Hosea 6 - BAIBLO ALOO NGMAMI KLƆUKLƆU Ɔ

Ma a tsake a tsui fa kɛ fa

¹ Ma a ma de ke, “Nyɛ ha nɛ waa kpale kɛ ba Yawɛ ngɔ! E tsɔtslɔɔ wa mi, se e ma tsa wɔ kɛ̃. E plaa wɔ, se lɛ nɔuu lɛ e maa fi pa amɛ a nɔ ha wɔ!

² Ngɛ ligbi enyɔ mi ɔ, e ma ha wa na he wami ekohu; ligbi etɛne ɔ, e ma wo wa nɔ nɛ waa kɛ lɛ maa hi si.

³ Nyɛ ha waa bɔ mɔde nɛ waa le Yawɛ saminya. Kaa bɔ nɛ je naa daa ligbi, nɛ hiɔmi hu nɛɛɔ ngɔ pueɔ zugba daa gbo kɛ gbiɛ ɔ, ke wa hla Yawɛ se blɔ ɔ, lɛ hu e maa ba wa ngɔ.”

⁴ Se Yawɛ ke, “Israel kɛ Yuda, kɛ ma pee nyɛ kɛɛ? Suɔmi nɛ nyɛ ngɛ kɛ ha mi ɔ ngɛ kaa afua nɛ wo mɔtu, loo bɔ́ nɛ́ nɛ; bɔɔ kɛkɛ e se po.

⁵ Enɛ ɔ he je nɛ i tsɔ ye gbali ɔmɛ nɛ a ba bɔ nyɛ kɔkɔ kaa ma gbla nyɛ tue ɔ nɛ. I ke a maa gbla nyɛ tue kaa bɔ nɛ oslabai gbaa a.

⁶ Nɔ́ nɛ i ngɛ hlae ngɛ nyɛ dɛ kɛkɛ ji suɔmi nɛ ngɛ daa; pi bɔ sami. Ma suɔ kaa nyɛɛ le imi Mawu ɔ mohu, pe kaa nyɛ maa sã sami bɔ kɛ sa ye hɛ mi!

⁷ “Se benɛ ma a ya su he ko nɛ a tsɛɛ ke Adam ɔ, a kua mi; somi nɛ i kɛ mɛ so ɔ, a yi nɔ hu.

⁸ Yayami peeli, kɛ muɔ si pueli hiɛ tɔtɔɔtɔ ngɛ Gilead ma a mi.

⁹ Osɔfo ɔmɛ buaa a he nya kaa bɔ nɛ ojo fiali woɔ ka haa nihi ɔ. Shekem blɔ nɔ po, a poo nɔ nɛ a gbeɔ nɔ basabasa. A peeɔ yiku níhi babauu.

¹⁰ I na nɔ́ ko ngɛ Israel nɛ ha nɛ ye he mi po; ye ma a ngɔ yahomi kɛ ble a he.

¹¹ “Yuda bi, nyɛ hu i to be nɛ ma gbla nyɛ tue ngɛ yayami nɛ nyɛ ngɛ pee ɔ he.