Hiob 42 - BAIBLO ALOO NGMAMI KLƆUKLƆU Ɔ

¹ Kɛkɛ nɛ Hiob he nɔ nɛ e kɛ Yawɛ tu munyu.

Hiob

² Yawɛ, i le kaa he walɔ kpetekpleenyɛ ji mo; o nyɛɔ nɛ o peeɔ nɔ́ tsuaa nɔ́ nɛ o suɔ.

³ O bi ke kɛ peeɔ kɛɛ nɛ i biɔ sane nɛ kɔɔ mo o nile he, be mi nɛ imi lɛɛ i li nɔ́ ko nɔ́ ko ɔ? I tu níhi nɛ i nui sisi a he munyu; nyakpɛ níhi nɛ ye juɛmi sui a he.

⁴ O de mi ke ma bu mo tue nɛ o tu munyu, konɛ ma ha mo sanehi nɛ o ma bi mi ɔ a heto.

⁵ Jamɛ a be ɔ, níhi nɛ nihi de mi ngɛ o he kɛkɛ lɛ i le, se amlɔ nɛ ɔ lɛɛ i na mo paa kɛ imi nitsɛ ye hɛngmɛ.

⁶ Nɔ́ nɛ i pee ɔ dɔ mi. Lɔ ɔ he ɔ, i kɛ tabo zu kɛ la zu to okadi kaa i pia ye he niinɛ.

Nyagbe

⁷ Benɛ Yawɛ kɛ Hiob tu munyu ta a, Yawɛ de Elifaz, Teman no ɔ ke, “Ye mi mi fu o kɛ o huɛmɛ enyɔ ɔmɛ tsuo; ejakaa nyɛ tu we ye he anɔkuale munyu kaa bɔ nɛ ye tsɔlɔ Hiob pee ɔ.

⁸ Enɛ ɔ he je ɔ, nyɛɛ ngɔ na ku kpaago, kɛ agbosu kpaago kɛ ya ye tsɔlɔ Hiob ngɔ, nɛ nyɛ ya sã sami bɔ ha nyɛ he ngɛ lejɛ ɔ. Hiob maa fa kue ha nyɛ. Ma bu e kue fami ɔ tue, nɛ i be nyɛ tue gblae bɔ nɛ sa nyɛ kaa nyɛ je kuasia. Ee, nyɛ tu we ye he anɔkuale munyu kaa bɔ nɛ ye tsɔlɔ Hiob pee ɔ.”

⁹ Elifaz, Teman no ɔ, Bildad, Shua no ɔ, kɛ Zofar, Naamat no ɔ ho nɛ a ya pee kaa bɔ nɛ Yawɛ de mɛ ke a pee ɔ. Nɛ Yawɛ bu Hiob kue fami ɔ tue.

¹⁰ Jehanɛ, benɛ Hiob fa kue ha Yawɛ ngɛ e huɛmɛ etɛ ɔmɛ a he se ɔ, Yawɛ wo lɛ ní ekohu. Níhi tsuo nɛ Hiob hi sa a, Yawɛ bɔ he totoe enyɔɔnyɔ kɛ ha lɛ.

¹¹ Hiob nyɛminyumuhi, e nyɛmiyihi, kɛ nihi nɛ le lɛ sa a tsuo ba slaa lɛ nɛ a kɛ lɛ ba ye ní ngɛ e we ɔ mi. A ye lɛ kɔmɔ nɛ a jɔɔ e bua ngɛ haomihi tsuo nɛ Yawɛ kɛ ba e nɔ ɔ a he. A ti nɔ tsuaa nɔ ke lɛ sika, kɛ sika tsu ga.

¹² Yawɛ gbaa Hiob ngɛ nyagbe be nɛ ɔ mi kulaa pe bɔ nɛ e gbaa lɛ kekle ɔ. Hiob ba na to akpe nyɔngma kɛ eywiɛ, afukpɔngɔ akpe ekpa, na blablɛ akpe kɛ teji akpe.

¹³ Jehanɛ e kpale fɔ binyumuhi kpaago kɛ biyihi etɛ.

¹⁴ E wo e biyo nɔkɔtɔma a biɛ ke Yemima. Enyɔne ɔ biɛ ji Kezia, nɛ etɛne ɔ biɛ ji Keren Hapuk.

¹⁵ Ngɛ je ɔ mi tsuo ɔ, a nɛ yihi nɛ a he ngɛ fɛu kaa Hiob biyi ɔmɛ. A tsɛ ɔ ha mɛ weto ní kaa bɔ nɛ e ha a nyɛminyumu ɔmɛ ɔ.

¹⁶ Ní nɛ ɔmɛ a se ɔ, Hiob kpale ye jeha lafa kɛ nyingmi eywiɛ ekohu. E na bimɛ, kɛ bibimɛ hluu kɛ ya si yi nɔ nɛ ji eywiɛ

¹⁷ loko e gbo. Jamɛ a be ɔ, e bwɔ kotokoto.