Kolosebi 1 - BAIBLO ALOO NGMAMI KLƆUKLƆU Ɔ

¹ Imi Paulo nɛ Mawu suɔmi nya nɛ i ba pee Kristo Yesu bɔfo ɔ, i kɛ wa nyɛmi Timoteo ngma womi nɛ ɔ

² mane ni klɔuklɔu ɔmɛ nɛ ji wa nyɛmimɛ nɛ ngɛ Kolose, nɛ yeɔ anɔkuale, nɛ a kɛ Kristo pee kake ɔ. Dloomi kɛ he jɔmi nɛ je wa Tsɛ Mawu ɔ dɛ mi ɔ ha nyɛ!

Sina sɔlemi

³ Ke wa ngɛ sɔlee ha nyɛ ɔ, wa naa Mawu, wa Nyɔmtsɛ Yesu Kristo Tsɛ ɔ si daa.

⁴ Ejakaa hemi kɛ yemi nɛ nyɛ ngɛ ngɛ Kristo Yesu mi, kɛ suɔmi nɛ nyɛɛ kɛ suɔ ni klɔuklɔu ɔmɛ tsuo ɔ, wa nu he.

⁵ Nyɛ nu momo kaa hɛ kɛ nɔ fɔmi ko ngɛ ha nyɛ, benɛ anɔkuale sɛ gbi nɛ ji sane kpakpa a ba su nyɛ ɔ. Lɔ ɔ he ɔ, nyɛ hemi kɛ yemi, kɛ nyɛ suɔmi nɛ ɔ daa si ngɛ nɔ́ nɛ nyɛ ngɔ nyɛ hɛ ngɔ fɔ nɔ kaa a kɛ to ha nyɛ ngɛ hiɔwe ɔ nɔ.

⁶ Sane kpakpa a ngɛ nɔ yae, nɛ e ngɛ yiblii woe ngɛ je ɔ mi tsuo. Kikɛ nɛ ɔ nɔuu e ngɛ ní tsue ngɛ nyɛ hu nyɛ mi kɛ je ligbi ɔ nɛ nyɛ nu Mawu dloomi ɔ he nɛ nyɛ nu sisi kaa bɔ nɛ e ngɛ anɔkuale mi ɔ.

⁷ Nyɛ kase Mawu dloomi sane nɛ ɔ kɛ je wa suɔlɔ Epafra nɛ waa kɛ lɛ ngɛ ní tsumi kake tsue ɔ nya. Lɛ hu Kristo sɔmɔlɔ anɔkualetsɛ ji lɛ; nɛ e ngɛ ní tsue ha wɔ.

⁸ Suɔmi nɛ mumi ɔ ha nyɛ ɔ, Epafra ba bɔ wɔ he sane.

⁹ Enɛ ɔ he ɔ, kɛ je ligbi ɔ nɛ wa nu nyɛ he ɔ kɛ ba si amlɔ nɛ ɔ, wa jɔɔ we Mawu pɛɛ kpami ha nyɛ. Wa biɔ ke Mawu nɛ ha nɛ nyɛɛ le e suɔmi nya ní, nɛ nyɛ ná nile, kɛ nɔ́ sisi numi nɛ mumi ɔ haa nɔ ɔ.

¹⁰ Kɛkɛ ɔ, nyɛ maa ba nyɛ je mi bɔ nɛ maa sa Nyɔmtsɛ ɔ hɛ mi. Nyɛ ma tsu ní kpakpa sɔuu, nɛ nyɛ maa le Mawu saminya pe bɔ nɛ nyɛ le lɛ daa.

^11-12 I kpaa Mawu pɛɛ, nɛ e kɛ e he wami nɛ hɛ mi ngɛ nyami ɔ nɛ wo nyɛ he wami, konɛ nyɛ nyɛ́ nɛ nyɛɛ to nyɛ tsui si kɛ na nɔ́, nɛ nyɛɛ kɛ bua jɔmi nɛ na Tsɛ ɔ si. Lɛ nɛ ha nɛ nyɛ ná he blɔ, nɛ gbosi ní nɛ lɛ Mawu ɔ ngɔ to ha ni klɔuklɔu ɔmɛ ngɛ e matsɛ yemi ɔ mi ɔ, nyɛ hu nyɛ nine maa su nyɛ nɔ́ nɔ.

¹³ E kpɔ wɔ kɛ je diblii he wami ɔ sisi, nɛ e kɛ wɔ ba e Bi nɛ e suɔ lɛ saminya a matsɛ yemi ɔ mi.

¹⁴ E Bi ɔ ha nɛ wa ye wa he; ee, e kɛ wa he yayami pa wɔ.

Kristo kɛ ní nɛ e ba tsu

¹⁵ Kristo ji Mawu nɛ a nɛ́ lɛ ɔ subai nɛ a naa. Lɛ ji nibɔ níhi tsuo a kpɛti tɛte.

¹⁶ Ejakaa e nɔ lɛ Mawu gu kɛ bɔ nɔ́ tsuaa nɔ́ ngɛ hiɔwe kɛ zugba, níhi nɛ a naa, kɛ ní nɛmɛ nɛ a nɛ́. Ekomɛ ji nihi nɛ ngɛ he wami nɛ a kojoɔ nihi, nihi a nɔ yeli, kɛ nihi nɛ hɛɛ he wami kpahi. Mawu gu Kristo nɔ kɛ bɔ níhi tsuo, nɛ Kristo nɔuu a bɔ mɛ ha.

