Hosea 2 - BAIBLO ALOO NGMAMI KLƆUKLƆU Ɔ

¹ Lɔ ɔ he ɔ, nyɛ tsɛ nyɛ nyɛmimɛ Israel bi ɔmɛ ke, “Mawu ma”, kɛ “Nihi nɛ Nyɔmtsɛ suɔ mɛ.”

Israel yi Mawu anɔkuale kaa bɔ nɛ Gomer yi Hosea anɔkuale ɔ

² Israel bi ngɛ kaa imi Mawu, ye bimɛ. E ngɛ mi kaa i kɛ Israel be bɔmi kaa nɔ kɛ e yo hu lɛɛ, se kɛ̃ ɔ, nyɛɛ kɛ lɛ nɛ tu, konɛ e kpa gba puɛmi kɛ yahomi ɔ.

³ Ke pi ja a, ma kpa bo ngɛ e he, nɛ e he maa fɔ si paslapaa kaa bɔ nɛ a fɔ lɛ ɔ. Ma ha e maa pee kaa zugba gbigbli nɛ bɛ ní; nɛ nyu kuma maa gbe lɛ.

^4-5 E bimɛ ɔmɛ hu i be mɛ mɔbɔ nae. Ejakaa yo yaholɔ bimɛ ji mɛ. A nyɛ nɛ fɔ mɛ ɔ, zo ko zo ko be e hɛ mi. E nyɛ́ nɛ e de ke, “I yaa nɛ ma ya nyɛɛ ye pla amɛ a se. Mɛ lɛ a haa mi ye nya mi ngma, kɛ nyu; heha ní, nu, kɛ dã tsuo, a dɛ mi i naa kɛ jeɔ.”

⁶ Lɔ ɔ he ɔ, ma ngɔ mio tso kɛ tsi lɛ blɔ; ma fia gli kɛ wo e he kɛ tsi lɛ blɔ.

⁷ E ma ya hla e pla amɛ a se blɔ, se e nine be a nɔ sue. E ma hla mɛ hluu, se e be mɛ nae. Kɛkɛ ɔ, e ma de ke, “Ma kpale kɛ ya ye huno momo ɔ ngɔ. Benɛ i kɛ lɛ ngɛ ɔ, níhi a mi hi ha mi kulaa pe piɔ.”

⁸ E li tete kaa ngma, dã, kɛ nu ɔ, imi lɛ i ha lɛ. Jehanɛ, sika hiɔ, kɛ sika tsu ní nɛ a kɛ jaa Baal ɔ, e li kaa imi lɛ i kɛ dloo lɛ.

⁹ Lɔ ɔ he ɔ, ke ní kpami be su ɔ, blɛfo be bae, nɛ wai hu se maa po. Kploba kɛ kuutu nɛ e kɛ maa ha e he hu ma bɔ lɛ.

¹⁰ Ma kpa bo ngɛ e he ngɛ e pla amɛ a hɛ mi paa; nɛ nɔ ko nɔ ko be nyɛe ma kpɔ lɛ.

¹¹ E nyami be ɔmɛ: Nyɔhiɔhe, Hejɔɔmi, kɛ nyami be kpa amɛ tsuo a se maa po.

¹² E wai ngmɔ ɔmɛ, kɛ ngmɔkɔ ɔ nɛ e ke e pla amɛ lɛ a pee kɛ wo lɛ hiɔ ɔ; ee, ma kpata ní nɛ ɔmɛ tsuo a hɛ mi. Ngmɔ ɔ maa hɛ kaa hue, nɛ nga mi lohwehi maa ye e mi ní ɔ.

¹³ Ma gbla Gomer tue ngɛ níhi nɛ e pee be ko ɔ a he. Ke pee ɔ, Gomer ma dla e he saminyayoo kɛ nguɛ ní, kɛ june kpakpa, nɛ e ma ya sã tsopa kɛ e he via ha Baal. E ma dla e he saminyayoo kikɛ nɛ ɔ, nɛ e ma ya hi e pla amɛ a nɔ kpae; kɛkɛ ɔ, e hɛ maa je ye nɔ pɛsɛpɛsɛ. Ma gbla e tue ngɛ ní nɛ ɔmɛ a he. Yawɛ lɛ de.

Yawɛ suɔ e ma a

¹⁴ Enɛ ɔ he ɔ, ma mlɔɔ e hɛ mi, nɛ ma ngɔ lɛ kɛ ya nga kplanaa a nɔ, nɛ i kɛ lɛ maa tu munyu ngɛ he jɔmi mi ngɛ lejɛ ɔ.

¹⁵ Ma ngɔ wai abɔɔ ɔmɛ kɛ ha lɛ ekohu. Haomi Kɔ̃ ɔ ma plɛ pee he ko nɛ e ma ná ní kpakpahi ngɛ. E kɛ mi maa hi si saminya kaa bɔ nɛ e pee ngɛ e yihe mi, benɛ e je Egipt kɛ ba a.

¹⁶ Kɛkɛ ɔ, e ma tsɛ mi ke e huno ekohu; e be mi tsɛe ke e Baal hu.

¹⁷ Baal biɛ maa laa lɛ pɛsɛpɛsɛ, nɛ e be e ta woe hu.

¹⁸ Jamɛ a be ɔ, i kɛ nga mi lohwe awi yeli, kɛ lohwe pɛlitsɛmɛ tsuo maa so, nɛ a be ye ma a awi yee hu. Ma ha klaate, kɛ̃ɛ̃, kɛ ta hwumi ní kpahi tsuo a se maa po ngɛ zugba a nɔ, nɛ ye ma a maa hi si ngɛ tue mi jɔmi, kɛ he jɔmi mi.

¹⁹ Israel, i kɛ mo maa hi si kaa ye yo; ma ye mo anɔkuale. Ye suɔmi kɛ mɔbɔ nami nɛ ngɛ daa a, ma je kpo kɛ tsɔɔ mo, nɛ ma ngɔ mo kɛ pee ye nɔ́ kɛ maa ya neneene.

²⁰ Ma ye ye siwo ɔ nɔ, nɛ ma ngɔ mo kɛ pee ye nɔ́, nɛ mo hu o ma tsɛ mi ke Yawɛ.

^21-22 Jamɛ a be ɔ, ma bu ye ma Israel kue fami ɔ tue. Ma ha hiɔmi maa nɛ, nɛ zugba a maa ba ní; blɛfo, wai yiblii, kɛ Oliv maa pɔ he.

²³ Ma to ye ma a sisi, nɛ a ma plɔke ngɛ zugba a nɔ. Nihi nɛ a tsɛɔ mɛ ke, “Asumemo” ɔ, ma je suɔmi kpo ha mɛ; nɛ ni nɛmɛ nɛ a tsɛɔ mɛ ke “Piyema” a, ma de mɛ ke, “Ye ma ji nyɛ.” Kɛkɛ ɔ, mɛ hu a ma he nɔ ke, “Mo ji wa Mawu.”