ ɔmɛ tsɔɔ nile nɛ haa nɔ nitsɛ fiiɔ si ngɛ jami mi. A buá peeɔ a he humi, nɛ a waa nɔmlɔ tso ɔ yi mi kɛ tsɔɔ kaa Mawu lɛ a ngɛ jae. Anɔkuale mi ɔ, mlaa nɛ ɔmɛ nyɛ we nɛ a tsiɔ nɔmlɔ tso ɔ we akɔnɔ nya.