Hiob 6 - BAIBLO ALOO NGMAMI KLƆUKLƆU Ɔ

Hiob

^1-2 I ná nɛ a ngmɛ ye haomi ɔ, kɛ ye aywilɛho ɔ ngɛ sɛni nɔ,

³ jinɛ a ko jiɔ pe wo nya zia. Enɛ ɔ he je nɛ i ngɛ munyu tue basabasa a nɛ.

⁴ Mawu Ope ɔ tsɛ̃ mi kɛ̃ɛ̃, nɛ duɔ ɔ ngɛ nyɛɛe ngɛ ye he womi mi tsuo. Mawu ní gbeyegbeye ɔmɛ gba ta kɛ wo mi.

⁵ Ke nga mi teji ngɛ nga kpee ɔ, anɛ e pa hii pɛe lo? Ke na ngɛ ní yee ɔ, anɛ e hii pɛe kɛ mwɔɔ lo?

⁶ Anɛ a yeɔ ní muɛtɛ nɛ a nɛ ngo lo? Kungwɔ hlui mi ehiɔ ɔ, mɛni ngɔmi lɛ ngɛ mi?

⁷ Niye ní kaa kikɛ nɛ ɔ jlo we mi; ke i ye kɛkɛ e peeɔ mi kaa ma vie.

⁸ Mɛni he je Mawu ha we mi nɔ́ nɛ i bi lɛ ɔ? Mɛni he je e bui ye kue fami ɔ tue ɔ?

⁹ Lɛɛ tse e ko ngɔ e nine kɛ fia mi nɔ́ nɛ e gbe nyɔngloo!

¹⁰ Jinɛ ma hlu kɛ bua jɔmi, nɛ i be haomi ɔ nitsɛ po he nue. Mawu Nɔ Klɔuklɔu ɔ mlaa amɛ ɔ, i tɔ̃ we a nɔ hyɛ.

¹¹ Mɛni he wami i ngɛ nɛ ma kɛ hi je mi kɛ mwɔɔ? Mɛni he je ma hi je mi kɛ mwɔɔ, be mi nɛ i be hɛ nɔ kami ko?

¹² Anɛ tɛ ji mi nɛ i nui nɔ́ he lo? Ye he womi ɔ, akɔblee lo?

¹³ Anɔkuale mi ɔ, ye he wami ta! He ko he ko be nɛ ma na yemi kɛ buami kɛ je.

¹⁴ I kua Mawu jio, i kua we lɛ jio, ngɛ haomi kaa kikɛ nɛ ɔ mi ɔ, e hia mi huɛmɛ nɛ ma he mɛ ma ye.

¹⁵ Se nyɛ ye nyɛmimɛ, nyɛ sisiɔ mi kaa pa nɛ gbli, be mi nɛ hiɔmi nɛ́.

¹⁶ Snoo kɛ nyu tɛ hyiɔ pa tɔtɔɔtɔ,

¹⁷ se ke je mi dɔ, kɛkɛ a laa, be mi nɛ nyu dɔ ɔ fɔɔ si gu nɛ e gbli.

¹⁸ Blɔ nyɛɛli gbaa kɛ jeɔ a blɔ nɔ kaa a ma na nyu maa nu lo. Se a nɛ nyu nɛ a nu, nɛ a gboɔ ngɛ nga a nɔ.

¹⁹ Blɔ nyɛɛli nɛ je Sheba kɛ Tema ba hlaa nyu nɛ a nu.

²⁰ Se ke a ba su pa nɛ e mi nyu mii ta a he kikɛ nɛ ɔ, a kɔni mi jɔɔ, ejakaa lɔ ɔ nɔ a ngɔ a hɛ kɛ fɔ.

²¹ Nyɛ ngɛ kaa jamɛ a pa a nɛ e mi nyu mii ta a pɛpɛɛpɛ. Nyɛ ba na mi ngɛ haomi si himi mi, kɛkɛ nɛ nyɛ ye gbeye.

²² Anɛ i de nyɛ ke nyɛ ba ke mi ní, aloo nyɛ ya ha nɔ ko nyɔ mi ní ha mi lo?

²³ Anɛ i de nyɛ ke nyɛ ba je mi kɛ je he nyɛlɔ, loo yiwutsotsɛ ko dɛ mi lo?

²⁴ Yoo, nyɛɛ kɛ mi nɛ tu munyu. Nyɛɛ tsɔɔ mi nɔ́ nɛ i pee nɛ dɛ; ma pee dii nɛ ma bu nyɛ tue.

²⁵ Anɔkuale munyuhi gbɔɔ nɔ tsui mi; se ye hɛ mi nɛ nyɛ ba ngɛ kae nɛ ɔ lɛɛ yaka kɛkɛ.

²⁶ Nyɛ susuɔ kaa nyɛɛ lɛɛ nyɛ ngɛ juɛmi munyuhi tue, se imi nɛ ye nine mi je wu ɔ, ye munyu ɔmɛ peeɔ kɔɔhiɔ; pi ja?

²⁷ Anɛ nyɛ ma nyɛ maa fɔ awusa bi nɔ sɔ lo? Anɛ nyɛ ma nyɛ maa wo nyɛ huɛ he jua lo?

²⁸ Nyɛɛ hyɛ ye hɛ mi saminya! Anɛ ma nyɛ ma ye nyɛ lakpa lo?

²⁹ Lɔ ɔ he ɔ, i kpa nyɛ pɛɛ, nyɛ ko susu nɔ́ yayami ha mi kɛ ya tsitsaa. Nyɛ ko bu mi fɔ; i yeɔ nguɔ.

³⁰ Se nyɛɛ lɛɛ nyɛ susuu kaa i ngɛ lakpa yee. Nyɛ susuu kaa i li kpakpa kɛ yayami a kpɛti slɔɔto lo?