Hosea 5 - BAIBLO ALOO NGMAMI KLƆUKLƆU Ɔ

¹ “Nyɛ osɔfohi, nyɛɛ bu tue! Israel ma nyɛ tã tue! Matsɛ we mi bimɛ, nyɛɛ bu tue! Nyɛ sa tue gblami! Ejakaa nyɛ pee kaa klama nɛ a tsɔ ngɛ Mizpa, kɛ yá nɛ a wo ngɛ Tabor yo ɔ nɔ,

² nɛ Akasia ma a hu pee kaa muɔ voo kɛ e mi yayami peeli kpanakuhi sɔuu. Lɔ ɔ he ɔ, ma gbla nyɛ tsuo nyɛ tue!

³ Israel, i le bɔ nɛ o ngɛ ha; o be nyɛe maa laa ngɛ ye hɛ mi. O yi mi anɔkuale; lɔ ɔ he ɔ, o ble o he.”

Hosea tu munyu kɛ si amaga jami

⁴ Yayami nɛ ma a pee ɔ ha we nɛ a nyɛ nɛ a kpale kɛ ba a Mawu ɔ ngɔ. Amaga jami ngɔ a tsui kulaa, nɛ a li Yawɛ hu.

⁵ Israel bi a he nɔ womi ɔ yeɔ odase kɛ siɔ mɛ. A he yayami ɔ kɛ tue gblami maa ba a nɔ, nɛ Yuda hu be e he yee.

⁶ A maa ngɔ tohi, kɛ nahi kɛ ba sã bɔ ha Yawɛ, se a be lɛ nae; ejakaa Yawɛ je a se.

⁷ A yi Mawu anɔkuale; a kɛ ni kpahi ya fɔ bimɛ. Lɔ ɔ he ɔ, e be kɛe kulaa nɛ mɛ nitsɛmɛ, kɛ a zugba a tsuo hɛ mi ma kpata.

Yuda kɛ Israel hwu ta

⁸ Nyɛ kpa titimati ngɛ Betaven! Nyɛ ha nɛ a nu he ngɛ Rama! Nyɛ he ose ngɛ Betel! Nyɛ Benyamin bi, nyɛ gba ta!

⁹ Tue gblami be ɔ su ta, nɛ a ma kpata Israel hɛ mi pɛsɛpɛsɛ. Ee, Israel ma, nɔ́ nɛ maa ba nyɛ nɔ ji nɛ ɔ nɛ.

¹⁰ Yawɛ ke, “Ye mi mi wo la, ejakaa Yuda ma nimeli ɔmɛ ya tua Israel ma a, nɛ a kpɔ zugba ngɛ a dɛ. Enɛ ɔ he je ɔ, ma ngɔ ye abofu ɔ kɛ kple a nɔ kaa bɔ nɛ ke pa hia nɛ e puɛɔ ní ɔ.

¹¹ Israel ngɛ nɔ́ nae; a gbla e tue wawɛɛ, ejakaa e ya nyɛɛ yakayaka níhi a se.

¹² Ma kpata Israel hɛ mi kaa bɔ nɛ wɔyewɔye yeɔ kuutu, nɛ Yuda ma a hu maa pee kaa nɔ́ sasɛ ko nɛ gbli kɛ fɔɔ si.

¹³ “Benɛ Israel na kaa e hiɔ ɔ nya ba wa, nɛ Yuda hu na kaa e plaa wawɛɛ nitsɛ ɔ, Israel ho Asiria matsɛ ɔ ngɔ ya ya bi yemi kɛ buami. Se e nyɛ we nɛ e tsa hiɔ ɔ ha Israel, nɛ pa amɛ hu e nyɛ we nɛ e pee nɔ́ ko ngɛ a he.

¹⁴ Imi Yawɛ, ma tsɔtslɔɔ Israel kɛ Yuda a mi ngɔ pue si kaa jata peeɔ nɔ́. Ma ngɔ mɛ kɛ ho; nɛ nɔ ko nɔ ko be nyɛe ma kpɔ mɛ ngɛ ye dɛ.

¹⁵ “Ma ngmɛɛ ye ma a he, konɛ a na nɔ́ wawɛɛ. Kɛkɛ ɔ, a ma pia a he ngɛ a yayami ɔmɛ a he, nɛ a ma hla ye se blɔ. Ke a yi fi ɔ, a ma ba kpa mi pɛɛ.”