Hosea 14 - BAIBLO ALOO NGMAMI KLƆUKLƆU Ɔ

Hosea tu munyu kɛ tsɔɔ Israel ma a

¹ Israel ma, nyɛɛ kpale kɛ ba Yawɛ, nyɛ Mawu ɔ ngɔ. Nyɛ yayami ɔmɛ ha nɛ nyɛ pee kaa ni komɛ nɛ tɛ nɔ́ nɛ a nɔɔ si.

² Nyɛɛ kpale kɛ ba Yawɛ, nyɛ Mawu ɔ ngɔ. Nyɛ ba fa kue ha lɛ, nɛ nyɛ de lɛ ke, “Ngɔɔ wa he yayami ɔmɛ kɛ pa wɔ; nɛ o bu wa kue fami ɔ tue, konɛ wa je o yi kaa bɔ nɛ wa wo si ɔ.

³ Asiria be nyɛe ma he wa yi wami. Wa be wa he ngɔe kɛ fɔ ta okpɔngɔhi a nɔ. Wa be wa amaga amɛ dee hu ke mɛ ji wa Mawu. Yawɛ, mo nɛ o naa awusahi mɔbɔ.”

Yawɛ wo si ke e ma ha Israel wami he

⁴ Yawɛ ke, “Ma ha ye ma a maa kpale kɛ ba ye ngɔ kɛ a tsui tsuo, ejakaa ye mi mi nɛ fu mɛ ɔ se po!

⁵ Ma ha Israel ma a ma plɔke plɔplɔɔplɔ kaa zugba gbigbli nɛ hiɔmi nɛ pue nɔ.

⁶ A ma na wami he, nɛ a maa bɔ. A he maa pee fɛu kaa oliv tsohi, nɛ a maa je via kaa seda tsohi ngɛ Lebanon.

⁷ A maa kpale kɛ ba ye ngɔ ekohu, nɛ a kɛ mi maa hi si ngɛ he jɔmi mi. A maa bɔ kaa ngmɔ nɛ ba ní saminya, nɛ a ma plɔke kaa wai tso; nɛ a biɛ ma he si kaa Lebanon wai.

⁸ Israel ma, mɛni peemi i kɛ amagahi ngɛ? Imi nɛ i buu nyɛ kue fami tue nɛ i hyɛɛ nyɛ nɔ. I ngɛ kaa sɛsɛo tso nɛ ba mumu tɛ̃ e nɔ gblegbleegble. Imi lɛ i haa ma a niye ní.”

Nyagbe

⁹ Mɛnɔ ji ní lelɔ? Ha nɛ e nu ní nɛ ɔmɛ a sisi. Mɛnɔ lɛ nuɔ nɔ́ sisi? Ha nɛ e yɔse. Ejakaa Yawɛ blɔ ɔmɛ da tlɔmɔɔ, nɛ nihi nɛ peeɔ nɔ́ nɛ da a nyɛɛɔ nɔ tɛɛ. Se yayami peeli lɛɛ a tɛɔ nɔ́, nɛ a nɔɔ si.