Hosea 13 - BAIBLO ALOO NGMAMI KLƆUKLƆU Ɔ

Nyagbe tue gblami nɛ Israel ma ná

¹ Be ko nɛ be ɔ, ke Efraim wɛtso ɔ de nɔ́ ko ɔ, Israel wɛtso kpa amɛ yee gbeye; ejakaa a buu Efraim saminya. Se ma a pee yayami kaa a ya ja Baal; lɔ ɔ he ɔ, a ma gbo.

² A ngɛ yayami pee kɛ mwɔɔ. A ngɛ amagahi jae. Se amaga nɛ ɔmɛ ɔ, nimli a juɛmi kɛ a nine nya ní tsumi nɛ a kɛ sika hiɔ pee ji mɛ. Amagahi nɛ a ngɛ kaa na bi ɔ, ní nɛ ɔmɛ nyɛ ke a sã bɔ ha lo? Kɛ nimli adesahi maa pee kɛɛ nɛ a ma fiɔ ní nɛ ɔmɛ a nya he?

³ Lɔ ɔ he ɔ, ma ha nɛ a hɛ mi ma kpata si kake too, nɛ a be mɛ nae hu, kaa mɔtu bɔku, loo bɔ́, loo jakati nɛ kɔɔhiɔ muɔ kɛ je ngma mi sami he, loo la su ku nɛ je la su ku tɔ mi.

⁴ Yawɛ ke, “Imi ji Yawɛ, nyɛ Mawu ɔ nɛ je nyɛ kɛ je Egipt ɔ nɛ. Imi pɛ ji nyɛ Mawu. Imi nɔ kake too pɛ ji nyɛ kpɔlɔ.

⁵ Imi nɛ i hyɛ nyɛ nɔ ngɛ nga kplanaa a nɔ, he nɛ nyu ko nyu ko be.

⁶ Se benɛ nyɛ ye ní nɛ nyɛ tɔ saminya a, nyɛ wo nyɛ he nɔ, nɛ nyɛ hɛ je ye nɔ.

⁷ Lɔ ɔ he ɔ, ma ba tua nyɛ kaa jata. Ma wo nyɛ ka ngɛ blɔ he kaa ngatsɛ.

⁸ Ma ba tua nyɛ kaa osisiblisi nɛ a nu e bimɛ. Ma fɛ nyɛ mi, nɛ ma ye lo ɔ ngɛ lejɛ ɔ nɔuu kaa jata; ma tsɔtslɔɔ nyɛ mi kaa bɔ nɛ lohwe dikalɔ peeɔ ɔ.

⁹ “Israel ma, ma kpata nyɛ hɛ mi pɛsɛpɛsɛ! Nɛ, mɛnɔ ma nyɛ ma kpɔ nyɛ?

¹⁰ Nyɛ bi ke a to matsɛ ha nyɛ, nɛ nyɛ bi hu ke a ha nyɛ asafoatsɛmɛ; se nimli nɛ ɔmɛ ma nyɛ ma he nyɛ yi wami lo?

¹¹ I kɛ abofu to matsɛmɛ ha nyɛ, nɛ i kɛ mi mi la kpa mɛ.

¹² “Israel ma a pee yayami; lɔ ɔ he ɔ, a yeɔ fɔ. A kadi enɛ ɔmɛ tsuo pɛpɛɛpɛ ngɔ to.

¹³ Israel ma a li nɔ́; a tue wa; lɔ ɔ he ɔ, a maa na nɔ́. A ngɛ kaa bi nɛ kua kpo jemi ngɛ e nyɛ mi mi benɛ e nyɛ nu kɔɔmi.

¹⁴ Anɛ ma kpɔ mɛ kɛ je gbeje lo? Anɛ ma he mɛ kɛ je gbenɔ dɛ mi lo? Gbenɔ, jije o hiɔ nɛ gbee nɔ ɔ ngɛ? Gbeje, jije nɔ́ nɛ a kɛ kpataa nɔ hɛ mi ɔ ngɛ? I be ma nɛ ɔ mɔbɔ nae hu.

¹⁵ Ke Israel ma a ngɛ plɔkee, nɛ e pee plɔplɔɔplɔ kaa nga po, ma ha kɔɔhiɔ nɛ mi dɔ la maa fia kɛ je nga kplanaa a nɔ ngɛ beleku je kɛ ba. Kɔɔhiɔ ɔ ma ha nɛ nyu maa ta a vu ɔmɛ a mi, nɛ pa amɛ maa mii. Ma ha a juetli tsuo maa ta.

¹⁶ A maa gbla Samaria tue, ejakaa e tsɔ ye hɛ mi atuã. Ta ma kpata ma a mi bi ɔmɛ a hɛ mi; a maa ngɔ a bimwɔwi ɔmɛ ngɔ fiaa si, nɛ a kɛ klaate ma fɛ yihɔyi ɔmɛ a mi mi.”