Hiob 7 - BAIBLO ALOO NGMAMI KLƆUKLƆU Ɔ

¹ Nɔmlɔ adesa wami si himi ngɛ kaa ta; nɔmlɔ ngɛ kaa apaa yelɔ ngɛ je nɛ ɔ mi.

² Nɔmlɔ ngɛ kaa nyɔguɛ nɛ ngɛ hɔ̃ hlae nɛ e hi mi. E ngɛ kaa apaa yelɔ nɛ ngɛ e hiɔwo blɔ hyɛe.

³ Bɔ nɛ ye sane ɔ ngɛ pɛ ji nɛ ɔ nɛ: nyɔhiɔhi babauu ji nɛ ɔ nɛ i hii si kɛkɛ; daa nyɔ mi ɔ, dekla sɔuu.

⁴ Ke i ya hwɔ si ɔ, i biɔ ye he ke, “Mɛni be je maa na nɛ ma te si?” Ke nyɔ ɔ se kɛ ɔ, kikɛ nɛ ɔ i hii plɛe ngɛ sa mi hluu kɛ ya siɔ mɔtu.

⁵ Ye he womi pɔtɔ, nɛ e wo gɔgɔ. Ye he tsuo pee pa, nɛ e foɔ nyu.

⁶ Ye ligbi ɔmɛ ngɛ bee mlamlaamla; a he ngɛ sɔe kulaa pe bo lolɔ kplɛ. Ligbi ɔmɛ ngɛ tae, se i be hɛ nɔ kami ko.

⁷ Nyɛ kai kaa ye wami ngɛ kaa kɔɔhiɔ kɛkɛ; ye bua jɔmi ɔ se po.

⁸ Nɛ́ nyɛ ngɛ mi hyɛe nɛ ɔ, nyɛ be mi nae hu. Nyɛ maa hi mi hyɛe kikɛ nɛ ɔ kɛkɛ i si nyɛ.

⁹ Ke nɔ ko gbo nɛ e ho gbeje ya a, e kpale we kɛ bɛ hu kaa bɔ nɛ bɔku laa nɛ a nɛ lɛ hu ɔ.

¹⁰ Nɔ ɔ kpale we kɛ bɛ e we mi hu, nɛ nihi nɛ le lɛ ɔ, a hɛ jee e nɔ.

¹¹ Lɔ ɔ he ɔ, imi hu i be ye nya mae. I hao, nɛ aywilɛho nu mi. Ja i tu munyu kɛ̃!

¹² Mɛni he je nyɛ ba ngɛ ye he bue? Anɛ nyɛ susuɔ kaa wo mi lohwe ngua a ji mi lo?

¹³ Ke i susu kaa ke i hwɔ si nɛ ma na bua jɔmi, nɛ ke i hwɔ mahe nɛ ye kɔmɔ yemi se maa po ɔ,

¹⁴ nyɛɛ lɛɛ nyɛɛ kɛ nlamihi, kɛ ninahi woɔ ye he gbeye.

¹⁵ I na nɛ a mia ye kuɔ si nɛ i gbo mohu, pe nɔ́ nɛ ma hi je mi wuhiwuhi kikɛ nɛ ɔ.

¹⁶ Je mi si himi pee we mi akɔnɔ hu; i be si hie kɛ maa ya neneene. Nyɛɛ ngmɛɛ ye he nɛ nyɛɛ ho; ye wami ɔ ngɛ kaa kɔɔhiɔ kɛkɛ.

¹⁷ Mɛnɔ ji nɔmlɔ adesa, loko e he hia mo kikɛ nɛ ɔ? Mɛnɔ ji lɛ, loko o susuɔ e he kikɛ nɛ ɔ?

¹⁸ O ba slaa lɛ daa mɔtu, nɛ o kaa lɛ kpitikpiti.

¹⁹ O be o hɛ jee kɛ je ye he bɔɔ nɛ ma mi ye kuɔ mi nyu po lo?

²⁰ Ke i pee yayami ɔ, i plaa mo lo? Mo nɛ o hyɛɛ nimli adesahi a tsui mi ɔ, mɛni he je o je hɛ ngɔ pi mi ɔ? Anɛ i plɛ pee tlomi nɛ jiɔ tsɔ ha mo lo?

²¹ Mɛni he je o kɛ ye he yayami ɔmɛ pɛ mi ɔ? Mɛni he je o je we ye he yayami ɔmɛ kɛ ji o hɛ mi kɛ mwɔɔ ɔ? Jehanɛ lɛɛ tabo zu mi lɛ ma hwɔ; ke o ngɛ mi hlae ɔ, o be mi nae hu.