Hosea 7 - BAIBLO ALOO NGMAMI KLƆUKLƆU Ɔ

¹ “Be tsuaa be nɛ i hla kaa ma tsa ye ma Israel hiɔ ɔ, yi wu tso ní peemi, kɛ ní yayahi sɔuu i naa ngɛ Samaria. A sisiɔ a sibi, a sɛɛ wehi a mi ya juɔ, nɛ a yeɔ ojo ngɛ blɔ ɔmɛ a nɔ.

² E bɛ a juɛmi mi gblee kaa bɔ tsuaa bɔ nɛ pee ɔ, a he yayami nɛ ɔmɛ tsuo fɔɔ si paa ngɛ ye hɛ mi nɛ i ngɛ hyɛe.”

A so kɛ wo matsɛ ɔ kɛ ma nimeli ɔmɛ a he

³ Yawɛ ke, “Nihi toɔ ga yayahi nɛ a kɛ sisiɔ matsɛ ɔ kɛ e nimeli ɔmɛ.

⁴ Dikali kɛ atuã tsɔli ji mɛ tsuo. Ninyɛ nɛ nya wa wawɛɛ nitsɛ lɛ ngɛ a mi. Ninyɛ ɔ jeɔ sisi kaa flɔɔnɔɔ mi la nɛ ngɛ tsoe tikɔɔ hluu kɛ ya suu be nɛ mamu ɔ ma fu saminya, nɛ́ abolo sãlɔ ɔ ma klɛ la a mi, konɛ e tso gegeege.

⁵ Ke matsɛ ɔ ngɛ e fɔmi ligbi yee ɔ, e kɛ e ma nimeli ɔmɛ nuɔ dã nɛ a deɔ, kɛkɛ a bɔni biɛmi.

⁶ Niinɛ, ke a ngɛ ga yaya amɛ toe ɔ, a mi mi fuɔ kaa flɔɔnɔɔ kɛ e mi la gegeege. Nyɔ mi tsuo ɔ, la a tsoɔ tikɔɔ, se ke je na a, e tsoɔ gegeege.

⁷ “Benɛ a mi mi fu wawɛɛ ɔ, a gbe a ma nimeli ɔmɛ tsuo. A to nya nɛ a gbe a matsɛmɛ ɔmɛ kakaaka; nɛ mɛ hu a ti nɔ ko kpa we ngmlaa nɛ e tsɛ mi.”

Israel kɛ je ma amɛ

⁸ Yawɛ ke, “Israel ma a ngɛ kaa abolo nɛ be fa kɛ fa. Israel ngɔ e hɛ ngɔ fɔ mahi nɛ bɔle lɛ ɔ a nɔ,

⁹ nɛ nibwɔ ɔmɛ butu ma a, se e li. Israel li tete kaa e nyagbe su ta.

¹⁰ Israel ma a yeɔ fɔ kaa a wo a he nɔ kɛ si Mawu, se enɛ ɔ tsuo mi ɔ, a hla we Yawɛ, a Mawu ɔ se blɔ nɛ a kpale kɛ ba e ngɔ.

¹¹ Israel ngɛ kaa beleku lahuɛ nɛ ngɛ tee kɛ ngɛ yae kɛ ngɛ bae; e be juɛmi. Ke o ke o hyɛɛ ɔ, Israel bi ji nɛ nɛ a yaa bi yemi kɛ buami ngɛ Egipt; pee se kɛkɛ a pue Asiria blɔ.

¹² Be mi nɛ a yaa a, ma nyɛɛ a se nɛ ma kpale mɛ kɛ ba ekohu, kaa lohwe pɛlitsɛmɛ nɛ te kɛ bee nɛ a ya du yá. Ma gbla a tue ngɛ a yi wu tso ní ɔmɛ a he.

¹³ “Musu tloo mɛ! Ma kpata a hɛ mi; ejakaa a tsɔ ye hɛ mi atuã, nɛ a je ye se. I hla kaa ma he a yi wami; se a ja we mi anɔkuale mi.

¹⁴ Ke a ngɛ kue fae ha mi ɔ, e ji a tsui mi; awe sɔuu a hii nyae ngɛ sa mi. Ke a ngɛ sɔlee nɛ ma ha mɛ blɛfo kɛ dã a, a kɛ nɔ́ poɔ a he basabasa kaa wɔ jali. Atuã tsɔli!

¹⁵ Imi nitsɛ nɛ i tsɔse mɛ, nɛ i ha nɛ a he wa, se a soɔ kɛ woɔ ye he.

¹⁶ A je ye se, nɛ mawu nɛ be he wami ko he wami ko ɔ, lɔ ɔ se a ngɛ nyɛɛe. A ngɛ kaa kɛ̃ɛ̃ nɛ kpɛ̃. A ma kpata a ma nimeli ɔmɛ a hɛ mi, ejakaa a tuɔ munyu puu; nɛ Egipt bi kɛ nɔ́ nɛ ɔ maa ye a he fɛu.”