Hiob 9 - BAIBLO ALOO NGMAMI KLƆUKLƆU Ɔ

Hiob

^1-2 Niinɛ, i le kaa e ngɛ mi ja. Se kɛ nɔmlɔ adesa maa pee kɛɛ nɛ e maa ye nguɔ ngɛ Mawu hɛ mi?

³ Mɛnɔ ma nyɛ nɛ e kɛ Mawu maa hua nɔ́ he? Ke Mawu bi lɛ munyu akpe ɔ, anɛ e ma nyɛ kake po heto ma ha lo?

⁴ Mawu ɔ, e le ní, nɛ e he wa. Mɛnɔ lɛ te si kɛ si Mawu hyɛ nɛ e hi ha lɛ?

⁵ E hiaa yohi tlukaa nɛ e wui nɔ ko si; nɛ ke e mi mi fu ɔ, e kpataa a hɛ mi.

⁶ E haa nɛ zugba mimiɛɔ, nɛ titimahi nɛ hɛɛ zugba a mimiɛɔ.

⁷ E nyɛɔ faa nɛ pu ti si, nɛ dodoehi hu kpɛ we.

⁸ Benɛ Mawu maa gbla hiɔwe mi, nɛ e maa naa wo mi lohwe ngua a nɔ ɔ, nɔ ko piɛ we e he.

⁹ Dodoehi nɛ ngɛ hiɔwe: Je kpaago, Huɛ etɛ, Kungwɔ kɛ e bimɛ, kɛ leneyi je dodoe ɔmɛ ɔ, Mawu lɛ pee mɛ tsuo.

¹⁰ E peeɔ ní nguahi nɛ nimli adesahi a juɛmi sui he. E nyakpɛ ní ɔmɛ hiɛ babauu nɛ a li nya.

¹¹ Hyɛ, Mawu bee ngɛ ye hɛ mi kɛ yaa kɛ baa, se i nɛ lɛ.

¹² Nɔ́ nɛ e suɔ ɔ, kɛkɛ e gblɔ kɛ je. Mɛnɔ ma nyɛ maa tsi e nya? Mɛnɔ ma nyɛ ma bi lɛ ke, “Mɛni o ngɛ pee nɛ ɔ?”

¹³ Mawu mi mi fumi se pui. E he nyɛli ɔmɛ nɛ te si wo lɛ ɔ, e kpata a hɛ mi. Mɛ lɛ a ya piɛ wo mi lohwe ngua a nɛ a tsɛɛ lɛ Rahab ɔ he ɔ nɛ.

¹⁴ Lɛɛ jije ma na munyu ngɛ kɛ ha Mawu heto nɛ sa?

¹⁵ E ngɛ mi kaa i pee we yayami ko lɛɛ, se i be nyɛe nɛ ma ha Mawu heto. Pɛɛ kɛkɛ lɛ ma kpa Mawu, ye kojolɔ ɔ, konɛ e na mi mɔbɔ.

¹⁶ Ke i tsɛ lɛ nɛ e he nɔ pohu, i he we yi kaa ke i tu munyu nɛ e maa bu mi tue.

¹⁷ E haa nɛ kɔɔhiɔ nɛ nya wa fiaa mi basabasa yaka gu, nɛ i plaa wawɛɛ nitsɛ.

¹⁸ E ha we nɛ ma wo mumi kulaa; ye wami si himi ɔ, doomi sɔuu.

¹⁹ Ke a ngɛ nɔ nɛ he wa hlae ɔ, lɛ ji nɛ ɔ nɛ. Ke e ba lɛ dami sane yemi hu, mɛnɔ kɛ lɛ maa ba kojomi he ɔ?

²⁰ Ke i ke dalɔ ji mi ɔ, imi nitsɛ ye nya mi munyu maa bu mi fɔ. Ke i ke tɔmi ko be ye he ɔ, e maa tsɔɔ mi kaa i yeɔ fɔ.

²¹ Ke i yeɔ nguɔ kulaa po, e hia we kaa ma susu lɔ ɔ he; ye wami si himi pee we mi akɔnɔ hu.

²² O yeɔ fɔ jio, o yeɔ nguɔ jio, lɛ tsuo nɔ́ kake too. Mawu ma kpata wɔ tsuo wa hɛ mi.

²³ Ke nɔ nɛ pee we yayami gbo tlukaa a, Mawu muɔɔ.

²⁴ Mawu ngɔ je ɔ kɛ wo nimli yayamihi a dɛ mi. E ngɔ nɔ́ ngɔ ha kojoli ɔmɛ a hɛ mi. Ke pi Mawu nɛ pee ɔ, lɛɛ mɛnɔ lɛ pee?

²⁵ Ye ligbi ɔmɛ ngɛ bee mlamlaamla; a he ngɛ sɔe kulaa pe nɔ ko nɛ ngɛ fo tue. Se nɔ́ kpakpa ko be a mi.

²⁶ Ye ligbi ɔmɛ ngɛ bee kɛ fo kaa lɛ nɛ he sɔɔ saminya; aloo kaa kɔle nɛ maa ho lohwe sami ya.

^27-28 Ke i ke ma muɔ nɛ ye hɛ nɛ je ye haomi ɔmɛ a nɔ ɔ, haomi ɔmɛ tsuo kpaleɔ kɛ baa nɛ a ba woɔ ye he gbeye. I le kaa Mawu be mi nguɔ woe kɔkɔɔkɔ.

²⁹ A maa bu mi fɔ kɛ̃; mɛni he je mɔ lɛ ma gbo dengme yaka?

³⁰ Jale ko jale ko be nɛ ma nyɛ ma fɔ ye he yayami ɔmɛ.

³¹ Mawu ma sake mi kɛ wo muɔ mi, nɛ ye he zo maa pee imi nitsɛ ye tadehi.

³² Nɔmlɔ adesa ji Mawu kaa imi jinɛ i ko ha lɛ heto, jinɛ i kɛ lɛ ko ya kojomi he ɔ nɛ wa ya hla munyu ɔ mi.

³³ Se sane he buálɔ ko be; nɔ ko be nɛ maa kojo Mawu kɛ nɔmlɔ a kpɛti.

³⁴ Mawu nɛ jɔɔ ye tue gblami; e kpa ye he gbeye womi.

³⁵ I yi lɛ gbeye. Ma tu munyu, ejakaa i le bɔ nɛ ye tsui mi ngɛ.