Hosea 9 - BAIBLO ALOO NGMAMI KLƆUKLƆU Ɔ

Hosea fiɛ ke a maa gbla Israel ma a tue

¹ Israel ma, nyɛ kpa nyami kaa bɔ nɛ je ma amɛ peeɔ ɔ. Nyɛ je nyɛ Mawu ɔ se, nɛ nyɛ yi lɛ anɔkuale. Nyɛ ngɔ nyɛ he ya mɛtɛ mawu ɔ nɛ a tsɛɛ lɛ Baal ɔ he ngɛ zugba a nɔ tsuo kaa yaholi. Ke blɛfo nya je ɔ, nyɛ ya sãã bɔ ha lɛ, nɛ nyɛ naa lɛ si.

² Ngma gbeemi he, kɛ wai muɔ mi ní be nyɛ nya sue. Wai he hu ma bɔ nyɛ.

³ Israel be zugba nɛ ɔ nɔ hie daa. A maa kpale kɛ ho Egipt ya, nɛ niye ní nɛ he tsɔ we ɔ, lɔ ɔ a ma ya ye ngɛ Asiria.

⁴ Israel bi be nyɛe maa ngɔ dã ba ha Yawɛ, nɛ ní nɛ a maa ye ɔ ma ble mɛ kaa ya sisi niye ní. A ma nyɛ maa ye kɛ gbe hwɔ kɛkɛ, pi kaa a maa ngɔ kɛ ya sã bɔ ngɛ Yawɛ we ɔ.

⁵ Lɛɛ ke nyami be ɔmɛ su ɔ, kɛ Israel ma a maa pee kɛɛ? Yawɛ nyami be ɔ, mɛni a maa pee?

⁶ Ke Asiria bi ba nuu mɛ nyɔguɛ nɛ a gbɛ fĩa a, Egipt bi ma bua a nya; ee, a ma bua a nya ya pu mɛ ngɛ Memfis! Mio tso, kɛ pú maa bɔ kɛ pue a wehi, kɛ a sika hiɔ níhi nɛ he jua waa tsuo a nɔ.

⁷ Be nɛ a maa gbla Israel ma a tue ɔ su. Be ɔ su nɛ a maa wo mɛ hiɔ. Kɛkɛ ɔ, nɔ tsuaa nɔ maa hɛli si! Nyɛ deɔ ke, “Gbalɔ nɛ ɔ biɛ lo! Nyumu ɔ nɛ na mumi ɔ nu godo!” Nyɛ deɔ enɛ ɔ, ejakaa nyɛ he yayami hiɛ babauu; nɛ nyɛ sume mi saasaa.

⁸ Mawu tsɔ imi, e gbalɔ ɔ, kaa ma ba tu munyu kɛ tsɔɔ e ma Israel ɔ. Se he tsuaa he nɛ ma ya a, nyɛ tsɔ̃ mi klama kaa a tsɔ̃ɔ̃ lohwe pɛlitsɛ klama. Mawu we ɔ nitsɛ po, ninyɛ sɔuu lɛ ngɛ lejɛ ɔ.

⁹ Ma a puɛ kulaa kɛ yayami peemi kaa bɔ nɛ a pee ngɛ Gibea be ko ɔ. Yayami nɛ a pee ɔ, Mawu hɛ be nɔ jee; e maa gbla a tue kokooko.

Yawɛ maa gbla Israel ma a tue ngɛ a yayami ɔ he

¹⁰ Yawɛ ke, “Benɛ i na Israel ma a kekleekle ɔ, a ngɛ kaa wai yiblii ngɛ nga nɔ. Benɛ i na nyɛ nɛmɛ ɔmɛ ɔ, a ngɛ kaa ngmɔkɔ he nɛ fu ngɛ e be mi. Se benɛ a ba su Peor yo ɔ he ɔ, a ba bɔni Baal jami. A kɛ nɔ́ nɛ ɔ ble a he, nɛ a he pee tai kaa nɔ́ ɔ nɛ a ngɛ jae ɔ nɔuu.

¹¹ Israel hɛ mi nyami ɔ maa laa mɛ tlukaa kaa bɔ nɛ lohwe pɛlitsɛ tee. Yi ɔmɛ be fɔe hu; hɔ tete po a be ngɔe.

¹² Ke a fɔ tete po, ma ha a ma gbo bi hluu kɛ yaa si kake ngmelu po be piɛe. Musu tloo mɛ wawɛɛ ke i kua mɛ.”

¹³ Imi Hosea, i na ngɛ nina mi nɛ Israel ngɔ e bimɛ ɔmɛ ngɔ ha kaa lohwehi nɛ a maa gbe. Bitsɛmɛ ɔmɛ nitsɛmɛ maa ngɔ a bimɛ ɔmɛ ya ha nɔ gbeli.

¹⁴ Lɔ ɔ he ɔ, Yawɛ, i kpa mo pɛɛ, ke yi ɔmɛ ngɔ hɔ ɔ, hɔ ɔ nɛ sane, nɛ nyu nɛ ta a nyɔ mi.

Yawɛ gbla Israel ma a tue

¹⁵ Yawɛ ke, “Israel ma a je a yayami peemi ɔ tsuo sisi ngɛ Gilgal, nɛ lejɛ ɔ a he bɔni mi tai peemi kɛ je. Yi wu tso níhi nɛ a pee ɔ a he ɔ, ma fie mɛ kɛ je zugba a nɔ. I be mɛ suɔe hu; Israel ma nimeli ɔmɛ tsuo tsɔ ye hɛ mi atuã.

¹⁶ Israel ma a, musu tloo mɛ pɛ; a ngɛ kaa tso nɛ e sipoku gbli, nɛ e wui yiblii. A be fɔe; nɛ ke a fɔ tete po, bimɛ ɔmɛ nɛ a suɔ saminya a, ma kpata a hɛ mi.”

Gbalɔ ɔ tu Israel he munyu

¹⁷ Ye Mawu ɔ ma kua e ma a; ejakaa a bui lɛ tue. A maa wo lalaalo ngɛ je ma amɛ a kpɛti.