Hosea 10 - BAIBLO ALOO NGMAMI KLƆUKLƆU Ɔ

¹ Israel ma a ngɛ kaa wai tso nɛ wo yiblii babauu. Ke a ná ní ɔ, kɛkɛ a puɛ bɔ sami la tɛhi fuu. Titimahi nɛ a puɛ nɛ a jaa a, a dlaa a he nɛ a he peeɔ fɛu.

² A yi Mawu anɔkuale, lɔ ɔ he ɔ, a maa gbla a tue ngɛ a yayami ɔmɛ a he. Yawɛ maa ku a bɔ sami la tɛ ɔmɛ, kɛ titima amɛ kɛ pue si.

³ Kɛkɛ ɔ, a ma de ke, “Wa be matsɛ, ejakaa wa yi Yawɛ gbeye. Ke wa ngɛ matsɛ po, mɛni e ma nyɛ maa pee ha wɔ?”

⁴ Nya puu sɔuu a peeɔ; a woɔ si nya mi gu. A kaa lakpa kita kɛ soɔ somihi. A plɛɔ nɔ́ nɛ da hɛ mi ngɔ buɔ si, nɛ nɔ́ nɛ dɛ hii nɔ yae. Enɛ ɔ he je ɔ, munyu yemi heɔ si kaa bɔ nɛ hu yaya puɛɔ ngmɔ nɔ niba ní ɔ.

⁵ Samaria bi maa ye gbeye, nɛ a maa ye kɔmɔ ngɛ sika tsu na ku ɔ nɛ ngɛ Betel nɛ a kpata e hɛ mi ɔ he. A kɛ lakpa osɔfo ɔmɛ tsuo ma nya awe kaa amaga a hɛ mi nyami ɔ laa mɛ.

⁶ Niinɛ, amaga a nitsɛ lɛɛ a maa ngɔ kɛ ya Asiria kɛ ya ke matsɛ ngua a. Israel bi a hɛ mi ma pue si, nɛ zo maa gbe mɛ saminya ngɛ amaga nɛ a puɛ ɔ he.

⁷ Samaria matsɛ ɔ hɛ mi ma kpata kaa tso kpoku ngɛ pa hɛ mi.

⁸ Wɔ piɛhi nɛ ngɛ Aven yoku ɔ nɔ, he nɛ Israel ma a ya jaa amaga amɛ ngɛ ɔ, a ma kpata a hɛ mi. Mio tso, kɛ hu maa bɔ kɛ pue a bɔ sami la tɛ ɔmɛ a nɔ. Nɛ Israel bi ma kpa ngmlaa ma de yo gagaa amɛ ke, “Nyɛ ba ha wa nɔ!” nɛ a ma de yoku ɔmɛ ke, “Nyɛ ba nɔ wa nɔ!”

Yawɛ maa gbla Israel tue

⁹ Yawɛ ke, “Kɛ je be nɛ Israel pee yayami kɛ si mi ngɛ Gibea a, anɛ e sɛ kaa ta ba naa mɛ ngɛ Gibea lo?

¹⁰ Ma tua ma yayami peeli nɛ ɔmɛ, nɛ ma gbla a tue. Je mahi maa pee kake kɛ wo mɛ, nɛ a maa gbla a tue ngɛ a yayami babauu ɔ he.

¹¹ “Sa a, Israel ngɛ kaa na yiheyo nɛ a tsɔse lɛ saminya. Be tsuaa be ɔ, e suɔ kaa e gblɛ ngma. Se i pee ye yi mi kaa ma wo e kuɛ saminyayoo ɔ kuɛpã tso, konɛ e tsu ní kpakpataa. I ha Yuda gbla na kpakplaa tso ɔ, nɛ Israel hɛɛ ngmɔ nɔ dlami nɔ́ ɔ mi.

¹² I de ke, ‘Nyɛɛ ye dami sane, konɛ ma suɔ nyɛ, nɛ ma gbaa nyɛ. Nyɛ tsake nyɛ tsui; ejakaa be ɔ su nɛ nyɛ ma hla imi Yawɛ, ye se blɔ. Kɛkɛ ɔ, ma ha dami sane yemi ma he si kaa bɔ nɛ hiɔmi nɛɛ ɔ.’

¹³ Yayami nɛ nyɛ du ɔ, e yiblii nɛ nyɛ kpa. Lakpa amɛ nɛ nyɛ ye ɔ, a mi nɔ́ nyɛ ngɛ nae ɔ nɛ. “Nyɛ ngɔ nyɛ hɛ ngɔ fɔ nyɛ ta zugba lɛhi, kɛ nyɛ ta buli babauu ɔ a nɔ.

¹⁴ Enɛ ɔ he ɔ, ta ma ba tua nyɛ, nɛ nyɛ mɔ ɔmɛ tsuo a hɛ mi ma kpata kaa bɔ nɛ Matsɛ Shalman kpata Betabel hɛ mi ngɛ ta mi ɔ. Jamɛ a ligbi ɔ, a nuu nyɛmɛ kɛ a bimɛ tsuo ngɔ fiaa si nɛ a gbe mɛ.

¹⁵ Betel bi, nɔ́ nɛ maa ba nyɛ nɔ ji nɛ ɔ nɛ; ejakaa nyɛ pee yayami gbegbeegbe. A ma kpata Israel matsɛ ɔ hɛ mi pɛsɛpɛsɛ ngɛ ta mi.”