Hiob 8 - BAIBLO ALOO NGMAMI KLƆUKLƆU Ɔ

Bildad

^1-2 O maa hi munyu nɛ ɔmɛ tue kɛ yaa si mɛni be? Munyu nɛ ngɛ kpo jee ngɛ o nya mi kaa kɔɔhiɔ nɛ ngɛ fiae vuguvugu nɛ ɔ, mɛni be o ma kpa tumi?

³ Anɛ Mawu plɛɔ sane hɛ mi ngɔ buɔ si lo? Mawu Ope ɔ, anɛ e tsakeɔ nɔ́ nɛ da kɛ peeɔ nɔ́ nɛ dɛ lo?

⁴ O bimɛ ɔmɛ pee yayami kɛ si Mawu, nɛ lɔ ɔ he nɛ e gbla a tue bɔ nɛ sa mɛ ɔ nɛ.

⁵ Lɛɛ mo nitsɛ mo hla Mawu Ope ɔ se blɔ nɛ o fa kue ha lɛ.

⁶ Ke o he tsɔ, nɛ o peeɔ nɔ́ nɛ da a, Mawu ma tsɔ e hɛ mi ha mo, nɛ e ma ha mo sihi he kpakpa.

⁷ Hwɔɔ se ɔ, Mawu ma ha mo ní babauu nɛ maa hiɛ kulaa pe kekle nɔ́ ɔ.

⁸ Lɔ ɔ he ɔ, i kpa mo pɛɛ, hla blema nile se blɔ, nɛ o hyɛ anɔkuale nɛ wa nɛmɛ ɔmɛ kase ɔ.

⁹ Wa wami be ɔ ngɛ kpiti; wa li nɔ́ ko nɔ́ ko; wa ngɛ kaa nini kɛkɛ nɛ bee ngɛ je ɔ mi.

¹⁰ Nyɛ ha nɛ blema ní leli nɛ tsɔɔ nyɛ ní; nyɛɛ bu a nya mi munyu ɔmɛ tue:

¹¹ “Anɛ ngɔwu puɛɔ ngɛ he nɛ mɔsɔ be lo? Anɛ ke ngɔwu nɛ nyu ɔ, e ma nyɛ maa wa lo?

¹² Ke nyu ta a he pɛ mɛ ji kekleekle tsohi nɛ a gboɔ. Jamɛ a be ɔ, a wɛ lolo nɛ a maa po mɛ kɛ pee nɔ́ ko.

¹³ Nimlihi nɛ a hɛ je Mawu nɔ ɔ, a ngɛ kaa ngɔwu nɛ ɔmɛ pɛ. Ke o li Mawu ɔ, o be hɛ nɔ kami ko.

¹⁴ Nimli nɛ li Mawu ɔ, a hemi kɛ yemi ngɛ kaa anani ya; a yi mi tomi ɔmɛ tsuo maa laa.

¹⁵ A maa ngɔ a hɛ kɛ fɔ weku kɛ nina nɔ, se e be hie ha mɛ. A maa ngɔ a he kɛ mɛtɛ mɛ kpɛii, se nɔ́ kpakpa ko be mi jee.”

¹⁶ Nimli yayamihi bɔɔ kaa nga ngɛ pu nɔ; a bɔɔ kaa nga nɛ ha ngmɔ nɔ.

¹⁷ A sipoku ɔmɛ ngɔɔ a he ya blaa tɛ sahi, nɛ a mɛtɛɛ tɛ sa amɛ a he.

¹⁸ Se ke a hɛ mi kpata kikɛ nɛ ɔ, nɔ ko nɔ ko be lee kaa a hi lejɛ ɔ hyɛ po.

¹⁹ Niinɛ, bua jɔmi tsuo nɛ nimli yayamihi naa ji nɛ ɔ nɛ; kɛkɛ ɔ, ni kpahi baa ba ngɔɔ a blɔ he ɔmɛ.

²⁰ Nɔ nɛ peeɔ nɔ́ nɛ da a, Mawu be lɛ kuae. Mawu be nimli yayamihi a he piɛe kɔkɔɔkɔ.

²¹ Mawu ma ha nɛ o maa muɔ, nɛ o ma hwɔ lele ekohu.

²² Ni nɛmɛ nɛ nyɛɛ mo ɔ, zo maa gbe mɛ; yiwutsotsɛmɛ ɔmɛ a wehi maa laa.