Hosea 8 - BAIBLO ALOO NGMAMI KLƆUKLƆU Ɔ

Yawɛ bu Israel ma a fɔ kaa a ja amaga

¹ Yawɛ ke, “Nyɛ kpa titimati! Ejakaa he nyɛli ma nɛ a ba tua ye zugba a kaa bɔ nɛ kɔle he sɔɔ kɛ saa nɔ́ ɔ. Somi nɛ i kɛ ye ma a so ɔ, a yi nɔ, nɛ a tɔ̃ ye mlaa amɛ hulɔ.

² A tsɛɔ mi ke a Mawu; a deɔ ke ye ma ji mɛ, nɛ a le mi.

³ Se nɔ́ kpakpa a lɛɛ a sake ngɔ fɔ he. Enɛ ɔ he ɔ, a he nyɛli maa hia ta kɛ nyɛɛ a se.

⁴ “Ye ma a wo matsɛmɛ nɛ i li he nɔ́ ko. A hla ma nimeli hu nɛ a bi we mi gbi. A ngɔ sika hiɔ, kɛ sika tsu kɛ puɛ amagahi nɛ ma kpata mɛ nitsɛmɛ a hɛ mi.

⁵ Sika tsu na ku ɔ nɛ Samaria bi ɔmɛ jaa a peeɔ mi tai. Ye mi mi fu mɛ. Mɛni be po a ma kpa a we amaga nɛ ɔmɛ jami?

⁶ Ga ní tsulɔ ko lɛ puɛ amaga a, pi mawu ji lɛ! Sika tsu amaga a nɛ ngɛ Samaria a, ma ku e mi dukuduku!

⁷ Ejakaa ke a du kɔɔhiɔ ɔ, a ma kpa lasiogblee! Blɛfo ngmɔ nɛ wui ní ɔ, a be mamu nae kɛ je mi. Ke e wo yiblii po nibwɔhi ma ba ye lɛ tsuo.

⁸ Israel yi ta pɛ! Israel pee kaa buɛ kokoe ngɛ ma amɛ a kpɛti; e he be se nami.

⁹ Israel ma a tue wa kaa nga mi teji nɛ ngɛ si kpae. A ho ya bi Asiria bi yemi kɛ buami, nɛ a ya bɔ ma kpahi hu apaa ke a ba piɛ a he.

¹⁰ A ya bɔ ma kpahi apaa ke a ba piɛ a he lɛɛ, se e be kɛe kulaa nɛ ma gbla a tue. Be kuku pɛ a be matsɛmɛ woe hu, nɛ a be ma nimeli hu hlae.

¹¹ “Israel ma a puɛ bɔ sami la tɛ babauu nɛ a kɛ ma je a he yayami, se yayami mohu a ngɛ pee ngɛ lejɛ ɔmɛ tsuo.

¹² Mlaa amɛ nɛ i wo mɛ ɔ, kaa imi hu i ngma mlaa amɛ tslalaa ja a, jinɛ tse a ko de ke a nɛ́ eko hyɛ.

¹³ A gbeɔ lohwehi kɛ sãã bɔ kɛ haa mi, nɛ lo ɔ nɛ a kɛ ba sã bɔ ɔ lɛɛ mɛ nitsɛmɛ a yeɔ. Se imi Yawɛ, ye bua jɔɛ a he. Ma kai a he yayami ɔmɛ, nɛ ma gbla a tue kokooko ngɛ he; ma kpale mɛ kɛ ho Egipt ya!

¹⁴ “Israel ma a hɛ je a bɔlɔ ɔ nɔ, nɛ a ya ma we nguanguahi. Yuda ma hu po mahi babauu nɛ a fia gbogbo ngɔ wo a he. Se ma ha la maa sã we nguangua amɛ, kɛ ma amɛ nɛ a fia gbogbo wo a he ɔ tsuo.”