Hiob 5 - BAIBLO ALOO NGMAMI KLƆUKLƆU Ɔ

¹ Hiob, mo kpa kuu kaa nɔ ko ma he nɔ lo! Ni klɔuklɔu ɔmɛ a ti mɛnɔ ngɔ o maa ya?

² Niinɛ, mi mi la gbeɔ kuasia. Nɔ nɛ hɛ mi tɛ̃ ɔ, hunga gbeɔ lɛ.

³ I na kuasiahi nɛ a pee kaa a na a he; kɛkɛ nɛ i gbiɛ a hi he amlɔ nɔuu.

⁴ A bimɛ ɔmɛ be he jɔmi nae. Ke a kɛ mɛ ya kojomi he ɔ, nɔ ko nɔ ko be a he fae.

⁵ Kuasiahi a ngmɔ ní ɔ, ke mio mi e ngɛ po, nihi nɛ hwɔ ngɛ mɛ yee ma ya ye. A juetli he kuma maa ye nihi.

⁶ Amanehlu ɔ, pi bunyuku mi nɛ e jeɔ; haomi hu pi zu mi nɛ e puɛɔ kɛ jeɔ.

⁷ Nɔmlɔ adesa nitsɛ lɛ hlaa haomi kɛ haa e he kaa bɔ nɛ la lilɛ tee kɛ yaa hiɔwe ɔ.

⁸ Imi ji mo jinɛ i ko hla Mawu se blɔ, nɛ ma tu ye sane ɔ kɛ wo e dɛ mi.

⁹ Lɛ ji nɔ nɛ peeɔ ní nguanguahi nɛ wa juɛmi sui he, kɛ nyakpɛ ní hu babauu.

¹⁰ Lɛ nɛ e haa nɛ hiɔmi nɛɔ kɛ pueɔ zugba; nɛ e haa nɛ ngmɔ ɔmɛ naa nyu.

¹¹ Ee, nihi nɛ baa a he si ɔ, Mawu woɔ a nɔ; lɛ nɛ e woɔ kɔmɔ yeli a bua.

¹² Lɛ nɛ e tsakeɔ nɔ sisili a yi mi tomi, nɛ níhi nɛ a so kaa a maa pee ɔ, a nyɛ we nɛ a peeɔ.

¹³ Ke ní leli tsɔ nihi klama a, lɛ nɛ e haa klama amɛ fɛɔ yaka nɛ a puɛ we ní.

¹⁴ Piani nɛ la ngɛ po, a hii si tataae kaa nɔ́ nɛ diblii mi lɛ a ngɛ nyɛɛe.

¹⁵ Se Mawu heɔ ohiatsɛ yi wami kɛ jeɔ gbenɔ mi. E jeɔ nɔ nɛ e fí lɛ ɔ kɛ jeɔ yiwutsotsɛ dɛ mi.

¹⁶ E haa ohiatsɛ hɛ nɔ kami, nɛ yiwutsotsɛ maa e nya.

¹⁷ A gbaa nɔ nɛ Mawu kaa e hɛ mi ɔ. Ke Mawu Ope ɔ ngɛ o hɛ mi kae ɔ, koo ngɔ lɛ kaa nɔ́ ko nyafii.

¹⁸ Ke Mawu plaa mo ɔ, e fiɔ pa a nɔ; ke e fia mo nɔ́ ɔ, e tsaa mo.

¹⁹ E ma je mo kɛ je haomihi tsuo a mi, nɛ nɔ́ ko be o he sae.

²⁰ Hwɔ be mi, kɛ ta be mi tsuo e ma he o yi wami.

²¹ Mawu ma je mo kɛ je he guɛ gbeli a dɛ mi; ke hɛ mi kpatami ma a, e ma he o yi wami.

²² Hɛ mi kpatami kɛ hwɔ a he maa pee mo muɔ, nɛ o be pu mi lohwehi hu gbeye yee.

²³ Ejakaa ngmɔhi nɛ o ma hu ɔ, tɛ be a nɔ hie; pu mi lohwehi hu be mo haoe.

²⁴ O maa hi si ngɛ o bo tsu ɔ mi ngɛ tue mi jɔmi mi. Ke o hyɛ o to tsu ɔ mi ɔ, o maa na kaa nɔ́ tsuaa nɔ́ ngɛ pɛpɛɛpɛ.

²⁵ O bimɛ maa hiɛ babauu kaa nga ngɛ zugba a nɔ.

²⁶ O maa bwɔ kotokoto loko o ma gbo, kaa bɔ nɛ ngma waa saminya loko a kpaa a.

²⁷ Hiob, nɔ nɛ wa kpa si nɛ wa na ji nɛ ɔ nɛ! E ji anɔkuale. Mo hu moo bu tue nɛ o le, konɛ e hi ha mo.