Hosea 12 - BAIBLO ALOO NGMAMI KLƆUKLƆU Ɔ

¹ “Daa nyɔ kɛ pia a, yi wu tso níhi, kɛ níhi nɛ a he be se nami sɔuu Israel ma a ngɛ pee. A sisiɔ nɔ, nɛ a pueɔ muɔ si. A kɛ Asiria ngɛ huɛ bɔe, nɛ Egipt lɛɛ a kɛ lɛ yeɔ nu jua.”

² Yawɛ kɛ Yuda ma a ná. E maa gbla Israel ma a hu tue ngɛ a je mi bami he. A he yayami ɔmɛ a he ɔ, e maa gbla a tue.

³ Israel bi ɔmɛ a nɛ̃, Yakob nu e nyɛminyumu hayo ɔ nɛ a tsɛɛ lɛ Esau ɔ nane seja benɛ mɛ ni enyɔ ɔmɛ a ngɛ a nyɛ muklii mi nɛ a fɔ we mɛ lolo ɔ; nɛ benɛ Yakob ba wa a, e kɛ Mawu fia atlibo.

⁴ Niinɛ, e kɛ Mawu bɔfo nɔ kunɔ, nɛ e ye e nɔ. E fo ya ngɔ pue bɔfo ɔ nɔ, nɛ e de lɛ ke e gbaa lɛ. E kɛ Mawu kpe ngɛ Betel, nɛ Mawu kɛ lɛ tu munyu ngɛ lejɛ ɔ.

⁵ Lɛ ji Yawɛ Tabohiatsɛ Mawu; Yawɛ ji e biɛ.

⁶ Lɔ ɔ he ɔ, Yakob nina, nyɛɛ ngɔ nyɛ hɛ ngɔ fɔ nyɛ Mawu ɔ nɔ, nɛ nyɛɛ kpale kɛ ba e ngɔ. Nyɛɛ suɔ lɛ anɔkuale mi, nɛ́ nyɛɛ ye dami sane. Nyɛɛ to nyɛ tsui si, nɛ́ nyɛɛ hyɛ nyɛ Mawu ɔ blɔ.

Tue gblami kpahi

⁷ Yawɛ ke, “Jua yelɔ nɛ ngɔɔ lakpa sɛni kɛ e nɔ sɛni tɛ kɛ juaa ní ɔ, nɔ sisilɔ ji lɛ.

⁸ Bɔ nɛ Israel ma a deɔ ji, ‘Niatsɛmɛ ji wɔ. Wa ná ní babauu.’ Se ní nɛ a na babauu ɔ tsuo be nyɛe ma je a he yayami ɔ.

⁹ Imi ji Yawɛ, nyɛ Mawu ɔ nɛ. Imi nɛ i je nyɛ kɛ je Egipt zugba a nɔ. Ma ha nyɛ maa hi bo tsuhi a mi ekohu kaa bɔ nɛ nyɛ hi si be ko ngɛ nga kplanaa a nɔ ɔ.

¹⁰ “Imi lɛ i kɛ gbali ɔmɛ tu munyu. Imi nɛ i je ninahi ha mɛ, nɛ i gu gbali ɔmɛ a nɔ nɛ i kɛ ye ma a tu munyu ngɛ abɛ gbi mi.

¹¹ Se kɛ̃, a ngɛ yayami pee kɛ mwɔɔ; a jaa amaga ngɛ Gilead, nɛ a kɛ na ku sãã bɔ ngɛ Gilgal. Lɔ ɔ he ɔ, ma kpata a hɛ mi; bɔ sami la tɛ ɔmɛ hu maa ywia, nɛ tɛ ɔmɛ ma pue si glekuu glekuu ngɛ ngmɔ ɔmɛ a mi.”

¹² Wa nɛ̃, Yakob tu fo kɛ ho Mesopotamia ya, nɛ e ya ye apaa ngɛ lejɛ ɔ. Bɔ nɛ pee nɛ e na yo nɛ e ngɔ ɔ, e ya hyɛ nɔ ko tohi a nɔ.

¹³ Yawɛ ha nɛ gbalɔ ko ya je e ma Israel kɛ je Egipt. Gbalɔ nɛ ɔ tsɔɔ mɛ blɔ, nɛ e hyɛ a nɔ.

¹⁴ Israel ma a wo Yawɛ mi mi la wawɛɛ nitsɛ. Yi wu tso níhi nɛ a pee he je ɔ, a sa gbenɔ. Yawɛ maa gbla a tue ngɛ e hɛ mi si nɛ a pue ɔ he.