¹⁷ Kristo ngɛ loko a bɔ níhi tsuo, nɛ lɛ nɛ ha nɛ níhi tsuo ngɛ a hanɔ pɛpɛɛpɛ.

¹⁸ Lɛ ji yi kɛ ha asafo ɔ nɛ ji lɛ nitsɛ e nɔmlɔ tso ɔ. E mi asafo ɔ puɛ kɛ je. Lɛ ji kekleekle nɔ nɛ a tle si kɛ je gbeje, konɛ e ye kekleekle blɔ he ngɛ níhi tsuo a mi.

¹⁹ Ejakaa Mawu nitsɛ lɛ suɔ kaa lɛ Mawu ɔ su pɛpɛɛpɛ nɛ hi Bi ɔ mi.

²⁰ Lɔ ɔ he ɔ, Mawu ná he bua jɔmi kaa kɛ gu e Bi ɔ nɔ ɔ, e ma dla e kɛ je ɔ tsuo pɛpɛɛpɛ, níhi nɛ ngɛ hiɔwe, kɛ níhi nɛ ngɛ zugba a nɔ ɔ a kpɛti. Niinɛ, Mawu gu e Bi ɔ muɔ nɛ pue si ngɛ sɛumi tso ɔ nɔ ɔ nɔ nɛ e kɛ tsu nɔ́ nɛ ɔ, nɛ e kɛ tue mi jɔmi ba.

²¹ Sa a, nyɛɛ kɛ Mawu nyɛ kpɛti kɛ saminya, nɛ nyɛ pee nyɛ he e he nyɛli. Nyɛ peeɔ ní yayamihi, nɛ nyɛ susuɔ ní yayamihi hulɔ.

²² Se amlɔ nɛ ɔ, kɛ gu e Bi ɔ nɛ ba ngɛ he lo mi ɔ gbenɔ ɔ nɔ ɔ, e kɛ nyɛ ba kpata. E pee enɛ ɔ, bɔ nɛ pee nɛ nyɛɛ pee klɔuklɔu, nɛ piami, loo sé ko kó hi nyɛ he ngɛ e hɛ mi.

²³ Lɔ ɔ he ɔ, e hia kaa nyɛɛ hɛɛ hemi kɛ yemi ɔ mi; nyɛɛ da si kpitikplii, nɛ hɛ kɛ nɔ fɔmi nɛ nyɛ ná benɛ nyɛ nu sane kpakpa a, nyɛ ko ngmɛɛ he. Sane kpakpa nɛ ɔ nɛ a fiɛ ngɔ tsɔɔ bɔ níhi tsuo ngɛ je ɔ mi ɔ he lɛ imi Paulo i ba pee sɔmɔlɔ ngɛ.

Paulo ní tsumi ngɛ asafo ɔ mi

²⁴ Amlɔ nɛ ɔ, e peeɔ mi bua jɔmi kaa nyɛ he ɔ, i ngɛ nɔ́ nae, konɛ nɔ́ nɛ piɛ ngɛ dengme nɛ Kristo ba gbo ngɛ asafo ɔ nɛ ji e nɔmlɔ tso ɔ he ɔ, ma gbe nya ngɛ ye he lo nɛ ɔ mi.

²⁵ Mawu je mi nɛ e tsɔ mi nɛ ma ba sɔmɔ ngɛ asafo ɔ mi ngɛ nyɛ he, nɛ ma fiɛ Mawu munyu ɔ saminya kɛ tsɔɔ nyɛ.

²⁶ Sane kpakpa nɛ ɔ ji laami sane nɛ Mawu ngɔ laa yi nɔhi kɛ je blema lokoo, nɛ amlɔ nɛ ɔ lɛɛ e je ngɔ tsɔɔ e ni klɔuklɔu ɔmɛ.

²⁷ Mawu suɔ kaa e ha mɛɛ a le kaa kikɛmɛ a laami sane nɛ he jua wa, nɛ hɛ mi ngɛ nyami nɛ ɔ ngɛ ní tsue ngɛ ma je li ɔmɛ hu a kpɛti. Nɛ laami sane ɔ ji, Kristo ngɛ nyɛ mi, nɛ tsɔɔ kaa nyɛ hɛ ngɛ nɔ kaa Mawu maa wo nyɛ hɛ mi nyami.

²⁸ Lɔ ɔ he ɔ, wa ngɛ Kristo he sane ɔ fiɛe kɛ ngɛ nɔ tsuaa nɔ tsɔɔe. Wa ngɛ nihi tsuo kɔkɔ bɔe, nɛ wa ngɛ mɛ ní tsɔɔe kɛ nile nɛ mi kuɔ. Wa ngɛ mɔde bɔe nɛ waa gbla nɔ tsuaa nɔ kɛ ba Mawu ngɔ kaa nihi nɛ le Kristo kɛ pi si.

²⁹ Enɛ ɔ he ɔ, i kɛ Kristo he wami kpetekpleenyɛ ɔ nɛ ngɛ ye mi ɔ gboɔ dengme wawɛɛ kɛ tsuɔ ní.