Hosea 1 - BAIBLO ALOO NGMAMI KLƆUKLƆU Ɔ

¹ Yawɛ ha Beeri bi Hosea sɛ gbi nɛ ɔ ngɛ Yuda matsɛmɛ, Uzia, Yotam, Ahaz, kɛ Hezekia a yi nɔ. Jamɛ a be ɔ, Yohoash bi Yeroboam ngɛ tsɛ yee ngɛ Israel.

Hosea yo ɔ kɛ e bimɛ ɔmɛ

² Kekleekle nɛ Yawɛ kɛ Israel tu munyu kɛ gu Hosea nɔ ɔ, e de Hosea ke, “Yaa nɛ o ya ngɔ yo; yo ɔ maa pee e he yakayaka nɔmlɔ, nɛ e bimɛ maa hi kaa lɛ pɛ. Ja pɛpɛɛpɛ ye ma a pee ɔ nɛ; ye ma a kua mi; a yi mi anɔkuale.”

³ Hosea pee bɔ nɛ a de lɛ ɔ. E ya ngɔ Diblaim biyo nɛ a tsɛɛ lɛ Gomer. E na mi nɛ e fɔ binyumuyo.

⁴ Yawɛ de Hosea ke, “Wo bi ɔ biɛ ke ‘Yezreel’; ejakaa e be kɛe kulaa nɛ ma gbla Israel matsɛ ɔ tue ngɛ nihi nɛ e nɛ̃, Yehu kpata a hɛ mi ngɛ Yezreel ɔ a he. Ma ha nɛ Yehu nɔ yemi ɔ se maa po.

⁵ Jamɛ a be ɔ, ma ha nɛ a maa ye Israel tabo ɔ nɔ ngɛ Yezreel kɔ̃ ɔ mi.”

⁶ E na mi ekohu nɛ e fɔ yo. Yawɛ de Hosea ke, “Moo wo lɛ ke, ‘Asumemo’. Ejakaa i be Israel sane suɔe hu, nɛ i be a tɔmi ngɔe kɛ pa mɛ.

⁷ Se Yuda ma a lɛɛ, ma suɔ a sane. Imi Yawɛ, a Mawu ɔ, ma he a yi wami. Pi ta nga nɔ nɛ ma pee nɔ́ nɛ ɔ ngɛ; pi klaate, loo kɛ̃ɛ̃ kɛ kɛ̃ɛ̃ mi bi, loo okpɔngɔhi kɛ a nɔ hili nɛ ma ngɔ kɛ tsu nɔ́ nɛ ɔ.”

⁸ Benɛ Gomer tsɔ́ e biyo ɔ nyɔ ɔ, e ba na mi ekohu, nɛ e fɔ binyumuyo enyɔne.

⁹ Kɛkɛ nɛ Yawɛ de Hosea ke, “Wo lɛ biɛ ke, ‘Piyema’, ejakaa pi ye ma ji Israel, nɛ pi a Mawu ji mi.”

Israel ma ba da e da he ekohu

¹⁰ Israel bi a he ma ba hiɛ babauu kaa wo nya zia, nɛ nɔ ko be nyɛe maa kane mɛ; nɔ ko nɔ ko be nyɛe maa kale a yibɔ. Amlɔ nɛ ɔ, Mawu ngɛ mɛ dee ke, “Pi ye ma ji nyɛ”; se be ma nɛ e ma de mɛ ke, “Imi Mawu hɛ ngmengmletsɛ ɔ, ye bimɛ ji nyɛ!”

¹¹ Yuda bi, kɛ Israel bi ma ba pee kake; a maa hla nɔ kake nɛ da a nya, nɛ a maa hi si ngɛ he jɔmi mi ngɛ zugba a nɔ. Niinɛ, Yezreel ma ba plɔke.